ദത്ത് നല്‍കിയ കുട്ടിയെ തിരിച്ചുകൊണ്ടുവരാന്‍ ശിശുക്ഷേമ സമിതിയെ തന്നെ ചുമതല ഏല്‍പ്പിച്ചതില്‍ ഉത്കണ്ഠയുണ്ടെന്ന് കാണിച്ച് അനുപമയുടെ പരാതി. ബാലാവകാശ കമ്മീഷനും വനിതാ ശിശുവികസന വകുപ്പ് ഡയറക്ടര്‍ക്കുമാണ് അനുപമ പരാതി നല്‍കിയത്. പൊലീസും വിവിധ ശിശു സംരക്ഷണ സ്ഥാപനങ്ങളും തന്നോട് നീതിക്കേട് കാട്ടി. കുഞ്ഞിന്റെ സുരക്ഷ പരിഗണിച്ച് മതിയായ സംരക്ഷണം നല്‍കി തന്റെ കുഞ്ഞിനെ തിരിച്ചുകൊണ്ടുവരാനുള്ള സാഹചര്യമുണ്ടാക്കണമെന്നും അനുപമ പരാതിയില്‍ ആവശ്യപ്പെടുന്നു.

ഏറെ നാളത്തെ അനിശ്ചിതത്വത്തിനൊടുവിലാണ് അനുപമയുടെ കുഞ്ഞിനെ തിരിച്ചെത്തിക്കാനുള്ള നടപടികള്‍ വേഗത്തിലായത്. അഞ്ച് ദിവസത്തിനകം തിരിച്ചെത്തിച്ച് എത്രയും പെട്ടെന്ന് ഡിഎന്‍എ പരിശോധന നടത്തണമെന്ന ചൈല്‍ഡ് വെല്‍ഫയര്‍ കമ്മിറ്റിയുടെ ഉത്തരവ് അനുപമയ്ക്ക് കൈമാറിയിരുന്നു.

അഞ്ച് ദിവസത്തിനകം കുഞ്ഞിനെ ഹാജരാക്കാനാണ് ശിശുക്ഷേമ സമിതിക്ക് നല്‍കിയ ഉത്തരവ്. കുഞ്ഞിനെ തിരുവനന്തപുരത്ത് എത്തിക്കാന്‍ ഡിവൈഎസ്പി തലത്തിലുള്ള ഉദ്യോഗസ്ഥന്‍ അനുഗമിക്കണം. കുഞ്ഞിനെ നാട്ടിലെത്തിച്ചയുടന്‍ ഡിഎന്‍എ പരിശോധന നടത്തണം. ഇതിനായി കുഞ്ഞിന്റെയും അനുപമയുടെയും അജിത്തിന്റെയും സാമ്പിളുകള്‍ എടുക്കണം.

ഡിഎന്‍എ പരിശോധന തിരുവനന്തപുരം രാജീവ് ഗാന്ധി സെന്റര്‍ ഫോര്‍ ബയോ ടെക്‌നോളജിയില്‍ നടത്തണം. പരിശോധനാ ഫലം ചൈല്‍ഡ് വെല്‍ഫയര്‍ കമ്മിറ്റിയെ അറിയിക്കണം. ഡിഎന്‍എ പരിശോധന ഫലം വരും വരെ തിരുവനന്തപുരം ജില്ലാ ശിശു സംരക്ഷണ ഓഫീസറുടെ സംരക്ഷണയിലായിരിക്കണമെന്നും അനുപമയ്ക്ക് കിട്ടിയ ഉത്തരവില്‍ പറയുന്നു.

2020 ഒക്ടോബര് 19നാണ്അനുപമ ഒരു ആണ്‍ കുഞ്ഞിന് ജന്മം നല്കിയത്. ഡിവൈഎഫ്‌ഐ പ്രവര്‍ത്തകനായ അജിത്തുമായി അനുപമ പ്രണയത്തിലായിരുന്നു. വിവാഹിതനായിരുന്ന അജിത്തുമായുള്ള ബന്ധം വീട്ടുകാര്‍ എതിര്‍ത്തിരുന്നു. ഇതേതുടര്‍ന്നാണ് പ്രസവിച്ച് മുന്നുദിവസം കഴിഞ്ഞതോടെ കുഞ്ഞിനെ അനുപമയില്‍ നിന്ന് ബലമായി വേര്‍പ്പെടുത്തിയത്.

