വാക്‌സിന്‍ എടുക്കാത്ത അധ്യാപകര്‍ സ്വന്തം കുടുംബത്തിന് മാത്രമല്ല കുട്ടികള്‍ക്കു കൂടി ഭീഷണി ആവുകയാണ്. വാക്‌സിന്‍ എടുക്കാത്ത 5,000ത്തോളം അധ്യാപകരുണ്ടെന്നാണ് ആദ്യം കണക്കാക്കിയത്. എന്നാല്‍ സര്‍ക്കാര്‍ നിയന്ത്രണം കര്‍ശനമാക്കിയതോടെ അത് രണ്ടായിരത്തില്‍ താഴെയായി. വീണ്ടും സര്‍ക്കാര്‍ നിയന്ത്രണം കടുപ്പിക്കുകയാണ്.

കോവിഡ് പ്രതിരോധ വാക്‌സീന്‍ എടുക്കാത്ത അധ്യാപകര്‍ക്കും ജീവനക്കാര്‍ക്കും ആഴ്ച തോറും ആര്‍ടിപിസിആര്‍ പരിശോധന നിര്‍ബന്ധമാക്കുന്നതു സംബന്ധിച്ച് പൊതുവിദ്യാഭ്യാസ ഡയറക്ടര്‍ ഇന്ന് ഉത്തരവിറക്കും. സ്വന്തം ചെലവില്‍ പരിശോധന നടത്തി ഫലം ഹാജരാക്കുക, രോഗങ്ങള്‍, അലര്‍ജി തുടങ്ങിയ പ്രശ്‌നങ്ങള്‍ കാരണം വാക്‌സീന്‍ എടുക്കാത്തവര്‍ ഡോക്ടറുടെ സര്‍ട്ടിഫിക്കറ്റ് ഹാജരാക്കുക തുടങ്ങിയ നിബന്ധനകളും ഉത്തരവില്‍ ഉണ്ടാകും.

സര്‍ക്കാര്‍ നിലപാടുകള്‍ എല്ലാവര്‍ക്കും ബാധകമാണെന്നും ഇതനുസരിക്കാത്തത് അച്ചടക്ക ലംഘനമായി കാണേണ്ടി വരുമെന്നും മന്ത്രി വി.ശിവന്‍കുട്ടി പറഞ്ഞു. അധ്യാപകര്‍ വാക്‌സീന്‍ എടുക്കാത്തതു പൊതുസമൂഹത്തില്‍ ചര്‍ച്ചയാകുകയാണ്. രക്ഷിതാക്കള്‍ ഉള്‍പ്പെടെയുള്ളവര്‍ ഈ അധ്യാപകര്‍ക്കെതിരെ രംഗത്തുവന്നിട്ടുണ്ട്.

സംസ്ഥാനത്തെ സ്‌കൂളുകളില്‍ കോവിഡ് വാക്‌സീന്‍ എടുക്കാത്ത അധ്യാപകരുടെയും അധ്യാപകേതര ജീവനക്കാരുടെയും എണ്ണം 1707 ആണ്. ഇതില്‍ 1495 പേര്‍ അധ്യാപകരും 212 പേര്‍ അനധ്യാപകരുമാണ്. എല്‍പി, യുപി, ഹൈസ്‌കൂള്‍ വിഭാഗത്തില്‍ 1066 അധ്യാപകരും 189 അനധ്യാപകരും വാക്‌സീന്‍ എടുത്തിട്ടില്ല. ഹയര്‍സെക്കന്‍ഡറിയില്‍ 200 അധ്യാപകരും 23 അനധ്യാപകരുമാണ് വാക്‌സീന്‍ എടുക്കാനുള്ളത്.

വൊക്കേഷനല്‍ ഹയര്‍സെക്കന്‍ഡറിയില്‍ അനധ്യാപകരെല്ലാം വാക്‌സീന്‍ എടുത്തവരാണ്; എന്നാല്‍, 229 അധ്യാപകര്‍ വാക്‌സീന്‍ എടുത്തിട്ടില്ല. വാക്‌സീന്‍ എടുക്കാത്ത അധ്യാപകര്‍ക്കും ജീവനക്കാര്‍ക്കും ആഴ്ച തോറും ആര്‍ടിപിസിആര്‍ പരിശോധന നിര്‍ബന്ധമാക്കി. രോഗങ്ങള്‍, അലര്‍ജി തുടങ്ങിയ പ്രശ്‌നങ്ങള്‍ കാരണം വാക്‌സീന്‍ എടുക്കാത്തവര്‍ ഡോക്ടറുടെ സര്‍ട്ടിഫിക്കറ്റ് ഹാജരാക്കണം.

