തീര്‍ത്ഥാടനകാലം ആരംഭിക്കുന്നതിനു മുമ്പേ ശബരിമലയില്‍ മകരവിളക്കു ദര്‍ശനത്തിനുള്ള ബുക്കിങ് പൂര്‍ത്തിയായി.... പുതുവത്സര ദിനത്തിലെ ദര്‍ശനത്തിനുള്ള ബുക്കിങ്ങും അവസാനിച്ചു, ബുക്ക് ചെയ്തവര്‍ ആരെങ്കിലും വരാതിരുന്നാല്‍ ഈ ദിവസങ്ങളില്‍ സ്‌പോട്ട് ബുക്കിങ് വഴി പ്രവേശനം ഉണ്ടായിരിക്കും.
ജനുവരി 14 നാണു മകരവിളക്ക്. അന്നത്തെ 30,000 പേര്‍ക്കുള്ള ബുക്കിങ് ഇന്നലെ പൂര്‍ത്തിയായി. നിലയ്ക്കല്‍, എരുമേലി, കുമളി എന്നിവിടങ്ങളില്‍ സ്‌പോട് ബുക്കിങ് കേന്ദ്രങ്ങള്‍ ഉണ്ടായിരിക്കും.

നിലയ്ക്കലിലെ സ്‌പോട് ബുക്കിങ് കേന്ദ്രം 15ന് ഉദ്ഘാടനം ചെയ്യും. ദിവസം 30,000 പേര്‍ക്കാണ് ബുക്കിങ് വഴി പ്രവേശനം നല്‍കുന്നതെന്ന് ദേവസ്വം ബോര്‍ഡ് പ്രസിഡന്റ് എന്‍. വാസു പറഞ്ഞു.

മണ്ഡല മകരവിളക്ക് കാലത്തെ ബുക്കിങ് ഇതിനകം 12 ലക്ഷം കവിഞ്ഞു. ആകെ 18 ലക്ഷം പേര്‍ക്കു ദര്‍ശനം നല്‍കാനാകുമെന്നാണ് കണക്കു കൂട്ടല്‍.

മാത്രവുമല്ല ഗള്‍ഫില്‍ നിന്ന് എത്തുന്നവര്‍ സ്‌പോട് ബുക്കിങ്ങിനു പാസ്‌പോര്‍ട്ട് ഹാജരാക്കിയാല്‍ മതി. മറ്റുള്ളവര്‍ ആധാര്‍ കാര്‍ഡും വോട്ടര്‍ ഐഡിയും നല്‍കണം. വെര്‍ച്വല്‍ ക്യു വഴി ബുക്കിങ് നടത്തിയവര്‍ക്കുള്ള വെരിഫിക്കേഷന്‍ കൗണ്ടര്‍ പമ്പാ ഗണപതി കോവിലിനു അടുത്തായി പ്രവര്‍ത്തനം തുടങ്ങി.

അതേസമയം 10 വയസിന് താഴെയും 65 വയസിന് മുകളിലുമുള്ള തീര്‍ഥാടകര്‍ക്കും പ്രവേശനം അനുവദിക്കും. രണ്ട് ഡോസ് കോവിഡ് വാക്സിന്‍ എടുത്തവര്‍ അല്ലെങ്കില്‍ ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് ഹാജരാക്കുന്നവര്‍ക്കാണ് പ്രവേശനം നല്‍കുക. അഭിഷേകം ചെയ്ത നെയ്യ് എല്ലാവര്‍ക്കും കൊടുക്കുന്നതിന് ദേവസ്വം ബോര്‍ഡ് സംവിധാനമൊരുക്കും.ദര്‍ശനം കഴിഞ്ഞ് സന്നിധാനത്ത് തങ്ങാന്‍ അനുവദിക്കില്ല. ഇക്കാര്യത്തില്‍ കഴിഞ്ഞ വര്‍ഷത്തെ നില തുടരും.

എരുമേലി വഴിയുള്ള കാനനപാത,പുല്‍മേട് വഴി സന്നിധാനത്ത് എത്തുന്ന പരമ്പരാഗത പാത എന്നിവയിലൂടെ തീര്‍ത്ഥാടകരെ അനുവദിക്കില്ല.പമ്പയില്‍ സ്‌നാനത്തിന് അനുമതി നല്‍കും. വാഹനങ്ങള്‍ നിലക്കല്‍ വരെ മാത്രമേ അനുവദിക്കുകയുള്ളൂ. അവിടെ നിന്ന് പമ്പ വരെ കെഎസ്ആര്‍ടിസി ബസുകള്‍ ഉപയോഗിക്കണം.