പത്തു കോടിയില്‍ പരം രൂപയുടെ കടമുള്ള കെ എസ് ആര്‍ ടി സി യില്‍ ജീവനക്കാര്‍ സമരം തുടര്‍ന്നാല്‍ സ്ഥാപനത്തിന്റെ ദൈനംദിന പ്രവര്‍ത്തനങ്ങളില്‍ നിന്നും സര്‍ക്കാര്‍ പിന്‍മാറും.

കെഎസ്ആര്‍ടിസി വന്‍ നഷ്ടം നേരിടുന്നതിനിടെ ശമ്പള പരിഷ്‌കരണത്തിനായി ചില തൊഴിലാളി സംഘടനകള്‍ പണിമുടക്കി സമ്മര്‍ദം ചെലുത്തുന്നതിലാണ് സര്‍ക്കാരിന് സഹികെട്ടത്. ശമ്പള പരിഷ്‌കരണത്തിന് അനുകൂല നിലപാടെടുത്തിട്ടും, ചര്‍ച്ചയ്ക്കായി സമയംപോലും കൊടുക്കാതെ സിപിഐ, ബിജെപി, കോണ്‍ഗ്രസ് സംഘടനകള്‍ പണിമുടക്കിലേക്കു കടന്നതിനെ ശക്തമായി നേരിടാനാണ് സര്‍ക്കാര്‍ തീരുമാനം.

ഇടതു മുന്നണിയുടെ ഭാഗമായ സി പി ഐ കൂടി സമരത്തിനിറങ്ങിയതാണ് സര്‍ക്കാരിനെ ചൊടിപ്പിച്ചത്. സി പി ഐ കാണിക്കുന്നത് വൃത്തികെട്ട രാഷ്ട്രീയമാണെന്നാണ് സര്‍ക്കാര്‍ കരുതുന്നത്.

കോണ്‍ഗ്രസിനും ബി ജെ പിക്കുമൊപ്പം സി പി ഐ സമരത്തിനിറങ്ങിയതില്‍ മുഖ്യമന്ത്രിയും മന്ത്രിമാരും അസ്വസ്ഥരാണ്. കെ എസ് ആര്‍ ടി  സി ജീവനക്കാരുടെ സംഘടനയുടെ തീരുമാനമാണെന്ന് പറയുന്നുണ്ടെങ്കിലും സമരത്തില്‍ നിന്നും ജീവനക്കാരെ സി പി ഐ വിലക്കാത്തതില്‍ സി പി എം അസ്വസ്ഥരാണ്.

കാനത്തെ പോലുള്ള നേതാക്കള്‍ സി പി ഐ സമരത്തിനെതിരെ സംസാരിക്കാത്തതിലും സി പി എമ്മിന് അമര്‍ഷമുണ്ട്.

കോവിഡ് കാലത്ത് ജോലിയില്ലാത്തപ്പോള്‍ പോലും കൃത്യമായി ശമ്പളം അനുവദിച്ചിട്ടും സ്ഥാപനത്തെ പ്രതിസന്ധിയിലാക്കുന്ന നിലപാട് അംഗീകരിക്കാനാകില്ലെന്ന നിലപാടിലാണ് സര്‍ക്കാര്‍. കണ്‍സോര്‍ഷ്യം വായ്പയായി 3,163.63 കോടി രൂപയും ജീവനക്കാര്‍ക്കു നല്‍കാനുള്ള കുടിശികയായി 212.54 കോടി രൂപയും വിവിധ കമ്പനികള്‍, കരാറുകാര്‍, എണ്ണക്കമ്പനികള്‍ തുടങ്ങിയവയ്ക്ക് 639.96 കോടി രൂപയും സര്‍ക്കാര്‍ വായ്പയായി 6,496.13 കോടി രൂപയും ഉള്‍പ്പെടെ സ്ഥാപനത്തിന്റെ കടം 10,512.26 കോടി രൂപയാണ്.

