കേരളത്തിലെ ജനങ്ങള്‍ ഉത്കണ്ഠയുടെയും ഭയാശങ്കയുടെയും രൂപമായി കാണുന്ന ഒന്നാണ് മുല്ലപ്പെരിയാര്‍ ഡാം.
എന്നാല്‍ ഇതിന് ആക്കം കൂട്ടുന്ന തരത്തില്‍ അണക്കെട്ടിലെ ജലനിരപ്പ് 137 അടിയായി ഉയര്‍ന്നിരുക്കുകയാണ്. മുല്ലപ്പെരിയാര്‍ ഇപ്പോള്‍ പൊട്ടുമോ,.എപ്പോള്‍ പൊട്ടും, എന്നൊക്കെ സോഷ്യല്‍ മീഡിയില്‍ ഇപ്പോള്‍ ചൂടേറിയ ചര്‍ച്ചാ വിഷയമാണ്..സര്‍ക്കാരിന്‍റെ കണ്ണുതുറപ്പിക്കുന്നതിലേക്ക് വഴിയൊരുക്കുന്നതിന് വേണ്ടി മലയാളികള്‍ രൂപീകരിച്ച ഒരു ഹാഷ് ടാഗാണ് ഡീക്കമ്മീഷന്‍ മുല്ലപ്പെരിയാര്‍ ഡാം എന്നത്. തമിഴ്‌നാട് മുഖ്യമന്ത്രി എം.കെ സ്റ്റാലിന്റെ ഔദ്യോഗിക ഫെയ്സ് ബുക്ക് പേജുകളിലെ പോസ്റ്റുകള്‍ക്കടിയില്‍ ഇതേ ഹാഷ് ടാഗ് പങ്കുവെച്ച് അപേക്ഷയുമായി എത്തിയിരിക്കുകയാണ് മലയാളികള്‍.

ലക്ഷക്കണക്കിന് ആളുകളുടെ ജീവന് ഭീഷണിയായി നിലകൊള്ളുന്ന മുല്ലപ്പെരിയാര്‍ ഡാം ഡീകമ്മീഷന്‍ ചെയ്യണമെന്നും പുതിയ അണക്കെട്ട് നിര്‍മ്മിക്കാന്‍ അനുവദിക്കണമെന്നുമാണ് മലയാളികളുടെ ആവശ്യം. #DecommissionMullaperiyarDam,#SaveKerala എന്നീ ഹാഷ്ടാഗുകളോടെയാണ് കമന്‍റുകള്‍.

'

സര്‍, വെള്ളം എത്രവേണമെങ്കിലും എടുത്തോളൂ, ജീവന്‍ എടുക്കരുത്' എന്നും 'സര്‍ ഞങ്ങളും ജീവിക്കാന്‍ ആഗ്രഹിക്കുന്നു, അറബികടലും തെക്കുകിഴക്കന്‍ മണ്‍സൂണും സഹ്യനുമുള്ളടത്തോളം കാലം ആ വെള്ളം നിങ്ങള്‍ക്ക് തരാന്‍ ഞങ്ങള്‍ക്കൊരു മടിയുമില്ല, മുല്ലപ്പെരിയാര്‍ ഡാമില്‍ നിന്നും വെള്ളം മുഴുവന്‍ നിങ്ങള്‍ എടുത്തോളൂ, ഡാം ഒന്ന് പുതുക്കി പണിയാന്‍ സമ്മതിക്കൂ. ഇല്ലെങ്കില്‍ ഒരു ജനത മുഴുവന്‍ ഇല്ലാതെ ആകും'...എന്നിങ്ങനെ പോകുന്നു കമന്‍റുകള്‍.

