ഇത് താക്കീത്...... സംസ്ഥാനത്ത് കെ.എസ്.ആര്‍.ടി.സി. ജീവനക്കാരുടെ പണിമുടക്ക് അവസാനിച്ചു.... 2016 ല്‍ കാലാവധി അവസാനിച്ച ശമ്പള പരിഷ്‌കരണ കരാര്‍ പുതുക്കാന്‍ സര്‍ക്കാര്‍ തയ്യാറായില്ലെങ്കില്‍ അനിശ്ചിതകാല സമരത്തിലേക്ക് പോകേണ്ടി വരുമെന്ന് മുന്നറിയിപ്പുമായി തൊഴിലാളി യൂണിയനുകള്‍.

സര്‍ക്കാര്‍ ഡയസ്നോണ്‍ പ്രഖ്യാപിച്ചെങ്കിലും ആ ഉത്തരവെല്ലാം തള്ളികൊണ്ടാണ് ഭൂരിഭാഗം ജീവനക്കാരും ഇന്നലെ പണിമുടക്കില്‍ പങ്കെടുത്തത്. ശരാശരി 3600 സര്‍വീസുകളുള്ള കെ.എസ്.ആര്‍.ടി.സിക്ക് ഇന്നലെ നിരത്തിലിറക്കാനായത് 268 ബസുകള്‍ മാത്രമാണ്.

പണിമുടക്ക് കാരണം ഏറ്റവും അധികം ബുദ്ധിമുട്ടിയത് ഓഫീസ് ജീവനക്കാരും തൊഴിലാളികളുമാണ്. ഇന്നലെ ഫാസ്റ്റ് പാസഞ്ചര്‍ ബസുകളാണ് കൂടുതല്‍ സര്‍വീസ് നടത്തിയത്. സര്‍വീസ് നടത്തിയ ബസുകള്‍ക്ക് സംരക്ഷണമൊരുക്കാന്‍ പൊലീസിനെയും നിയോഗിച്ചിരുന്നു.

ഭൂരിഭാഗം ജീവനക്കാരും പണിമുടക്കിനെ പിന്തുണച്ചതോടെ 93 ശതമാനം സര്‍വീസുകളും മുടങ്ങി. ശമ്പള പരിഷ്‌കരണം അനന്തമായി നീളുന്നതിനെതിരായ പണിമുടക്ക് രണ്ടാം ദിവസവും തുടര്‍ന്നത് അംഗീകൃത യൂണിയനായ ടി.ഡി.എഫ്. മാത്രമായിരുന്നു.

എ.ഐ.ടി.യു.സി. യൂണിയനും പിന്തുണച്ചു. സി.ഐ.ടി.യു, ബി.എം.എസ്. യൂണിയനുകളുടെ പണിമുടക്ക് നടത്തിയിരുന്നു. ശമ്പള പരിഷ്‌കരണം പ്രതിമാസം 30 കോടിയോളം അധിക ബാധ്യതയുണ്ടാക്കുമെന്നും സാവകാശം വേണമെന്നും ഗതാഗത മന്ത്രി പറഞ്ഞു.