ബന്ധു വീട്ടിൽ താമസിച്ച് കെട്ടിട നിർമ്മാണ മേഖലകൾ കേന്ദ്രീകരിച്ച് മൊബൈൽ ഫോൺ മോഷണം നടത്തുന്ന യുവാക്കൾ പിടിയിൽ. കോഴിക്കോട് സ്വദേശികളായ ഷിഹാബും അനസുമാണ് പാങ്ങോട് പോലീസിന്റെ പിടിയിലായത്.

കിളിമാനൂർ തട്ടത്ത് മലയിൽ ബന്ധു വീട്ടിൽ താമസിച്ച് മോഷണം നടത്തി വരികയായിരുന്നു ഇരുവരും.

കല്ലറ തെങ്ങുംകോട് ഭാഗങ്ങളിൽ കെട്ടിട നിർമ്മാണങ്ങൾ നടക്കുന്ന സ്ഥലങ്ങളിൽ നിന്ന് തൊഴിലാളികളുടെ മൊബൈൽ ഫോണുകൾ മോഷണം പോകുന്നതായി പോലീസിൽ പരാതി ലഭിച്ചിരുന്നു.

ഇതിന്റെ പശ്ചാത്തലത്തിൽ നടത്തിയ അന്വേഷണത്തിലാണ് ഇരുവരും പോലീസ് പിടിയിലായത്.

പ്രതികളുടെ വാഹനങ്ങളിൽ നിന്നും നിരവധി മൊബൈൽ ഫോണുകൾ പോലീസ് കണ്ടെടുത്തിട്ടുണ്ട്.

ഏകദേശം രണ്ടര ലക്ഷം രൂപ വിലവരുന്ന മൊബൈൽ ഫോണുകളാണ് പിടിച്ചെടുത്തത്. വിവിധ ജില്ലകളിൽ ഇവർ ഇത്തരത്തിൽ മോഷണം നടത്തിയിട്ടുണ്ട്.

അറസ്റ്റിലായ പ്രതികളെ നെടുമങ്ങാട് കോടതിയിൽ ഹാജരാക്കിയ ശേഷം റിമാൻഡ് ചെയ്തു.