കൊട്ടാരക്കരയില്‍ തടി കയറ്റിവന്ന ലോറിയിടിച്ചു ബൈക്ക് യാത്രികനായിരുന്ന യുവാവിന് ദാരുണാന്ത്യം. തേവലപ്പുറം കിഴക്ക് ബിനു ഭവനില്‍ (പൂച്ചെടി വിള) പരേതരായ തങ്കച്ചന്റെയും ഓമനയുടെയും മകന്‍ ബിനു (33) ആണ് ദാരുണമായി മരിച്ചത്.

പുത്തൂരിലെ പെട്രോള്‍ പമ്പു ജീവനക്കാരനായിരുന്നു. പമ്പടച്ച ശേഷം വീട്ടിലേക്കു പോകും വഴിയാണ് അപകടമുണ്ടായത് . ഇന്നലെ രാത്രി പത്തോടെ പുത്തൂര്‍ -കൊട്ടാരക്കര റോഡില്‍ ചുങ്കത്തറ കല്ലും മൂടിന് സമീപമായിരുന്നു അപകടം നടന്നത്.

കൊട്ടാരക്കര ഭാഗത്തേക്കു പോവുകയായിരുന്ന ബൈക്കില്‍ എതിര്‍ദിശയില്‍ വന്ന ലോറി ഇടിക്കുകയായിരുന്നു. റോഡില്‍ തെറിച്ചുവീണ ബിനുവിന്റെ ശരീരത്തില്‍ തടി ലോറി കയറിയിറങ്ങി് തല്‍ക്ഷണം മരിച്ചു.

കൊട്ടാരക്കര താലൂക്കാശുപത്രിയിലേക്കു മാറ്റിയ മൃതദേഹം ഇന്നു പോസ്റ്റുമോര്‍ട്ടം നടത്തിയ ശേഷം ബന്ധുക്കള്‍ക്കു കൈമാറും. കേസെടുത്ത് പുത്തൂര്‍ പോലീസ് .