ചികിത്സയിലായിരുന്ന തമിഴ് ഹാസ്യ താരം റോബോ ശങ്കര്‍ (46) അന്തരിച്ചു. ഇന്നലെ രാത്രി 8.30 ഓടെയായിരുന്നു അന്ത്യം. ബുധനാഴ്ചയാണ് സിനിമ സെറ്റില്‍ കുഴഞ്ഞുവീണ താരത്തെ ചെന്നൈയിലെ ജെം ആശുപത്രിയില്‍ പ്രവേശിപ്പിച്ചിരുന്നത്. പിന്നാലെ വൃക്കകള്‍ തകരാറിലായതോടെ തീവ്രപരിചരണ വിഭാഗത്തിലേക്ക് മാറ്റുകയായിരുന്നു. ഇതിനിടെ ആരോഗ്യനിലയും വഷളായി.

ചെന്നൈയിലെ വളസരവാക്കത്തുള്ള അദ്ദേഹത്തിന്റെ വസതിയില്‍ ഇന്നലെ അര്‍ദ്ധരാത്രിയോടെ മൃതദേഹം എത്തിച്ചു. സംസ്‌കാരം ഇന്ന്. ജനപ്രിയ ടെലിവിഷന്‍ ഷോകളിലൂടെയാണ് ശങ്കര്‍ ശ്രദ്ധ നേടിയത്. ജയം രവി നായകനായ ദീപാവലി എന്ന ചിത്രത്തിലൂടെ 2007ലാണ് വെള്ളിത്തിരയിലെത്തുന്നത്.

മാരി, വിശ്വാസം, സിംഗം 3, കോബ്ര , പുലി തുടങ്ങിയ സിനിമകളിലെ കഥാപാത്രങ്ങള്‍ ശ്രദ്ധേയമായി മാറി. അടുത്തിടെ മഞ്ഞപ്പിത്തം ബാധിച്ച റോബോ ശങ്കറിന്റെ ശരീരഭാരം നന്നായി കുറഞ്ഞിട്ടുണ്ടായിരുന്നു. ഇത് ആരാധകര്‍ക്കിടയില്‍ വലിയ ആശങ്കയുണ്ടാക്കിയിരുന്നു. എന്നാല്‍ രോഗം മാറിയതിന് പിന്നാലെ പാചക റിയാലിറ്റി ഷോയില്‍ പങ്കെടുത്തു.

തമിഴ്‌നാട് മുഖ്യമന്ത്രി എം.കെ. സ്റ്റാലിന്‍, അഭിനേതാക്കളായ കമല്‍ഹാസന്‍, സിമ്രാന്‍, കാര്‍ത്തി, വിഷ്ണു വിശാല്‍ തുടങ്ങിയവര്‍ അനുശോചനം രേഖപ്പെടുത്തി. ഭാര്യ: പ്രിയങ്ക ശങ്കര്‍, ഒരു മകളുണ്ട്.