2020 ഒക്ടോബര്‍ 22 നാണ് കുഞ്ഞിനെ അനുപമയുടെ അമ്മയും അച്ഛനും ചേര്‍ന്ന് ശിശുക്ഷേമ സമിതിയെ ഏല്‍പ്പിക്കുന്നത്. കുഞ്ഞിനെ ശിശുക്ഷേമ സമിതിയെ ഏല്‍പ്പിച്ച വിവരം കുറച്ച് മാസങ്ങള്‍ക്ക് മുമ്പുമാത്രമാണ് അച്ഛന്‍ ജയചന്ദ്രന്‍ വെളിപ്പെടുത്തിയത്.
ഒക്ടോബര്‍ 22 ന് രാത്രിയിലാണ് കുഞ്ഞിനെ ശിശുക്ഷേമ സമിതിയുടെ അമ്മത്തൊട്ടിലില്‍ ഏല്‍പ്പിച്ചതെന്നാണ് ജയചന്ദ്രന്‍ പറയുന്നത്.

സഹോദരിയുടെ വിവാഹം കഴിഞ്ഞ് കുഞ്ഞിനെ തിരിച്ച് തരാമെന്ന് പറഞ്ഞിരുന്ന സമയം കഴിഞ്ഞിട്ടും കുട്ടിയെ കിട്ടാതെ വന്നതോടെയാണ് അനുപമ നിയമ വഴിയിലേക്ക് കടന്നത്. എന്നാല്‍ പാര്‍ട്ടി ജില്ലാ നേതൃത്വത്തിന്റെ ഇടപെടല്‍ ഉണ്ടായിരുന്നതിനാല്‍ പോലീസ് അന്വേഷണം ഇഴഞ്ഞുനീങ്ങി. പ്രശ്‌നം മാധ്യമങ്ങള്‍ ഏറ്റെടുത്തതോടെയാണ് പാര്‍ട്ടിയും ശിശുക്ഷേമ സമിതിയും പ്രതിരോധത്തിലായത്.
പോലീസിന് പരാതി നല്‍കി മാസങ്ങള്‍ കഴിഞ്ഞതിന് ശേഷമാണ് കുഞ്ഞിനെ ശിശുക്ഷേമ സമിതിക്ക് കൊടുത്തുവെന്ന് അനുപമയുടെ അച്ഛന്‍ ജയചന്ദ്രന്‍ വെളിപ്പെടുത്തിയത്. എന്നാല്‍ അതിനിടെ തന്നെ കുഞ്ഞിനെ ആന്ധ്രാപ്രദേശിലുള്ള ദമ്പതികള്‍ക്ക് ദത്ത് നല്‍കിയിരുന്നു. ദത്ത് നല്‍കിയെന്ന് ഉറപ്പാക്കിയതിന് ശേഷമാണ് ഇക്കാര്യം വെളിപ്പെടുത്തിയത്.

മാത്രമല്ല കുഞ്ഞിനെ ശിശുക്ഷേമ സമിതിക്ക് ലഭിച്ച ദിവസം കിട്ടിയത് ആണ്‍കുട്ടിയല്ല പെണ്‍കുട്ടിയെന്നാണ് രേഖപ്പെടുത്തിയത്. അന്നേദിവസം മറ്റൊരു കുട്ടിയെകൂടി ലഭിച്ചിരുന്നു. അത് അനുപമയുടെ കുട്ടിയല്ലെന്ന് തെളിഞ്ഞിട്ടുണ്ട്. അപ്പോള്‍ ദത്ത് നല്‍കിയത് അനുപമയുടെ കുട്ടിയാണെന്ന് വ്യക്തം. ഒടുക്കം പാര്‍ട്ടിയും ശിശുക്ഷേമ സമിതിയും കുടുക്കിലാകുമെന്ന് കണ്ടതോടെയാണ് അന്വേഷണം ഊര്‍ജിതമാകുന്നതും കാര്യങ്ങള്‍ ദ്രുതഗതിയിലേക്ക് പോകുന്നതും. പോലീസ് അന്വേഷണത്തിനെതിരെയും ആക്ഷേപങ്ങളുണ്ട്.