ഡീക്കമ്മീഷന്‍ മുല്ലപ്പെരിയാര്‍ ഡാം ഏറ്റ് പിടിച്ച് നിരവധി പ്രമുഖര്‍ രംഗത്തെത്തിയട്ടുണ്ട്. സോഷ്യല്‍ മീഡിയയില്‍ അതിവേഗം വൈറലാകുകയാണ് ഈ ഹാഷ് ടാഗ്. സിനിമാതാരങ്ങളും സാമൂഹ്യപ്രവര്‍ത്തകരും ഡാം ഡീകമ്മീഷന്‍ ചെയ്യണമെന്ന ആവശ്യവുമായി രംഗത്തെത്തിയിട്ടുണ്ട്. 126 വര്‍ഷംപഴക്കമുള്ള മുല്ലപ്പെരിയാര്‍ ഇനിയും മുന്‍പോട്ടുകൊണ്ടുപോകരുതെന്നും രാഷ്ട്രീയം മാറ്റിവെച്ച്‌ പ്രവര്‍ത്തിക്കേണ്ട സമയമാണിതെന്നും നടന്‍ പൃഥ്വിരാജ് കഴിഞ്ഞ ദിവസം ഫേയ്സ്ബുക്കില്‍ കുറിച്ചിരുന്നു.

അതേസമയം മുല്ലപ്പെരിയാര്‍ അണക്കെട്ടിലെ ജലനിരപ്പ് സംബന്ധിച്ച്‌ ഉടന്‍ തീരുമാനം എടുക്കണമെന്ന് സുപ്രീംകോടതി ആവശ്യപ്പെട്ടു. മേല്‍നോട്ട സിമിതി ഒന്നോ രണ്ടോ ദിവസത്തിനുള്ളില്‍ തീരുമാനം എടുക്കണമെന്നാണ് സുപ്രീം കോടതി നല്‍കിയിരിക്കുന്ന നിര്‍ദ്ദേശം. പ്രശ്‌നങ്ങള്‍ കേരളവും തമിഴ്‌നാടും ചര്‍ച്ച ചെയ്ത് തീരുമാനിച്ചാല്‍ കോടതിക്ക് ഇടപെടേണ്ട സാഹചര്യം തന്നെയില്ലെന്നും കോടതി വ്യക്തമാക്കി. കേരളം ചര്‍ച്ചയ്ക്ക് തയ്യാറാകണമെന്നും കോടതി ആവശ്യപ്പെട്ടു.

കേരളവുമായും മേല്‍നോട്ടസമിതിയുമായും ആലോചിക്കാമെന്ന് തമിഴ്‌നാട് കോടതിയെ അറിയിച്ചിട്ടുണ്ട്. കേസ് മറ്റന്നാളത്തേക്ക് മാറ്റിയിട്ടുണ്ട്. വിഷയത്തില്‍ മേല്‍നോട്ട സമിതി റിപ്പോര്‍ട്ട് നല്‍കിയിട്ടുണ്ടെന്ന് കേന്ദ്രസര്‍ക്കാര്‍ കോടതിയെ അറിയിച്ചിട്ടുണ്ട്. ഇന്ന് രാവിലെ 7 മണിക്ക് അണക്കെട്ടിലെ ജലനിരപ്പ് 137.2 അടിയാണെന്നും തമിഴ്‌നാട് കോടതിയില്‍ വ്യക്തമാക്കിയിട്ടുണ്ട്.

മുല്ലപ്പെരിയാര്‍ പരിസരത്ത് ആളുകള്‍ ഭീതിയോടെ കഴിയുകയാണെന്നും കേരളം കോടതിയെ അറിയിച്ചു.ഇതൊരു രാഷ്ട്രീയ വിഷയമാക്കി മാറ്റരുതെന്നും കോടതി അഭിപ്രായപ്പെട്ടു. എന്തായാലും കേരളത്തിലെ ജനങ്ങളുടെ ജീവന് ഭീഷണി ഉയര്‍ത്തുന്ന ഈ വിഷയം....എന്തായലും കോടതി നിര്‍ദ്ദേശ പ്രകാരം പ്രശ്‌നങ്ങള്‍ ഇരു സംസ്ഥാനങ്ങളും തമ്മില്‍ ചര്‍ച്ച ചെയ്ത് അതിവേഗം ഒരു അന്തിമ തീരുമാനത്തില്‍ എത്തുകയാണ് വേണ്ടത്.