മുല്ലപ്പെരിയാര് വിഷയത്തില് സര്ക്കാര് നാടകം കളിച്ച് ജനങ്ങളെ വഞ്ചിക്കുകയാണ്; ബേബി ഡാമിലെ മരം മുറിക്കാനുള്ള ഉത്തരവ് നല്കിയത് ഉദ്യോഗസ്ഥരാണെന്ന് വരുത്തിതീര്ക്കുകയാണ്; സര്ക്കാര് അറിയാതെ ഇത്തരത്തില് പ്രവൃത്തിക്കാന് ഉദ്യോഗസ്ഥന്മാര്ക്ക് സാധിക്കുന്നുണ്ടെങ്കില് പിണറായി വിജയന് രാജിവെച്ച് വാനപ്രസ്ഥത്തിന് പോവുന്നതാണ് നല്ലതെന്ന് കെ. സുരേന്ദ്രന്
മുല്ലപ്പെരിയാര് ബേബി ഡാമിലെ മരം മുറിക്കാന് തമിഴ്നാട് സര്ക്കാരിന് കേരളസര്ക്കാര് നല്കിയ അനുമതി മരവിപ്പിച്ചിരിക്കുകയാണ്. സര്ക്കാരിന്റെ ഈ നടപടി പിടിക്കപ്പെട്ടപ്പോള് തൊണ്ടി മുതല് തിരിച്ചുനല്കിയ കള്ളനെ പോലെയാണെന്ന് ബി.ജെ.പി സംസ്ഥാന അധ്യക്ഷന് കെ.സുരേന്ദ്രന്. മുഖ്യമന്ത്രി അറിയാതെ മരം മുറിക്കാനുള്ള അനുമതി തമിഴ്നാടിന് കൊടുക്കാന് ഉദ്യോഗസ്ഥന്മാര്ക്ക് കഴിയില്ല. സര്ക്കാര് നാടകം കളിച്ച് ജനങ്ങളെ വഞ്ചിക്കുകയാണ്. സംസ്ഥാനത്തിന്റെ താത്പര്യത്തിന് വിരുദ്ധമായ ഉത്തരവ് സര്ക്കാര് അറിയാതെ ഇറക്കാന് ഉദ്യോഗസ്ഥന്മാര്ക്ക് സാധിക്കുന്നുണ്ടെങ്കില് പിണറായി വിജയന് രാജിവെച്ച് വാനപ്രസ്ഥത്തിന് പോവുന്നതാണ് നല്ലത്.
ഉദ്യോഗസ്ഥന്മാരാണ് ഉത്തരവിന് പിന്നിലെങ്കില് അവര്ക്കെതിരെ നടപടിയെടുക്കാന് സര്ക്കാര് തയാറാവണം. കേരളത്തിലെ ജനങ്ങളെ മറന്നാണ് സര്ക്കാര് ഈ ഉത്തരവ് ഇറക്കിയത്. നാടിനോട് ചെയ്ത ഏറ്റവും വലിയ ചതിയാണിത്. തമിഴ്നാട് മുഖ്യമന്ത്രി സ്റ്റാലിന് പിണറായി വിജയന് കത്തയച്ചത് രണ്ടുപേരും അറിഞ്ഞുള്ള നാടകമാണ് ഇതെന്നതിന്റെ തെളിവാണ്. വനംമന്ത്രി അറിയാതെയാണ് ഇതൊക്കെ നടന്നതെന്ന് വിശ്വസിക്കാന് അരിയാഹാരം കഴിക്കുന്നവര്ക്കാവില്ല. മുഖ്യമന്ത്രിയും വനമന്ത്രിയും ഉരുണ്ടുകളിക്കുകയാണ്. ഉദ്യേഗസ്ഥരുടെ തലയില് കെട്ടിവെച്ച് രക്ഷപ്പെടാനുള്ള ശ്രമമാണ് സര്ക്കാര് നടത്തുന്നത്.
മുല്ലപ്പെരിയാര് കേസില് കേരളത്തിന് തിരിച്ചടിയാവുന്ന ഉത്തരവ് ഇറക്കിയതിന് പിന്നില് വന്ഗൂഢാലോചനയുണ്ട്. ഇതിനെ കുറിച്ച് അന്വേഷണം വേണമെന്നും സുരേന്ദ്രന് ആവശ്യപ്പെട്ടു. അതേസമയം ഉദ്യോഗസ്ഥരുടെ ഭാഗത്ത് നിന്നുമുണ്ടായത് ഗുരുതര വീഴ്ചയാണെന്നും കര്ശന നടപടി സ്വീകരിക്കുമെന്നും വനംവകുപ്പ് മന്ത്രി എകെ ശശീന്ദ്രന് വാര്ത്താ സമ്മേളനത്തില് അറിയിച്ചു. മരം മുറി ഉത്തരവിനെ കുറിച്ച് വാര്ത്തകള് വന്നതോടെ മുഖ്യമന്ത്രിയുമായി ചര്ച്ച നടത്തിയെന്നും വിവാദ ഉത്തരവിട്ട ഉദ്യോഗസ്ഥര്ക്കെതിരെ കര്ശന നടപടി സ്വീകരിക്കാന് മുഖ്യമന്ത്രി തന്നോട് ആവശ്യപ്പെട്ടതായും വനം മന്ത്രി അറിയിച്ചു.
ബേബി ഡാമില് 15 മരങ്ങള് മുറിക്കാന് അനുമതി നല്കിയതില് പിണറായി വിജയന് നന്ദി അറിയിച്ച സ്റ്റാലിന്റെ കത്ത് വന്നതോടെയാണ് മന്ത്രിമാര് മരം മുറി അറിഞ്ഞതെന്നാണ് പറയുന്നത്. പി.സി.സി.എഫ് ബെന്നിച്ചന് തോമസാണ് മരം മുറിക്കാനുള്ള ഉത്തരവ് പുറപ്പെടുവിച്ചത്. അഡീഷണല് ചീഫ് സെക്രട്ടറി ടി.കെ ജോസിനും പകര്പ്പ് നല്കിയിട്ടുണ്ട്. എന്നാല് ഇത്രയും സെന്സിറ്റിവായ പ്രശ്നത്തില് ഒരു ഉദ്യോഗസ്ഥനുമാത്രം എങ്ങിനെ ഉത്തരവിടാന് പറ്റും എന്നാണ് ആലോചിക്കുന്നത്. പ്രതിപക്ഷവും ഉത്തരവിനെതിരെ രംഗത്തെത്തിയിട്ടുണ്ട്. മുഖ്യമന്ത്രി പരസ്യമായി മാപ്പ് പറയണമെന്ന് കെ.പി.സി.സി അധ്യക്ഷന് കെ.സുധാകരന് ആവശ്യപ്പെട്ടു.
https://www.facebook.com/Malayalivartha
