മിസ് കേരള മത്സര ജേതാക്കളായ മോഡലുകള്‍ വാഹനാപകടത്തില്‍ മരിച്ച സംഭവത്തില്‍ ദുരൂഹതകള്‍ മാറുന്നില്ല. ഈ വിഷയത്തില്‍ ദുരൂഹതകള്‍ മാറിയെന്ന് പോലീസ് പറയുമ്പോഴും അത് വിശ്വസിക്കാന്‍ കുടുംബത്തിനാകുന്നില്ല.

അന്വേഷണ സംഘത്തിന് ലഭിച്ച നിരീക്ഷണ ക്യാമറ ദൃശ്യങ്ങള്‍ അപകടത്തില്‍ കൊല്ലപ്പെട്ട അഞ്ജന ഷാജന്റെ സഹോദരന്‍ അര്‍ജുന് കാണിച്ചു കൊടുത്തു. സ്വന്തം പെങ്ങളുടെ അവസാന ദൃശ്യങ്ങള്‍ കാണുമ്പോള്‍ അര്‍ജുന്‍ വിങ്ങിപ്പൊട്ടുകയായിരുന്നു. ഈ ദൃശ്യങ്ങല്‍ കണ്ടതോടെ പല സംശയങ്ങളും അര്‍ജുനുണ്ടായി. ഹോട്ടലുടമ റോയിയും ജീവനക്കാരും ചേര്‍ന്നു നീക്കം ചെയ്ത ദൃശ്യങ്ങള്‍ ലഭിച്ചാല്‍ മാത്രമേ അപകടവുമായി ബന്ധപ്പെട്ട യഥാര്‍ഥ വസ്തുതകള്‍ പുറത്തുവരൂ എന്ന് അര്‍ജുന്‍ തറപ്പിച്ച് പറഞ്ഞു.

കൂടെയുള്ളവര്‍ 2 തവണ മദ്യം നല്‍കാന്‍ ഒരുങ്ങിയിട്ടും സഹോദരി അഞ്ജന അതു നിരസിക്കുന്നതിന്റെ ദൃശ്യങ്ങള്‍ ലഭ്യമായ വിഡിയോയില്‍ വ്യക്തമാണെന്നും അര്‍ജുന്‍ പറഞ്ഞു. ഹോട്ടലിലെ ഡിജെ പാര്‍ട്ടിക്കു ശേഷം രാത്രി 10.43നുള്ള സിസിടിവി ദൃശ്യങ്ങളാണു പൊലീസിനു ലഭ്യമായിട്ടുള്ളത്. പൊലീസ് ഇതുവരെ കുടുംബാംഗങ്ങളുടെ സംശയങ്ങള്‍ക്കെല്ലാം കൃത്യമായി മറുപടി നല്‍കുന്നുണ്ട്.

അന്‍സി കൂടെയുണ്ടെന്നും ഹോട്ടലിനു പുറത്താണുള്ളതെന്നും അഞ്ജന അന്നു രാത്രി അമ്മയ്ക്കു ശബ്ദസന്ദേശം അയച്ചിരുന്നു. പിറ്റേന്നു വരാമെന്നാണു സന്ദേശത്തില്‍ ഉണ്ടായിരുന്നതെങ്കിലും രാത്രി വരാന്‍ ഉദ്ദേശിച്ചായിരിക്കണം ഇറങ്ങിയത്. താനും കുടുംബവും ഏറെ ഭയത്തോടെയാണു കഴിയുന്നതെന്നും അര്‍ജുന്‍ പറഞ്ഞു.