എല്‍പി, യുപി, ഹൈസ്‌കൂള്‍ വിഭാഗങ്ങളില്‍ വാക്‌സീന്‍ എടുക്കാത്ത അധ്യാപകരുടെയും അനധ്യാപകരുടെയും എണ്ണം ജില്ല തിരിച്ച്: മലപ്പുറം 201, കോഴിക്കോട് 151, തൃശൂര്‍ 124, തിരുവനന്തപുരം 110, എറണാകുളം 106, കൊല്ലം 90, കണ്ണൂര്‍ 90, ആലപ്പുഴ 89, കോട്ടയം 74, പാലക്കാട് 61, പത്തനംതിട്ട 51, ഇടുക്കി 43, കാസര്‍കോട് 36, വയനാട് 29.



രണ്ടായിരത്തോളം അധ്യാപകര്‍ വാക്‌സിന്‍ എടുത്തില്ലെന്നായിരുന്നു സ്‌കൂള്‍ തുറക്കുന്നതിന് മുന്നോടിയായി മന്ത്രി ആദ്യം പറഞ്ഞത്. പിന്നീട് മന്ത്രി പറഞ്ഞത് അയ്യായിരത്തോളം പേരുണ്ടെന്നാണ്. വാക്‌സിന്‍ എടുക്കാത്ത അധ്യാപകര്‍ സ്‌കൂളിലേക്ക് വരേണ്ടെന്നാണ് വിദ്യാഭ്യാസ വകുപ്പ് നിലപാട്.

വാക്‌സിന്‍ എടുക്കാത്തവര്‍ക്ക് കാരണം കാണിക്കല്‍ നോട്ടീസ് നല്‍കുമെന്ന് ശിവന്‍കുട്ടി പറഞ്ഞിരുന്നു. ഇവരുടെ വിവരങ്ങള്‍ സമൂഹം അറിയണം. വലിയ തയാറെടുപ്പ് നടത്തിയ ശേഷമാണ് സംസ്ഥാനത്ത് സ്‌കൂളുകള്‍ തുറന്നത്. ഒമിക്രോണ്‍ ഭീതിയുടെ പശ്ചാത്തലത്തിലും ഇതേ മുന്നൊരുക്കം നടത്തും. കുട്ടികളുടെ ആരോഗ്യം സംരക്ഷിക്കും. ഒമിക്രോണ്‍ പ്രതിരോധം സംബന്ധിച്ച് കൂടിയാലോചനകള്‍ നടത്തുമെന്നും മന്ത്രി പറഞ്ഞു.

ദുരന്തനിവാരണ നിയമപ്രകാരവും നടപടി ആലോചിക്കാം. എന്നാല്‍ അത്ര കടുപ്പിക്കേണ്ടെന്നും അഭിപ്രായമുണ്ട്. എന്നാല്‍ മതപരമായ കാരണങ്ങളാല്‍ വാക്‌സീനെടുക്കാത്ത അധ്യാപകര്‍ക്കെതിരെ നടപടിയെടുക്കാത്തതില്‍ സാമൂഹ്യമാധ്യമങ്ങളില്‍ വിമര്‍ശനമുയരുന്നുണ്ട്.

ആരോഗ്യ പ്രശ്‌നങ്ങള്‍ ഉള്ളവരെ വാക്‌സീന്‍ എടുക്കുന്നതില്‍ നിന്ന് ഒഴിവാക്കി ഉത്തരവിട്ട് സ്‌കൂളില്‍ വരാന്‍ അനുവദിക്കണമെന്നാണ് എയ്ഡഡ് ഹയര്‍ സെക്കന്‍ഡറി ടീച്ചേഴ്‌സ് അസോസിയേഷന്റെ ആവശ്യം.