അര്‍ജന്റീന ടീം കൊച്ചിയില്‍ ജവഹര്‍ലാല്‍ നെഹ്രു അന്താരാഷ്ട്ര സ്‌റ്റേഡിയത്തില്‍ കളിച്ചേക്കുമെന്നാണ് സൂചന. അര്‍ജന്റീന സൂപ്പര്‍ താരം ലയണല്‍ മെസിയും സംഘവും നവംബര്‍ മാസത്തില്‍ കേരളത്തിലെത്തുമെന്നാണ് വിവരം. എന്നാല്‍ മെസി എവിടെയാകും കളിക്കുക എന്ന കാര്യത്തില്‍ ഇപ്പോഴും പൂര്‍ണതീരുമാനം വന്നിട്ടില്ല. ഇക്കാര്യം സര്‍ക്കാര്‍ ആലോചനയിലുണ്ടെന്നാണ് സൂചന. തിരുവനന്തപുരത്താകും മെസി കളിക്കുകയെന്ന് നേരത്തെ റിപ്പോര്‍ട്ടുകളുണ്ടായിരുന്നു. 2017ല്‍ മെന്‍സ് അണ്ടര്‍17 ലോകകപ്പ് നടന്നത് ഇവിടെയായിരുന്നു.

നവംബറില്‍ അര്‍ജന്റീന ഫുട്‌ബോള്‍ ടീം കേരളത്തിലെത്തുമെന്ന് അര്‍ജന്റീന ഫുട്‌ബോള്‍ അസോസിയേഷന്‍ മുന്‍പ് അറിയിച്ചിരുന്നു. കേരളത്തില്‍ മാത്രമല്ല അംഗോളയിലും ടീം കളിക്കുന്നുണ്ടെന്നാണ് എഎഫ്എ പുറത്തുവിട്ട വിവരം. നവംബര്‍ 10 മുതല്‍ 18 വരെയാകും ഇത്. അടുത്തമാസം അമേരിക്കയില്‍ അര്‍ജന്റീന ടീം കളിക്കും.

സാമൂഹിക മാദ്ധ്യമങ്ങള്‍ വഴിയാണ് ടീമിന്റെ മത്സരങ്ങളെക്കുറിച്ച് എഎഫ്എ വ്യക്തമാക്കിയത്. കാര്യവട്ടം ഗ്രീന്‍ഫീല്‍ഡ് സ്‌റ്റേഡിയമാണ് ആദ്യം നിശ്ചയിച്ചതെങ്കിലും ഇവിടെ ക്രിക്കറ്റ് പരിശീലനത്തിന് ആവശ്യമായ തയ്യാറെടുപ്പുകളാണ് നടന്നത് അതിനാലാണ് കൊച്ചിയ്ക്ക് മാറുന്നതെന്നാണ് സൂചന. അര്‍ജന്റീനക്കെതിരെ ഏത് ടീമാണ് കളിക്കുക എന്ന് ഇതുവരെ വ്യക്തമായിട്ടില്ല.