കെഎസ്ആര്‍ടിസി ഭരണസമിതി അംഗീകരിച്ച 'ബസ് ജീവനക്കാര്‍ അനുപാതം' അനുസരിച്ച് 1483 കണ്ടക്ടര്‍മാരും 2024 ഡ്രൈവര്‍മാരും, 2410 മെക്കാനിക്കുകളും അധികമാണ്. 4250 ബസിന് 20,468 ജീവനക്കാര്‍ മതി. 26,000 ജീവനക്കാരാണ് ആകെയുള്ളത്. 2020 മാര്‍ച്ച് മുതല്‍ പൂര്‍ണമായും സര്‍ക്കാര്‍ നല്‍കുന്ന സാമ്പത്തിക സഹായത്തിലാണ് കെഎസ്ആര്‍ടിസി പ്രവര്‍ത്തിക്കുന്നത്. സര്‍വീസുകള്‍ ഇടയ്ക്കു പൂര്‍ണമായി മുടങ്ങിയിട്ടും പിന്നീടു സര്‍വീസുകള്‍ വെട്ടിക്കുറച്ചിട്ടും ശമ്പളം മുടങ്ങാന്‍ സര്‍ക്കാര്‍ അനുവദിച്ചില്ല..

ജീവനക്കാര്‍ക്ക് ഒരു മാസം ശമ്പളം നല്‍കാന്‍ 84 കോടി രൂപ വേണം. 1,500 രൂപ ഇടക്കാല ആശ്വാസവും ഇതില്‍പ്പെടുന്നു. ശമ്പളവും ഇടക്കാല ആശ്വാസവും കോവിഡിന്റെ ആദ്യ വ്യാപന ഘട്ടത്തില്‍ ജീവനക്കാരുടെ ശമ്പളത്തില്‍നിന്നു പിടിച്ച തുകയും ഉള്‍പ്പെടെ 2020 മാര്‍ച്ച് മുതല്‍ 2021 സെപ്റ്റംബര്‍ വരെ 1,460.96 കോടി രൂപ സര്‍ക്കാര്‍ നല്‍കി. ശമ്പളവും പെന്‍ഷനും നല്‍കാന്‍ 5 വര്‍ഷം ചെലവഴിച്ചത് 4,630 കോടി രൂപയാണ്. എന്നിട്ടും ജീവനക്കാര്‍ സര്‍ക്കാരിനെതിരെ തിരിഞ്ഞതാണ് സര്‍ക്കാരിനെ പ്രകോപിപ്പിച്ചത്.

ഇത്തരം സന്ദര്‍ഭങ്ങളില്‍ കേന്ദ്ര സര്‍ക്കാരിന്റെ നയങ്ങളാണ് നല്ലതെന്നാണ് സംസ്ഥാന സര്‍ക്കാര്‍ കരുതുന്നത്. കെ എസ് ആര്‍ ടി  സിയുടെ പ്രവര്‍ത്തനങ്ങള്‍ക്ക് വേണ്ടി സര്‍ക്കാരിന്റെ സഞ്ചിത നിധിയില്‍ നിന്ന് തുക നല്‍കാന്‍ കഴിയില്ലെന്നാണ് സര്‍ക്കാരിന്റെ പുതിയ നിലപാട്. ധന മന്ത്രി കെ എന്‍ .ബാലഗോപാല്‍ ഏറെ നാളായി ഇക്കാര്യത്തില്‍ ഉറച്ചു നില്‍ക്കുകയാണ്.

കെ എസ് ആര്‍ ടി സിയെ അവശ്യ സര്‍വീസാക്കുന്നത് ഇതിന്റെ ഭാഗമാണ്. രണ്ടു ദിവസത്തിനുള്ളില്‍ ഇതില്‍ തീരുമാനമെടുക്കുമെന്ന് തന്നെയാണ് റിപ്പോര്‍ട്ട്. അവശ്യ സര്‍വീസ് സംവിധാനം നിലവില്‍ വന്നാല്‍ സമരം ചെയ്യുന്ന ജീവനക്കാരുടെ പണി പോകുമെന്ന് ചുരുക്കം.