തൊടുപുഴയില്‍ ലഹരിക്ക് അടിമയായ മകന്‍ അമ്മയെ തലയ്ക്കടിച്ച് കൊലപ്പെടുത്തി. ഇടവെട്ടി മയിലാടുംപാറ സ്വദേശി റേച്ചല്‍ ജോസഫ് (63) ആണ് കൊല്ലപ്പെട്ടത്. മകന്‍ ലിജോ ജോസഫിനെ പൊലീസ് കസ്റ്റഡിയിലെടുത്തു. ഇന്ന് വൈകിട്ട് നാലുമണിയോടെയാണ് കൊലപാതകം. വീടിന്റെ പിന്നാമ്പുറത്താണ് റേച്ചല്‍ ജോസഫിനെ മരിച്ച നിലയില്‍ കണ്ടെത്തിയത്.

ലിജോ റേച്ചലിനെ തലയ്ക്കടിച്ചാണ് കൊലപ്പെടുത്തിയതെന്നാണ് പ്രാഥമിക വിവരം. കൊലപാതകത്തിനുശേഷം സ്ഥലത്തുനിന്നു രക്ഷപ്പെടാന്‍ ശ്രമിച്ച ലിജോയെ പൊലീസ് കസ്റ്റഡിയിലെടുക്കുകയായിരുന്നു. ലിജോ ലഹരിക്ക് അടിമയാണെന്ന് പൊലീസ് അറിയിച്ചു. ഇയാള്‍ക്ക് മാനസിക വിഭ്രാന്തിയുണ്ടായിരുന്നതായി പ്രദേശവാസികളും പറഞ്ഞു.

കൊലപാതകത്തിലേക്കു നയിച്ച സാഹചര്യം, പ്രതിയുടെ ലഹരി ഉപയോഗം ഉള്‍പ്പെടെയുള്ള കാര്യങ്ങള്‍ എന്നിവ പൊലീസ് പരിശോധിച്ചുവരികയാണെന്ന് പൊലീസ് അറിയിച്ചു. മൃതദേഹം പോസ്റ്റ്‌മോര്‍ട്ടത്തിനായി മാറ്റും. അന്വേഷണത്തിന്റെ ഭാഗമായി കൂടുതല്‍ തെളിവുകള്‍ ശേഖരിക്കുന്ന നടപടികളും ആരംഭിച്ചുവെന്നും പൊലീസ് അറിയിച്ചു.