ഒടുവില്‍ അനുപമ സി പി എമ്മിന് കെ.കെ.രമയായി. അജിത്ത് റ്റി.പി.ചന്ദ്രശേഖരനും. അജിത്തിനും അനുപമക്കും കുഞ്ഞിനെ കിട്ടിയാലുടന്‍ സി പി എം ഇരുവരെയും നിരീക്ഷിക്കാന്‍ ഒരു ടീമിനെ നിയോഗിക്കും.

സി പി എമ്മിനെയും സി പി എം നേതാക്കളെയും അപമാനിക്കാന്‍ അനുപമയും അജിത്തും നടത്തി കൊണ്ടിരിക്കുന്ന ശ്രമങ്ങള്‍ക്കെതിരെ തീര്‍ത്തും അസ്വസ്ഥരാണ് പാര്‍ട്ടിയും നേതാക്കളും. അജിത്തിനും അനുപമയും പാര്‍ട്ടിയെ ഒറ്റുകൊടുത്തു എന്ന ഉറച്ച വിശ്വാസത്തിലാണ് പാര്‍ട്ടിയും സംസ്ഥാന നേതാക്കളും.

റ്റി.പി.ചന്ദ്രശേഖരന്‍ കേസില്‍ പാര്‍ട്ടി പ്രതിസന്ധിയിലായതുപോലെ തന്നെയാണ് അനുപമയും പാര്‍ട്ടിയെ പ്രതിസന്ധിയിലാക്കിയത്. പേരൂര്‍ക്കട സദാശിവന്റെ ചെറുമോള്‍ പാര്‍ട്ടിയെ മോശക്കാരാക്കിയതായി പാര്‍ട്ടി കരുതുന്നു. പാര്‍ട്ടി നേതാവ് ജയചന്ദ്രന്റെ മകള്‍ ഒരു ചീത്ത ബന്ധത്തില്‍ പെട്ടപ്പോള്‍ പാര്‍ട്ടി ഇടപെട്ടുവെന്നല്ലാതെ മറ്റൊന്നും ചെയ്തില്ലെന്നാണ് പാര്‍ട്ടിയുടെ വിശദീകരണം. അത് പാര്‍ട്ടി ബന്ധുക്കള്‍ക്ക് നല്‍കുന്ന സംരക്ഷണം മാത്രമാണ്. അതില്‍ പാര്‍ട്ടി ഖേദിക്കുന്നില്ല.

ശിശുക്ഷേമ സമിതിയ്‌ക്കെതിരെയുള്ള അനുപമയുടെ ആരോപണങ്ങള്‍ ശിശുക്ഷേമ സമിതി സെക്രട്ടറി ഷിജു ഖാന്‍ തള്ളി. ജൂവനൈല്‍ ജസ്റ്റിസ് ആക്ട് 2015 സെക്ഷന്‍ 41 പ്രകാരം സ്‌പെഷ്യലൈസ്ഡ് അഡോപ്ഷന്‍ ഏജന്‍സിക്കുള്ള രജിസ്ട്രഷന്‍ സര്‍ട്ടിഫിക്കറ്റ് സമിതിക്കുണ്ട്. 2017മുതല്‍ അഞ്ച് വര്‍ഷത്തേക്ക് സംസ്ഥാന സര്‍ക്കാര്‍ അനുവദിച്ച അനുമതിയുമുണ്ട്. അനുമതി ഇല്ലാതെയാണ് സ്ഥാപനം പ്രവര്‍ത്തിക്കുന്നത് എന്ന പ്രചാരണം അടിസ്ഥാന രഹിതമാണ്. അവാസ്തവങ്ങളും അമാന്യമായ ആക്ഷേപങ്ങളും നിരത്തി കേരള സംസ്ഥാന ശിശുക്ഷേമ സമിതിയെ പൊതുജന മധ്യത്തില്‍ അപമാനിക്കാനുള്ള ശ്രമങ്ങളെ സമിതി അപലപിക്കുന്നുവെന്ന് ഷിജു ഖാന്‍ പ്രസ്താവനയില്‍ അറിയിച്ചു.

