ഉത്തര്‍പ്രദേശില്‍ യോഗി ആദിത്യനാഥിനെയും ബിജെപിയെയും തറപറ്റിക്കാന്‍ പ്രിയങ്കാ ഗാന്ധി പുതിയ വെല്ലുവിളികളുമായി അരങ്ങത്ത് സജീവമായിരിക്കുന്നു. അടുത്ത വര്‍ഷത്തെ തെരഞ്ഞെടുപ്പ് വരെ ഉത്തര്‍പ്രദേശില്‍ പ്രചാരണത്തില്‍ സജീവമായി നിലകൊള്ളാനാണ് പ്രിയങ്കയുടെ തീരുമാനം.


കോണ്‍ഗ്രസിന്റെ നീക്കങ്ങളെ ചെറുക്കാന്‍ വര്‍ഗീയ കാര്‍ഡുമായി മുഖ്യമന്ത്രി യോഗി ആതിത്യനാഥും കളത്തിലിറങ്ങിക്കഴിഞ്ഞു. ഉത്തര്‍പ്രദേശിലെ റെയില്‍വേ സ്റ്റേഷനുകളുടെ പേരുകള്‍ ജാതിവത്കരിച്ചും പ്രിയങ്കാ ഗാന്ധിയെ വ്യക്തിപരമായ താറടിച്ചും യോഗി കോണ്‍ഗ്രസ് നീക്കങ്ങളെ ചെറുക്കുകയാണ്.

എസ്.പി, ബിഎസ്പി പാര്‍ട്ടിയുടെ അടുത്ത നീക്കങ്ങള്‍ എങ്ങനെയെന്നതും നിര്‍ണായകമാണ്. അതേ സമയം മറ്റ് പാര്‍ട്ടികളുമായി യാതൊരു ധാരണയും വേണ്ടെന്ന നിലപാടിലാണ് കോ്ണ്‍ഗ്രസ് നേതൃത്വം. പ്രിയങ്ക കോണ്‍ഗ്രസ് ദേശീയ അധ്യക്ഷ സ്ഥാനം ഏറ്റെടുക്കാനുള്ള വിദൂകര സാധ്യതയും നിലവിലുണ്ട്.

ഉത്തര്‍പ്രദേശില്‍ കോണ്‍ഗ്രസ് നേട്ടമുണ്ടാക്കിയാല്‍ പ്രിയങ്ക കോണ്‍ഗ്രസിന്റെ ദേശീയ നേതൃത്വം ഏറ്റെടുക്കുമെന്ന വ്യക്തമാണ്.

ഉത്തര്‍പ്രദേശ് തിരഞ്ഞെടുപ്പില്‍ 40 ശതമാനം സീറ്റുകളിലും കോണ്‍ഗ്രസ് വനിതാ സ്ഥാനാര്‍ത്ഥികളെ മത്സരിപ്പിക്കുമെന്നാണ് പ്രിയങ്കാ ഗാന്ധിപ്രഖ്യാപിച്ചിരിക്കുന്നത്.

ഉത്തര്‍പ്രദേശില്‍ ഒരു മാറ്റം വേണോ എന്ന് ഇവിടത്തെ വനിതകളാണ് ഇനി തീരുമാനിക്കേണ്ടതെന്നും മാറ്റം ആഗ്രഹിക്കുന്ന എല്ലാ വനിതകള്‍ക്കും വേണ്ടിയാണ് കോണ്‍ഗ്രസ് ഈ തീരുമാനമെടുത്തതെന്നും പ്രിയങ്ക പ്രഖ്യാപിച്ചിരിക്കുന്നത്. ഉത്തര്‍പ്രദേശില്‍ തുടര്‍ച്ചയായ പരാജയങ്ങള്‍ അലട്ടി കൊണ്ടിരുന്ന കോണ്‍ഗ്രസിനെ കരകയറ്റുകയെന്ന ലക്ഷ്യത്തോടെ മൂന്ന് വര്‍ഷം മുമ്പാണ് പ്രിയങ്ക സഹോദരന്‍ രാഹുല്‍ ഗാന്ധിയില്‍ നിന്ന് സംസ്ഥാന കോണ്‍ഗ്രസിന്റെ നേതൃസ്ഥാനം ഏറ്റെടുത്തത്.


ഇതിനെ ചെറുക്കാനാണ് അലഹാബാദിനെ പ്രയാഗ് രാജ് ആക്കിയ ശേഷം പുതിയൊരു പേരുമാറ്റവുമായി യോഗി തിരഞ്ഞെടുപ്പ് ഗോദയിലിറങ്ങിയിരിക്കുന്നത്. ഇതിനു പിന്നാലെയാണ് അയോധ്യയെയും റാണി ലക്ഷ്മി ഭായിയെയും പുതിയ റെയില്‍വേ സ്റ്റേഷനുകളായി മുഖ്യമന്ത്രി യോഗി അദിത്യനാഥ് നാമകരണം ചെയ്തിരിക്കുന്നത്.


