സ്വര്‍ണക്കടത്ത് കേസില്‍ ജാമ്യം ലഭിച്ച സ്വപ്ന സുരേഷ് പുറത്തിറങ്ങി, ഒരു വര്‍ഷത്തിനു ശേഷം ജയിലിനു പുറത്തേക്ക്, മോചനം ആറു കേസുകളിലും ജാമ്യം കിട്ടിയതോടെ, അമ്മയുടെ കൈപിടിച്ചാണ് ജയിലില്‍ നിന്ന് ഇറങ്ങിയത്. കാത്തു നിന്ന മാധ്യമ പടയ്ക്ക് മുന്നിലൂടെ ഒന്നും മിണ്ടാതെ നടന്ന് കാറിലേക്ക് കയറി;

ഇന്ന് രാവിലെ 11.30-ഓടെയാണ് അട്ടക്കുളങ്ങര വനിതാ ജയിലില്‍നിന്ന് സ്വപ്ന പുറത്തിറങ്ങിയത്. ജയിലിന് മുന്നില്‍ തടിച്ചുകൂടിയ മാധ്യമപ്രവര്‍ത്തകര്‍ എന്തെങ്കിലും പറയാനുണ്ടോ എന്ന് ചോദിച്ചെങ്കിലും സ്വപ്ന ഒന്നും പ്രതികരിച്ചില്ല.

ഇന്ന് രാവിലെ അമ്മ പ്രഭ സുരേഷ് ജയിലിലെത്തിയാണ് ജാമ്യനടപടികള്‍ പൂര്‍ത്തീകരിച്ചത്. ജയില്‍ മോചിതയായാല്‍ മകള്‍ മാധ്യമങ്ങളെ കാണുമെന്ന് പ്രഭ സുരേഷ് രാവിലെ പ്രതികരിച്ചിരുന്നു. തുടര്‍ന്ന് ഒരുമണിക്കൂറോളം കഴിഞ്ഞ് പ്രഭ സുരേഷിനൊപ്പം സ്വപ്ന ജയിലിന് പുറത്തേക്ക് വന്നെങ്കിലും ഒന്നും പ്രതികരിക്കാന്‍ തയ്യാറായില്ല.

അമ്മയുടെ കൈപിടിച്ചാണ് സ്വപ്ന ജയില്‍ വളപ്പിന് പുറത്തേക്ക് വന്നത്. ഇരുവരും ബാലരാമപുരത്തുള്ള വീട്ടിലേക്കാണ് പോകുന്നതെന്നാണ് സൂചന. ഒരുപക്ഷേ, വീട്ടിലെത്തിയാല്‍ സ്വപ്ന മാധ്യമങ്ങളെ കാണാനുള്ള സാധ്യതയുണ്ട്.



ജാമ്യം ലഭിച്ച നാല് ദിവസം കഴിഞ്ഞെങ്കിലും ജാമ്യ നടപടികള്‍ പൂര്‍ത്തിയാകാത്തതായിരുന്നു മോചനം വൈകിയത്. ഇന്നലെ വൈകിട്ടോടെ കോടതി നടപടികളെല്ലാം പൂര്‍ത്തിയായി. അറസ്റ്റിലായി ഒരു വര്‍ഷവും മൂന്ന് മാസവും പിന്നിടുമ്പോഴാണ് സ്വപ്നയ്ക്ക് ജാമ്യം ലഭിക്കുന്നത്.

അതേസമയം സ്വപ്നയുടെ ജാമ്യ ഉപാധികള്‍ വെള്ളിയാഴ്ച വൈകിട്ടോടെ കോടതിയില്‍ സമര്‍പ്പിച്ചിരുന്നു. സ്വര്‍ണ്ണക്കടത്ത് അടക്കമുള്ള ആറ് കേസുകളിലും സ്വപ്ന സുരേഷിന് നേരത്തെ ജാമ്യം ലഭിച്ചിരുന്നു. ഈ മാസം രണ്ടിനാണ് നയതന്ത്ര സ്വര്‍ണക്കടത്തിലെ എന്‍ ഐ എ കേസില്‍ ഹൈക്കോടതി സ്വപ്നയ്ക്ക് ജാമ്യം അനുവദിച്ചത്.

25 ലക്ഷം രൂപയുടെ ബോണ്ടും തുല്യ തുകയ്ക്കുള്ള രണ്ട് ആള്‍ജാമ്യവും അടക്കമുള്ള രേഖകളാണ് ഹാജരാക്കേണ്ടിയിരുന്നത്. അതേസമയം സ്വര്‍ണക്കടത്ത്, ഡോളര്‍ കടത്ത്, വ്യാജരേഖ ചമയ്ക്കല്‍ തുടങ്ങി 6 കേസുകളിലും കോടതി ഇവര്‍ക്കു ജാമ്യം അനുവദിച്ചിരുന്നു. ഹൈക്കോടതി കര്‍ശന വ്യവസ്ഥകളോടെയാണ് എന്‍ഐഎ കേസില്‍ ജാമ്യം നല്‍കിയത്.

അട്ടക്കുളങ്ങര വനിതാ ജയിലിലാണ് സ്വപ്നയെ പാര്‍പ്പിച്ചിരുന്നത്. 2020 ജൂലൈ 11നാണ് അറസ്റ്റിലായത്. അറസ്റ്റിലായി ഒരു വര്‍ഷവും മൂന്ന് മാസവും പിന്നിടുമ്പോഴാണ് സ്വപ്ന ജയില്‍ മോചിതയായത്.