'അപായകരമായ അവസ്ഥയിലേക്കോ ജീവഹാനി സംഭവിക്കാവുന്ന അവസ്ഥയിലേക്കോ എത്തിപ്പെടാന്‍ സാധ്യതയുള്ള അനേകം കുഞ്ഞുങ്ങളെ അമ്മത്തൊട്ടിലിലൂടെ ജീവിതത്തിലേക്ക് കൈപിടിച്ചു നടത്തുന്ന സ്ഥാപനമാണ് ശിശുക്ഷേമ സമിതി. നിര്‍വചിക്കാനോ വ്യാഖ്യാനിക്കാനോ കഴിയാത്തവിധം ഉന്നതമായ മനുഷ്യ സ്‌നേഹമാണ് ശിശുക്ഷേമ സമിതിയുടെ മുഖമുദ്ര', പ്രസ്താവനയില്‍ പറയുന്നു.

ദത്തെടുക്കല്‍ പരിപാലന രംഗത്ത് കേന്ദ്ര-സംസ്ഥാന നിയമങ്ങള്‍ പ്രകാരമാണ് സ്ഥാപനം പ്രവര്‍ത്തിച്ചുവരുന്നത്. ദേശീയ- അന്തര്‍ദേശീയ തലത്തില്‍ അംഗീകരിക്കപ്പെട്ട കുട്ടികളുടെ അവകാശങ്ങള്‍ സംരക്ഷിച്ചുകൊണ്ടാണ് സമിതി പ്രവര്‍ത്തിക്കുന്നത്. ശിശുക്ഷേമ സമിതിയ്ക്ക് ഏറ്റവും പ്രധാനം കുഞ്ഞുങ്ങളുടെ സുരക്ഷയും ആരോഗ്യവും സ്വകാര്യതയുടെ സംരക്ഷണവും പരിചരണവുമാണ്. പൊതുസമൂഹവും കൂട്ടികളെ സ്‌നേഹിക്കുന്നവരും സമിതിയില്‍ അര്‍പ്പിച്ച വിശ്വാസവും കരുതലും കാത്തുസൂക്ഷിക്കാന്‍ സമിതി പ്രതിജ്ഞാബദ്ധമാണ്.

കുഞ്ഞിനെ അനുപമ എങ്ങനെ സംരക്ഷിക്കുന്നു എന്നായിരിക്കും പാര്‍ട്ടി നിരീക്ഷിക്കുക.അജിത്തിന്റെയോ അനുപമയുടെയോ ഭാഗത്ത് നിന്നും മോശം പ്രതികരണമുണ്ടായാല്‍ ശിശുക്ഷമസമിതി കൃത്യമായി ഇടപെടും. കാരണം പെറ്റമ്മയുടെ പൂര്‍ണമായ അധിക്കാരം അനുപമയ്ക്ക് ഉണ്ടായിരിക്കില്ല.

കാരണം കുഞ്ഞിനെ അനുപമക്ക് കൈമാറുന്നത് സര്‍ക്കാരാണ്. ഒരിക്കല്‍ ഉപേക്ഷിച്ച കുഞ്ഞിനെ അനുപമ ഏറ്റു വാങ്ങുമ്പോള്‍ കുഞ്ഞിന്റെ ഗാര്‍ഡിയന്‍ഷിപ്പ് സര്‍ക്കാരിന് കൂടി അവകാശപ്പെട്ടതായിരിക്കും.അതു കൊണ്ടു തന്നെ സ്ഥിരം വിളച്ചിലെടുക്കാനാണ് അജിത്തിന്റെ ഭാവമെങ്കില്‍ അദ്ദേഹം ജയിലിലാവും.

അനുപമ കുഞ്ഞിനെ നോക്കാതിരുന്നാല്‍ നിയമത്തിനും പാര്‍ട്ടിക്കും മുന്നില്‍ മറുപടി പറയേണ്ടി വരും. പാര്‍ട്ടിയെ അപമാനിക്കുന്ന ആരെയും പാര്‍ട്ടി വെറുതെ വിടാറില്ല. അതാണ് റ്റി.പി.ചന്ദ്രശേഖരന്റെ കാര്യത്തില്‍ സംഭവിച്ചത്.