അടുത്ത വര്‍ഷം നടക്കുന്ന തിരഞ്ഞെടുപ്പില്‍ പതിവു പോലെ ഉയര്‍ന്ന ജാതിക്കാരെ പ്രീതിപ്പെടുത്തുകയെന്ന തന്ത്രമാണ് ബി ജെ പി സ്വീകരിക്കുക. എന്നാല്‍ കഴിഞ്ഞ തവണ യോഗി ആദിത്യനാഥിനെ മുഖ്യമന്ത്രിയാക്കിയതില്‍ ഉത്തര്‍പ്രദേശിലെ ഉയര്‍ന്ന ജാതിക്കാര്‍ക്കിടയില്‍ ഇപ്പോഴും അമര്‍ഷം നിലനില്‍ക്കുന്നുണ്ട്.


ഇതിനു പുറമേയാണ് ലഖിംപൂരിലെ കര്‍ഷകപ്രക്ഷോഭത്തിനു കാരണമായ സംഭവത്തില്‍ കേന്ദ്രമന്ത്രി അജയ് മിശ്രയ്ക്കെതിരെ നടപടി സ്വീകരിക്കാത്തതില്‍ ഉത്തര്‍പ്രദേശിലെ ഒരുവിഭാഗത്തിന് എതിര്‍പ്പുയര്‍ന്നിരിക്കുന്നത്. പ്ലസ് ടു വിദ്യാര്‍ഥിനികള്‍ക്ക് മൊബൈല്‍ ഫോണും ബിരുദം പൂര്‍ത്തിയാക്കിയ പെണ്‍കുട്ടികള്‍ക്ക് ഇലക്ട്രിക്ക് സ്‌കൂട്ടറും നല്‍കുമെന്നാണ് പ്രിയങ്കയുടെ വാഗ്ദാനം.


കോണ്‍ഗ്രസ് ഉടന്‍ പുറത്തിറക്കാന്‍ പോകുന്ന പ്രകടന പത്രികയുടെ ഭാഗമാണ് ഈ പ്രഖ്യാപനങ്ങളെന്ന് കോണ്‍ഗ്രസ് വൃത്തങ്ങള്‍ വ്യക്തമാക്കി.ഈ പ്രഖ്യാപനങ്ങളിലൂടെ സംസ്ഥാനത്തെ സ്ത്രീ വോട്ടര്‍മാരുടെ പിന്തുണ നേടിയടുക്കാനാകുമെന്നാണ് കോണ്‍ഗ്രസും പ്രിയങ്കയും കണക്കുകൂട്ടുന്നത്. മുന്‍കാലങ്ങളില്‍ സംസ്ഥാനത്ത് സമാജ് വാദി പാര്‍ട്ടിയും ബി.ജെ.പിയും വിദ്യാര്‍ഥികള്‍ക്ക് ലാപ്ടോപ്പുകള്‍ വാഗ്ദാനം നല്‍കിയിരുന്നു. ലഖിംപൂരിലെ കര്‍ഷകപ്രക്ഷോഭം കോണ്‍ഗ്രസിനു നേട്ടമായെന്നാണ് രാഷ്ട്രീയ വിലയിരുത്തല്‍. യുപിയില്‍ കര്‍ഷക സമരക്കാരുടെ സംഘര്‍ഷത്തില്‍ കൊല്ലപ്പെട്ടവരുടെ കുടുംബങ്ങളെ സന്ദര്‍ശിക്കാന്‍ പ്രിയങ്ക കാണിച്ച താല്‍പര്യം കര്‍ഷരില്‍ കോണ്‍ഗ്രസിന് നേട്ടമുണ്ടാക്കിയതായി കരുതുന്നു.


ലഖിംപൂര്‍ ഖേരിയില്‍ നാല് സമരക്കാര്‍ ഉള്‍പ്പടെ എട്ട് പേരാണ് ദാരുണമായി കൊല്ലപ്പെട്ടത്. പ്രതീക്ഷയോടെ കോണ്‍ഗ്രസിനെ പ്രിയങ്ക നയിക്കുമ്പോഴും ഉത്തര്‍പ്രദേശില്‍ കോണ്‍ഗ്രസിന് വന്‍ തിരിച്ചടി നേരിട്ടുകൊണ്ടിരിക്കുകയാണ്. പ്രിയങ്ക ഗാന്ധിയുടെ ഉപദേശകനും പാര്‍ട്ടി സംസ്ഥാന വൈസ് പ്രസിഡന്റ് അടുത്തയിടെ കോണ്‍ഗ്രസ് വിട്ടു. പാര്‍ട്ടി ഉപദേശകനും എംഎല്‍എയുമായ ഹരേന്ദ്ര മാലിക്കും, പാര്‍ട്ടി സംസ്ഥാന വൈസ് പ്രസിഡന്റ് പങ്കജ് മാലിക്കുമാണ് പാര്‍ട്ടി വിട്ടത്. ഇവര്‍ സമാജ് വാദി പാര്‍ട്ടിയില്‍ ചേരുകയും ചെയ്തു.

 "