സ്കൂട്ടറില് ചരക്ക് ലോറിയിടിച്ച് വീട്ടമ്മയ്ക്ക് ദാരുണാന്ത്യം, ഭര്ത്താവ് പരിക്കുകളോടെ ആശുപത്രിയില്
സ്കൂട്ടറില് ചരക്ക് ലോറിയിടിച്ച് വീട്ടമ്മയ്ക്ക് ദാരുണാന്ത്യം. മധ്യവയസ്കരായ ദമ്പതികള് സഞ്ചരിച്ച സ്കൂട്ടറിലാണ് ചരക്ക് ലോറിയിടിച്ചത്. സ്കൂട്ടര് ഓടിച്ചിരുന്ന ഭര്ത്താവിനെ പരിക്കുകളോടെ ആശുപത്രിയില് പ്രവേശിപ്പിച്ചു.
ആലുവ യു.സി കോളജ് കടൂപ്പാടം പുളിയത്ത് വാഴേലിപ്പറമ്പില് വീട്ടില് മുഹമ്മദലിയുടെ (റിട്ട. മൃഗസംരക്ഷണ വകുപ്പ്) ഭാര്യ ഖദീജ ബീവിയാണ് (58) ദാരുണമായി മരിച്ചത്.
സ്കൂട്ടര് ഓടിച്ചിരുന്ന മുഹമ്മദലിയെ (67) അങ്കമാലി എല്.എഫ് ആശുപത്രിയില് അഡ്മിറ്റാക്കി. ഭര്ത്താവിനൊപ്പം സ്കൂട്ടറില് കാലടിയിലെ മകളുടെ വീട്ടിലേക്കു പോകുമ്പോഴായിരുന്നു അപകടം നടന്നത്.
എയര്പോര്ട്ട് ജംഗ്ഷനിലെ സിഗ്നലില് റെഡ് ലൈറ്റ് കണ്ട് സ്കൂട്ടര് നിര്ത്തിയ ഉടനെ പിന്നില്നിന്നു വന്ന ലോറി ഇടിച്ചിടുകയായിരുന്നു. ഇടിയുടെ ആഘാതത്തില് സ്കൂട്ടറിന്റെ പിന്നില് നിന്നു റോഡിലേക്ക് തെറ്റിച്ചു വീണ ഖദീജാബീവിയുടെ ദേഹത്തുകൂടി ലോറി കയറിയിറങ്ങി.
അപകട സ്ഥലത്തു തന്നെ മരണം സംഭവിച്ചു. ദേശീയപാതയില്നിന്നു നെടുമ്പാശേരി അന്താരാഷ്ട്ര വിമാനത്താവളത്തിലേക്കു തിരിയുന്ന പ്രധാന ജംഗ്ഷനിലായിരുന്നു അപകടം. അടുത്തിടെയായി ഈ ഭാഗത്ത് അപകടങ്ങള് ആവര്ത്തിക്കുന്നതു പതിവായിരിക്കുകയാണ്.
https://www.facebook.com/Malayalivartha
