കെ പി സി സിയുടെ പുതിയ ഭാരവാഹിപ്പട്ടികയില്‍ തര്‍ക്കങ്ങളില്ലെന്ന് പ്രസിഡന്റ് കെ സുധാകരന്‍ വ്യക്തമാക്കി. പട്ടികയെക്കുറിച്ച്‌ കെ മുരളീധരന്‍ ഉന്നയിച്ച കാര്യങ്ങളെ കുറിച്ച്‌ അറിയില്ലെന്നും പരാതി വന്നാല്‍ പരിഗണിക്കുമെന്നും മാദ്ധ്യമങ്ങളാേട് സംസാരിക്കവെ അദ്ദേഹം പറഞ്ഞു.

'പുതിയ പട്ടികയെക്കുറിച്ച്‌ ഒരു തര്‍ക്കവുമില്ല. നിങ്ങള്‍ തര്‍ക്കം ഉണ്ടാക്കേണ്ട. എന്തെങ്കിലും കിട്ടാനാണ് നിങ്ങള്‍ ശ്രമിക്കുന്നത് എന്നാല്‍, ഒന്നും കിട്ടൂല. മുരളീധരന്‍ പറഞ്ഞ കാര്യങ്ങളെ കുറിച്ച്‌ അദ്ദേഹവുമായി നേരിട്ടു സംസാരിക്കും. അദ്ദേഹം പറഞ്ഞത് എന്താണ് എന്നറിയില്ല'- സുധാകരന്‍ പറഞ്ഞു.

മൂന്നൂറില്‍ നിന്ന് 56ലേക്ക് ഭാരവാഹിപ്പട്ടിക കൊണ്ടുവന്നത് എങ്ങനെയെന്ന് ചോദ്യത്തിന് അതാണ് മാന്ത്രികം എന്നായിരുന്നു സുധാകരന്‍ പറഞ്ഞത്. 'അവിടെയാണ് നിങ്ങള്‍ ഞങ്ങളെ വിലയിരുത്തേണ്ടത്. കടല്‍ നികത്തിയാണ് കൈത്തോട് വെട്ടിയത്. ഇത് ചെറിയ അദ്ധ്വാനമല്ല. ഇതില്‍ പാര്‍ട്ടിയിലെ എല്ലാ തലമൂത്ത നേതാക്കന്മാരും ആത്മാര്‍ത്ഥമായി സഹകരിച്ചു.. സഹകരിച്ചില്ലെങ്കില്‍ ഇങ്ങനെ പറ്റുമായിരുന്നോ? അതിന്റെ ഫലമാണ് ഇത്രയും അംഗസംഖ്യ കുറയ്ക്കാന്‍ സാധിച്ചത്.' -കെ പി സി സി അദ്ധ്യക്ഷന്‍ വ്യക്തമാക്കി.

മോന്‍സണ്‍ വിഷയത്തില്‍ രൂക്ഷമായാണ് അദ്ദേഹം പ്രതികരിച്ചത്. 'ഈ പൂഴിക്കടക്കനൊന്നും എന്റെയടുത്ത് എടുക്കേണ്ട. ഇത് ജനുസ് വേറെയാ. മനസിലായില്ലേ. അങ്ങനെയുണ്ടെങ്കില്‍ അന്വേഷിച്ചോട്ടെ. ഞാനപ്പോള്‍ നോക്കിക്കോളാം. മുഖ്യമന്ത്രിക്കടക്കം കാര്യങ്ങള്‍ വ്യക്തമായതാണ് '

പുതിയ ഭാരവാഹിപ്പട്ടികയില്‍ അതൃപ്തി പ്രകടിപ്പിച്ച്‌ കെ മുരളീധരന്‍ എം പി ഇന്നാണ് പരസ്യമായി രംഗത്തെത്തിയത്. പുതിയ പട്ടികയെ അനുകൂലിക്കുന്നില്ലെന്ന് വ്യക്തമാക്കിയ മുരളീധരന്‍ മുന്‍ പ്രസിഡന്റുമാരോട് കൂടുതല്‍ ചര്‍ച്ച ആകാമായിരുന്നുവെന്നും എങ്കില്‍ പട്ടിക കൂടുതല്‍ നന്നാക്കാമായിരുന്നുവെന്നും പറഞ്ഞു.