യു.എ.ഇ. കോണ്‍സുലേറ്റിലെ എല്ലാ അവിഹിത ഇടപാടുകളെക്കുറിച്ചും മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിന് അറിയാമായിരുന്നെന്ന് സ്വര്‍ണക്കടത്ത് കേസിലെ പ്രതി സ്വപ്നാ സുരേഷ്.

ശിവശങ്കറാണ് സ്പേസ് പാര്‍ക്കില്‍ ജോലി വാങ്ങിത്തന്നത് . അദ്ദേഹം തന്നെ ചൂഷണം ചെയ്തതായും സ്വപ്ന ആരോപിച്ചു. ശിവശങ്കറിന്റെ അനുഭവക്കുറിപ്പുകള്‍ വാര്‍ത്തയായ സാഹചര്യത്തിലാണ് സ്വപ്നയുടെ പ്രതികരണം.

മുഖ്യമന്ത്രിയുടെ ആദ്യ ദുബായ് യാത്രയ്ക്കു മുന്നോടിയായി ചില പാഴ്സലുകള്‍ അയയ്ക്കുന്നതുമായി ബന്ധപ്പെട്ടാണ് ശിവശങ്കറിനെ ആദ്യം വിളിച്ചത്. പിന്നീട് അദ്ദേഹവുമായി അടുത്തബന്ധം പുലര്‍ത്തി. കുടുംബത്തിലെ ഒരാളെപ്പോലെയായിരുന്ന അദ്ദേഹത്തിന് ഐഫോണ്‍ നല്‍കി ചതിക്കേണ്ട ആവശ്യമില്ല. ഐഫോണ്‍ മാത്രമല്ല, അദ്ദേഹത്തിന് ഒട്ടേറെ സമ്മാനങ്ങള്‍ വേറെയും നല്‍കിയിട്ടുണ്ടെന്ന് സ്വപ്ന .

താനൊരു പുസ്തകം എഴുതുകയാണെങ്കില്‍ ശിവശങ്കറിനെക്കുറിച്ച് പലതും എഴുതേണ്ടിവരും. അതില്‍ ഒരുപാട് രഹസ്യങ്ങളുണ്ടാകും. എന്നാല്‍, ആരെയും ചെളിവാരിയെറിയാനില്ലെന്നും സ്വപ്ന പറഞ്ഞു.