ഡെപ്യൂട്ടി സ്പീക്കര് ചിറ്റയം സിനിമയിലേക്ക്; എന്തായാലും കേരള നിയമസഭ നടീനടന്മാരെക്കൊണ്ടു നിറയുകയാണ്, മുകേഷും ഗണേഷ്കുമാറും ഉള്പ്പെടെ ഒരു നിര നടന്മാര് ഇടതുപക്ഷത്ത് കളം വാഴുന്നതിനിടെയിൽ സിപിഐക്കാരന് ചിറ്റയം ഗോപകുമാര് അഭ്രപാളിയില് തകര്ക്കാന് പോകുന്നു
മുഖ്യമന്ത്രി പിണറായി വിജയന് വില്ലന് റോളില് സിനിമയില് അഭിനയിക്കുന്ന കാലം എന്നുവരും എന്നേ അറിയേണ്ടതുള്ളു. എന്തായാലും കേരള നിയമസഭ നടീനടന്മാരെക്കൊണ്ടു നിറയുകയാണ്. ഡെപ്യൂട്ടി സ്പീക്കര് ചിറ്റയം ഗോപകുമാറാണ് അടുത്തതായി അഭിനയരംഗത്തേക്ക് കടക്കുന്നത്. നിലവില് മുകേഷും ഗണേഷ്കുമാറും ഉള്പ്പെടെ ഒരു നിര നടന്മാര് ഇടതുപക്ഷത്ത് കളം വാഴുന്നതിനിടെയിലാണ് സിപിഐക്കാരന് ചിറ്റയം ഗോപകുമാര് അഭ്രപാളിയില് തകര്ക്കാന് പോകുന്നത്.
പ്രേംനസീര് സുഹൃത്ത് സമിതി നിര്മിക്കുന്ന ഒരു മണിക്കൂര് ദൈര്ഘ്യമുള്ള 'സമാന്തരപ്പക്ഷികള്' എന്ന ഷോര്ട്ട് മൂവിയില് കളക്ടറുടെ വേഷമാണ് ചിറ്റയയത്തിന് ലഭിക്കുന്നത്. കഥയും തിരക്കഥയും സംഭാഷണവും രചിച്ചിരിക്കുന്നത് നടന് കൊല്ലം തുളസിയാണ്.
സംവിധാനം ജഹാംഗീര് ഉമ്മര്.കൊല്ലം തുളസി, എം.ആര്.ഗോപകുമാര്, വഞ്ചിയൂര് പ്രവീണ് കുമാര്, റിയാസ് നെടുമങ്ങാട്, മോഹന് കുമാര്, സുനില് നാരായണന്, വിങ്കി, ആരോമല്, ശ്രീപദ്മം, കാലടി ഓമന, ശുഭ തലശ്ശേരി, സൂര്യകിരണ്, മഞ്ചു, റുക്സാന എന്നിവരാണ് ചിറ്റയത്തിനൊപ്പമുള്ള മറ്റ് നടീനടന്മാര്. പ്രഭാവര്മയുടെ ഗാനത്തിന് ഡോ. വാഴമുട്ടം ചന്ദ്രബാബു സംഗീതം നല്കിയിരിക്കെ പടം ആകെ ഇടതുമയമാണെന്ന് പറയേണ്ടതില്ല. ഇന്ത്യന് പാര്ലമെന്റിലും നിയമസഭകളിലും നടീനടന്മാര് ഒരു പാടുവാഴുമ്പോള് ചിറ്റയത്തിനും ഒരു വട്ടം പരീക്ഷിക്കാവുന്നതേയുള്ളു. പ്രേം നസീറില് തുടങ്ങി കേരള രാഷ്ട്രീയം ഇത്തരത്തില് സിനിമാ പരീക്ഷണത്തിലൂടെ കടന്നുപോവുകയാണ്.
നിലവിലെ മന്ത്രിമാരില് വിഎന് വാസവന്വരെ ഒന്നു രണ്ടു പടങ്ങളില് തലകാണിച്ചവരാണ്. മുരളി, കെപിഎസി ലളിത, സുരേഷ് ഗോപി, കൊല്ലം തുളസി, ഭീമന് രഘു, പന്തളം സുധാകരന്, ജഗദീഷ് തുടങ്ങി ഏറെ പേരെ സിനിമയിലും രാഷ്ട്രീയത്തിലും മലയാളികള് കണ്ടതാണ്. തമിഴ് നാടും ആന്ധ്രയുമൊക്കെ ഏറെക്കാലും സിനിമക്കാര് ഭരക്കുകയും ചെയ്താണ്. ജയലളിതയും എന്ടി രാമറാവുവും കരുണാനിധിയുമൊക്കെ രാഷ്ട്രീയത്തില് കാലങ്ങളോളം പയറ്റിത്തെളിഞ്ഞവരാണ്. അമിതാബ് ബച്ചന് മുതല് ഖുശ്ബു വരെ ഇന്ത്യന് രാഷ്ട്രീയത്തില് പയറ്റിയവരുമാണ്.
സാഹിത്യത്തില് നിന്നും ഒഎന്വിയും എംകെ സാനുവും എസ് കെ പൊറ്റക്കാടും സുകുമാര് അഴീക്കോടുമൊക്കെ രാഷ്ട്രീയത്തിലും പയറ്റിനോക്കി. ദലീമയെപ്പോലുള്ള ഗായികമാരും പിജെ ജോസഫിനെപ്പോലുള്ള ഗായകരും നിയമഭയില് ഇടംപിടിച്ചിട്ടുണ്ട്. കേരള നിയമസഭയില് നിന്നും ഇനിയും ഒരു നിര പേര് കൂടി അഭിനയത്തിലേക്ക് കടന്നുവരാന് നീക്കം നടക്കുന്നതായാണ് സൂചന.
https://www.facebook.com/Malayalivartha
