തന്റെ പ്രിയപ്പെട്ട കുളൂർമാഷിന്റെ അഭിനയ പാഠശാലയിലേക്ക് അതിഥിയായി എത്തിയ സന്തോഷം പങ്കു വയ്ക്കുകയാണ് ഹരീഷ് പേരടി. അദ്ദേഹത്തിന്റെ ഫേസ്ബുക്ക് പോസ്റ്റ് ഇങ്ങനെ; ഇത് പ്രിയപ്പെട്ട കുളൂർമാഷിന്റെ അഭിനയ പാഠശാലയിലേക്ക് അതിഥിയായി എത്താൻ അവസരം കിട്ടിയപ്പോൾ ഒരു മുൻവിധികളുമില്ലാതെ കുട്ടികളോട് രണ്ട് മണിക്കൂറോളം ഇടപെടാൻ പറ്റിയപ്പോൾ ആ വിദ്യാർത്ഥികൾ കുളൂർമാഷിന് തിരികെ കൊടുത്ത അവരുടെ വിലപ്പെട്ട അഭിപ്രായങ്ങളാണ്..

കുളൂർമാഷിന്റെ പ്രഥമശിഷ്യനാവാൻ പറ്റിയതിൽ അഭിമാനം തോന്നുന്ന നിമിഷങ്ങൾ.... 8/1/2022 ന് ശ്രീ. ഹരീഷ് പേരടി വിശിഷ്ടാതിഥിയായി വന്ന ഒന്നേ മുക്കാൽ മണിക്കൂറോളം നീണ്ട സെഷൻ അതുല്യമായ ഒരു അനുഭവമായിരുന്നു. ദക്ഷിണേന്ത്യൻ ഭാഷകളിലെ സിനിമകളിൽ തിരക്കുള്ളൊരു നടനായിരിക്കുമ്പോഴും നാടകത്തോട് അദ്ദേഹം കൊണ്ടുനടക്കുന്ന പാഷൻ  എന്നെ വല്ലാതെ ആകർഷിച്ചു.

കുളൂർ മാഷിനോടൊപ്പമുള്ള പഠന കാലത്തേയും പഠനത്തിന് ശേഷമുണ്ടായ പ്രവർത്തനകാലത്തെയും കുറിച്ചുള്ള ഓർമ്മകൾ തികഞ്ഞ ആത്മാർത്ഥതയോടെയും സന്തോഷത്തോടെയുമാണ് അദ്ദേഹം ഞങ്ങളുമായി പങ്കുവെച്ചത്. അഭിനയം എന്നതിലൂടെ അദ്ദേഹം നടത്തിയ യാത്രയിൽ നിന്നുള്ള അനുഭവങ്ങളും, ഒരു അഭിനേതാവെന്ന രീതിയിൽ അദ്ദേഹം നടത്തിയ മുന്നൊരുക്കങ്ങളെ കുറിച്ചുള്ള വിവരണങ്ങളും അഭിനയത്തെ മനസിലാക്കാൻ ശ്രമിക്കുന്ന ഒരാളെന്ന നിലയ്ക്ക് വളരെയധികം ഉപകാരപ്രദമായിരുന്നു.

വളരെ ചെറുതെങ്കിലും അദ്ദേഹം നടത്തിയ ചില അഭിനയ പ്രകടനങ്ങൾ അദ്ദേഹത്തിലെ പ്രതിഭയെ കൂടുതൽ അറിയാൻ സഹായകമാക്കുകയും ചെയ്തു. - എഴുതിയതു് മുമ്പത്തെ ബാച്ചിലുണ്ടായിരുന്ന അശ്വിൻ ചന്ദ്രൻ….