ജലനിരപ്പ് പരമാവധി സംഭരണശേഷിയിലെത്തിയതോടെ ഇടുക്കി ജലസംഭരണിയുടെ ഭാഗമായ ചെറുതോണി അണക്കെട്ട് തുറന്നു. രാവിലെ പത്തു മണിയോടെ മൂന്നാമത്തെ ഷട്ടർ 40സെന്റി മീറ്ററാണ് ഉയർത്തിയത്. 40000 ലിറ്റർ വെള്ളമാണ് സെക്കന്റിൽ പുറത്തേക്ക് ഒഴുക്കുന്നത്. എന്നാലിപ്പോഴിതാ പാലക്കാടു നിന്നും മറ്റൊരു വാർത്തയാണ് പുറത്ത് വരുന്നത്. ഒരു മുന്നറിയിപ്പുമില്ലാതെ ആളിയാർ ഡാം തുറന്നുവിട്ടു.

അണക്കെട്ട് തുറക്കുന്ന വിവരം നേരത്തെ കേരള ജലവിഭവ വകുപ്പിനെയും പൊലീസിനെയും അറിയിച്ചിരുന്നെന്നാണ് തമിഴ്നാട് നൽകുന്ന വിശദീകരണം.

അണക്കെട്ട് തുറക്കുന്ന വിവരം പൊതുജനത്തെ അറിയിക്കേണ്ടത് ദുരന്തനിവാരണ അതോറിട്ടിയാണെന്ന് ജലവിഭവ വകുപ്പ് വ്യക്തമാക്കി. പാലക്കാട്ടെ പുഴകളിൽ കുത്തൊഴുക്കാണ്.

ചിറ്റൂർ പുഴ നിറഞ്ഞൊഴുകുകയാണ്.യാക്കരപ്പുഴയിലേക്ക് കൂടുതൽ വെള്ളമെത്തി. ചിറ്റൂരിലും സമീപപ്രദേശത്തുള്ളവരോടും ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.

ഇതുവരെ എവിടെയും നാശനഷ്ടങ്ങൾ റിപ്പോർട്ട് ചെയ്തിട്ടില്ലെങ്കിലും മുന്നറിയിപ്പ് നൽകാതെ ഡാം തുറന്നതിനെതിരെ വിമർശനം ഉയരുന്നുണ്ട്.