വ്യാജ പാസ്‌പോര്‍ട്ടില്‍ സൗദി അറേബ്യയില്‍ നിന്നും തലസ്ഥാനത്തെത്തിയ യുവാവിന് തടവും പിഴയും ശിക്ഷ വിധിച്ചു. തിരുവനന്തപുരം ചീഫ് ജുഡീഷ്യല്‍ മജിസ്‌ട്രേട്ട് കോടതിയാണ് ശിക്ഷ വിധിച്ചത്.

തമിഴ്‌നാട് കന്യാകുമാരി വിളവന്‍കോട് താലൂക്കില്‍ നല്ലൂര്‍ വില്ലേജില്‍ ലാല്‍ എന്ന ജയലാലിനെ (41) യാണ് ശിക്ഷിച്ചത്. 48 ദിവസത്തെ തടവു ശിക്ഷ അനുഭവിക്കുകയും 15,000 രൂപ പിഴയും ഒടുക്കണം. പിഴയൊടുക്കാത്ത പക്ഷം 45 ദിവസത്തെ അധിക തടവനുഭവിക്കാനും സി ജെ എം ആര്‍. രേഖ ഉത്തരവിട്ടു.

2010 ഡിസംബര്‍ 22നാണ് സംഭവം നടന്നത്. കൊല്‍ക്കത്ത പാസ്‌പോര്‍ട്ട് ഓഫീസില്‍ നിന്നും മഹതാബ് സിംഗ് എന്നയാള്‍ക്ക് നല്‍കിയ അസ്സല്‍ പാസ്‌പോര്‍ട്ടില്‍ ഫോട്ടോ മാറ്റി പകരം ജയ ലാലിന്റെ ഫോട്ടോ പതിച്ച് പാസ്‌പോര്‍ട്ട് തിരുത്തി യാത്രാ രേഖകളുമായി എയര്‍ ഇന്ത്യ ഫ്‌ലൈറ്റ് നമ്പര്‍ എ1 922 വിമാനത്തില്‍ യാത്ര ചെയ്ത് തലസ്ഥാനത്തെ ചാക്ക ഇന്റര്‍നാഷണല്‍ എയര്‍പോര്‍ട്ടില്‍ വന്നിറങ്ങി സംസ്ഥാനത്തേക്ക് കടക്കാന്‍ ശ്രമിച്ചുവെന്നാണ് കേസ്.

ഇമിഗ്രേഷന്‍ ക്ലിയറന്‍സിനായി വ്യാജ പാസ്‌പോര്‍ട്ട് നിജമാണെന്ന വ്യാജേന ഹാജരാക്കിയപ്പോഴാണ് പിടിയിലായത്. 2010 ഡിസംബര്‍ 23 ന് കോടതിയില്‍ ഹാജരാക്കിയ പ്രതിയെ റിമാന്റ് ചെയ്ത് ജയിലിലടച്ചിരുന്നു. 2011 ജനുവരി 5 നാണ് കോടതി പ്രതിക്ക് ജാമ്യം അനുവദിച്ചത്.

വലിയതുറ പോലീസ് രജിസ്റ്റര്‍ ചെയ്ത കേസില്‍ ക്രൈം ഡിറ്റാച്ച്‌മെന്റ് അസി. കമ്മീഷണറാണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. 2014 ല്‍ കുറ്റപത്രം സമര്‍പ്പിച്ചുവെങ്കിലും പ്രതി കോടതിയില്‍ ഹാജരാകാതെ ഒളിവില്‍ പോയി.

തുടര്‍ന്ന് കോടതി അറസ്റ്റ് വാറണ്ടും ജപ്തി വാറണ്ടും പുറപ്പെടുവിച്ച് പ്രതിയെ 2020 ല്‍ കോടതി പിടികിട്ടാപ്പുള്ളിയായി പ്രഖ്യാപിച്ചു. ഒടുവില്‍ 2022 ജനുവരി 1 ന് പ്രതി കോടതിയില്‍ കീഴടങ്ങി.

ഇന്ത്യന്‍ ശിക്ഷാ നിയമത്തിലെ 465 (വ്യാജ നിര്‍മ്മാണം) , 468 ( ചതിക്കലിനായുള്ള വ്യാജ നിര്‍മ്മാണം) , 471 (വ്യാജ നിര്‍മ്മിത രേഖ അസല്‍ പോലെ ഉപയോഗിക്കല്‍) , ഇന്ത്യന്‍ പാസ്‌പോര്‍ട്ട് നിയമത്തിലെ 12 (1) (യ) (റ) ( കളവായ വിവരങ്ങള്‍ ചേര്‍ത്ത് പാസ്‌പോര്‍ട്ട് തിരുത്തുകയും മറ്റൊരാളുടെ പാസ്‌പോര്‍ട്ട് ഉപയോഗിച്ച് വിമാന യാത്ര ചെയ്യുകയും ചെയ്യല്‍) എന്നീ വകുപ്പുകള്‍ പ്രകാരം കുറ്റക്കാരനെന്ന് കണ്ടെത്തിയാണ് കോടതി ശിക്ഷ വിധിച്ചത്.

ഗൗരവമേറിയ കൃത്യം ചെയ്ത പ്രതിക്ക് നല്ല നടപ്പു നിയമത്തിന്റെ ഔദാര്യത്തിന് അര്‍ഹതയില്ലെന്നും വിധി ന്യായത്തില്‍ കോടതി വ്യക്തമാക്കി.