വേലിയേറ്റ സമയത്ത് ഫോർട്ട്കൊച്ചി ബീച്ചിൽ ഉയർന്നുവന്ന പുതിയ തീരത്ത് എത്തുന്നവർക്ക് മുന്നറിയിപ്പുമായി ലൈഫ് ഗാർഡുമാർ. മധ്യ ബീച്ചിലെ പുലിമുട്ടിന് സമീപം കടലിലേക്ക് 50 മീറ്ററോളം നീളത്തിൽ മണ്ണ് അടിഞ്ഞാണ് പുതിയ തീരം രൂപപ്പെട്ടത്. മുനമ്പു പോലെ തോന്നിക്കുന്ന പുതിയ തീരം ബീച്ചിൽ എത്തുന്നവരെ ആകർഷിക്കുമ്പോൾ ഇവിടേയ്ക്ക് ഇറങ്ങുന്നത് ലൈഫ് ഗാർഡുമാർ കർശനമായി വിലക്കുന്നു.

നടപ്പാതയോടു ചേർന്നുള്ള കരിങ്കൽ കെട്ടുകളിൽ ചവിട്ടുന്നതു സൂക്ഷിച്ചു വേണമെന്ന് ലൈഫ് ഗാർഡുമാർ പറയുന്നു. കല്ലുകൾക്കിടയിൽ കടൽ പാമ്പും അണലിയും ഉണ്ടാകാം. കടപ്പുറത്ത് അടിയുന്ന പായലിന് ഒപ്പമാണു പാമ്പുകൾ എത്തുന്നത്. ഇടയ്ക്ക് ബീച്ചുകളിൽ നിന്ന് മലമ്പാമ്പിനെയും പിടികൂടാറുണ്ടെന്ന് ഇവർ പറയുന്നു.

കഴിഞ്ഞ ദിവസം ഫുഡ് കോർട്ടിനു സമീപം കച്ചവടക്കാരും ഗാർഡുകളും ചേർന്ന് പിടിച്ചത് മൂന്ന് പാമ്പുകളെയായിരുന്നു. ഇരുവശവും താഴ്ചയുള്ളതിനാൽ അപകടകരമാണ് ഈ മണ്ണിലൂടെ നടക്കുന്നത് അപകടമാണെന്ന് അവർ പറയുന്നു.