അതേസമയം മോഡലുകള്‍ വാഹനാപകടത്തില്‍ മരിച്ച സംഭവത്തില്‍ ദുരൂഹതയില്ലെന്ന് ഉറപ്പിക്കുകയാണ് പൊലീസ്. മരിച്ചവര്‍ പാര്‍ട്ടിയില്‍ പങ്കെടുത്തതിന്റെയും സന്തോഷത്തോടെ മടങ്ങുന്നതിന്റെയും സിസിടിവി ദൃശ്യങ്ങള്‍ ലഭിച്ചു. എന്നാല്‍ ഹോട്ടലുടമ ഹാര്‍ഡ് ഡിസ്‌ക് നശിപ്പിച്ചത് എന്തിനെന്ന ചോദ്യത്തിന് ഇതുവരെ ഉത്തരമില്ല. ഹാര്‍ഡ് ഡിസ്‌ക്കിനായി ഇടക്കൊച്ചി കായലില്‍ തിരച്ചില്‍ നടത്തി. മോഡലുകളുടെ കാറിനെ പിന്തുടര്‍ന്ന സൈജു തങ്കച്ചനെ വീണ്ടും ചോദ്യം ചെയ്യും.

കൊച്ചിയില്‍ മുന്‍ മിസ് കേരള അന്‍സി കബീറും റണ്ണറപ് അഞ്ജന ഷാജനും മരിച്ചതില്‍ അന്വേഷണം തുടരുന്ന പൊലീസ്, ഡിജെ പാര്‍ട്ടി നടന്ന ഹോട്ടലിലെ കൂടുതല്‍ സിസിടിവി ദൃശ്യങ്ങള്‍ പരിശോധിച്ചതോടെയാണ് മരണത്തില്‍ ദുരൂഹതയില്ലെന്ന നിഗമനത്തിലേക്ക് എത്തുന്നത്. ഡിജെ പാര്‍ട്ടിയില്‍ പെണ്‍കുട്ടികള്‍ പങ്കെടുക്കുന്നതിന്റെയും സംസാരിക്കുന്നതിന്റെയും ദൃശ്യങ്ങള്‍ ലഭിച്ചു. പാര്‍ട്ടികഴിഞ്ഞ് ഹോട്ടലില്‍നിന്ന് സന്തോഷത്തോടെ മടങ്ങുന്നതിന്റെ ദൃശ്യങ്ങളും ഉണ്ടെന്നാണു പൊലീസ് വ്യക്തമാക്കുന്നത്.

എന്നാല്‍ ചില സിസിടിവി ദൃശ്യങ്ങള്‍ അടങ്ങുന്ന ഹാര്‍ഡ് ഡിസ്‌ക് ഹോട്ടലുടമ എന്തിന് നശിപ്പിച്ചു എന്നത് സംശയം കൂട്ടുന്നു. കായലില്‍ എറിഞ്ഞെന്ന് ജീവനക്കാര്‍ വെളിപ്പെടുത്തിയ ഹാര്‍ഡ് ഡിസ്‌ക്കിനായി ഇടക്കൊച്ചി കണ്ണങ്ങാട്ട് പാലത്തിനടുത്ത് മുങ്ങല്‍ വിദഗ്ധര്‍ തിരച്ചില്‍ നടത്തി. ചെളി നിറഞ്ഞ കായലില്‍നിന്ന് ഒന്നും കണ്ടെത്തിയില്ല. അടുത്ത ദിവസം അത്യാധുനിക സംവിധാനം ഉപയോഗിച്ചുള്ള തിരച്ചിലിനാണ് പൊലീസ് തീരുമാനം.

സംഭവത്തില്‍ ദുരൂഹതയില്ലെന്ന് അന്വേഷണ സംഘം പറയുമ്പോഴും കുടുംബം അതിനെ എതിര്‍ത്ത് കോടതിയിലോ മറ്റോ പോയാല്‍ മറ്റൊരു ഏജന്‍സിയിലേക്ക് അന്വേഷണം മാറും. അതിപ്പോഴുള്ള അന്വേഷണ സംഘത്തിന് പഴി കേള്‍ക്കും. അതിനാല്‍ തന്നെ നശിപ്പിച്ച ഹാര്‍ഡ് ഡിസ്‌ക് എങ്ങനേയും കണ്ടെത്താനുള്ള ശ്രമത്തിലാണ് അന്വേഷണ സംഘം.