10 വയസ്സുളള പെണ്കുട്ടിയെ ദേഹോപദ്രവം ഏല്പ്പിക്കുകയും ഭീഷണിപ്പെടുത്തുകയും ചെയ്ത രണ്ടാനച്ഛന് അറസ്റ്റില്
വട്ടിയൂര്ക്കാവില് 10 വയസ്സുളള പെണ്കുട്ടിയെ ദേഹോപദ്രവം ഏല്പ്പിക്കുകയും ദേഹത്ത് പെട്രോള് ഒഴിച്ച് കൊല്ലുമെന്ന് ഭീഷണിപ്പെടുത്തുകയും ചെയ്ത രണ്ടാനച്ഛനെ പൊലീസ് പിടികൂടി.വട്ടിയൂര്ക്കാവ് നിഷ ഭവനില് താമസിക്കുന്ന ഇടുക്കി സ്വദേശിയായ രാജേഷ് എന്ന മാരിമുത്തുവിനെയാണ് (32) വട്ടിയൂര്ക്കാവ് പൊലീസ് അറസ്റ്റ് ചെയ്തത്.
ആഗസ്റ്റ് 23ന് ആയിരുന്നു കേസിനു ആസ്പദമായ സംഭവം. രാത്രി 10 ഓടെ വട്ടിയൂര്ക്കാവ് സ്വദേശിനിയായ യുവതിയും അവരുടെ ആദ്യവിവാഹത്തിലുള്ള കുട്ടിയും ഉറങ്ങിക്കിടക്കുകയായിരുന്നു. കിടപ്പുമുറിയുടെ ജനാല വഴി പ്രതി മാരിമുത്തു അവരുടെ ദേഹത്ത് പെട്രോള് ഒഴിച്ചു. കുട്ടിയെ പ്രതി പലപ്രാവശ്യം കവിളില് അടിച്ചും ഹോസ് പൈപ്പ് കൊണ്ട് അടിച്ചും മറ്റും ദേഹോപദ്രവം ഏല്പ്പിച്ചത് വിലക്കിയതിലുളള വിരോധമാണ് ആക്രമണത്തിന് കാരണമായത്.
യുവതി പൊലീസില് പരാതി നല്കിയതിനെ തുടര്ന്ന് ഒളിവില് പോയ പ്രതിയെ വട്ടിയൂര്ക്കാവ് പൊലീസ് സംഘമാണ് അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
https://www.facebook.com/Malayalivartha
