ഭര്‍ത്താവിനെ ഇല്ലാതാക്കാന്‍ ഭാര്യയുടെ കടുംകൈ... വീര്യമേറിയ ആന്റിബയോട്ടിക്കുകള്‍ ഭക്ഷണത്തിലും വെള്ളത്തിലും കലര്‍ത്തി നല്‍കിയത് എട്ട് വര്‍ഷത്തോളം.... ഭര്‍ത്താവിനെ നിഷ്‌ക്രിയനാക്കി വരുതിയിലാക്കി സ്വത്തുക്കളുടെ നിയന്ത്രണം കൈവശപ്പെടുത്തുകയായിരുന്നു യുവതിയുടെ ലക്ഷ്യം, ശാരീരികക്ഷീണം പതിവായതോടെ തോന്നിയ സംശയം ഭാര്യയുടെ ക്രൂരത വെളിച്ചത്തായി.


സ്വത്ത് കൈക്കലാക്കാനായി കടുത്ത മാനസിക രോഗത്തിനുള്ള മരുന്ന് ഭക്ഷണത്തിലും വെള്ളത്തിലും കലര്‍ത്തി ഭര്‍ത്താവിന് നല്‍കി അപായപ്പെടുത്താന്‍ ശ്രമിച്ച കേസില്‍ ഭാര്യ പിടിയില്‍. മീനച്ചില്‍ പാലാക്കാട് സതീമന്ദിരത്തില്‍ ആശാ സുരേഷിനെ(36)യാണ് ഭര്‍ത്താവ് തിരുവനന്തപുരം സ്വദേശി സതീഷി(38)ന്റെ പരാതിയിലാണ് പാലാ പൊലീസ് അറസ്റ്റ് ചെയ്തത്.

ഭാര്യയുടെ സുഹൃത്തായ സ്ത്രീ മുഖേന നടത്തിയ അന്വേഷണത്തിലാണ് വീട്ടില്‍ നിന്ന് തനിക്ക് നല്‍കിയിരുന്ന ഭക്ഷണത്തിലും വെള്ളത്തിലും മാനസികരോഗികള്‍ക്ക് നല്‍കുന്ന വീര്യമേറിയ ആന്റിബയോട്ടിക്കുകള്‍ കലര്‍ത്തി നല്‍കിയിരുന്നതായി കണ്ടെത്തിയത്.

ഇതേത്തുടര്‍ന്ന് ഭാര്യ കൂട്ടുകാരിക്ക് അയച്ചു കൊടുത്ത മരുന്നുകളുടെ ലേബലും വീട്ടില്‍നിന്നുള്ള സിസി ടിവി ദൃശ്യങ്ങളും സഹിതം സതീഷ് ജില്ലാ പൊലീസ് മേധാവിക്ക് നല്‍കി.

സ്വന്തം വീട്ടില്‍ ഇരുവരും താമസം ആരംഭിച്ച ശേഷമായിരുന്നു സംഭവങ്ങള്‍ക്ക് തുടക്കം. പതിവായി വീട്ടില്‍ നിന്ന് ഭക്ഷണം കഴിച്ചിരുന്ന സതീഷിന് തുടര്‍ച്ചയായി ക്ഷീണവും തളര്‍ച്ചയും അനുഭവപ്പെട്ടിരുന്നു. ഇതിന് ചികിത്സ തേടിയെങ്കിലും ഷുഗര്‍നില താഴുന്നതാണ് കാരമെന്നാണ് ഡോക്ടര്‍മാര്‍ കണ്ടെത്തിയത്.

എന്നാല്‍ 2021 സെപ്തംബറില്‍ 20 ദിവസത്തോളം വീട്ടില്‍നിന്ന് മാറിനിന്ന സമയത്ത് പ്രശ്നമൊന്നും പ്രകടമായില്ല. ഇതോടെ സംശയങ്ങള്‍ ഉടലെടുത്തു. ഭക്ഷണം പുറത്തുനിന്നാക്കിയതോടെ ശരീരത്തിലെ ക്ഷീണം മാറി. ഇതേത്തുടര്‍ന്നാണ് ഭാര്യയുടെ കൂട്ടുകാരികൂടിയായ കുടുംബ സുഹൃത്തിന്റെ സഹായം തേടിയതെന്ന് സതീഷ് പൊലീസിന് നല്‍കിയ മൊഴിയില്‍ പറയുന്നു.

2015 മുതല്‍ മാനസിക രോഗത്തിനുള്ള മരുന്ന് മൂന്നു നേരവും ഭക്ഷണത്തിലും വെള്ളത്തിലും കലര്‍ത്തി നല്‍കിയിരുന്നതായി ആശ സുഹൃത്തിനോട് വെളിപ്പെടുത്തി. പാലാ മുരിക്കുംപുഴ സ്വദേശിനിയായ ആശയെ 2006ലാണ് തിരുവനന്തപുരം ചിറയിന്‍കീഴ് സ്വദേശിയായ സ്തീഷ് വിവാഹം ചെയ്തത്.

അതേസമയം പാലാ ഡിവൈഎസ്പിക്ക് കൈമാറിയ പരാതിയില്‍ മൊഴി രേഖപ്പെടുത്തി കേസ് രജിസ്റ്റര്‍ ചെയ്തു. പാലാ എസ്എച്ച്ഒ കെ പി തോംസന്റെ നേതൃത്വത്തില്‍ അന്വേഷണം നടത്തി. തുടര്‍ന്ന് വീട് റെയ്ഡ് ചെയ്ത് മരുന്നുകള്‍ പിടിച്ചെടുത്ത ശേഷം പ്രതിയെ അറസ്റ്റ് ചെയ്യുകയായിരുന്നു. ഇതിന് പിന്നില്‍ മറ്റാര്‍ക്കെങ്കിലും പങ്കുള്ളതായി കണ്ടെത്തിയിട്ടില്ല. സുഹൃത്തുക്കള്‍ മുഖേനയും ഇന്റര്‍നെറ്റില്‍ നിന്നുമാണ് മാരകമായ ആന്റിബയോട്ടിക്കുകളെ സംബന്ധിച്ച വിവരം ലഭിച്ചതെന്നാണ് പ്രതി പൊലീസിനോട് പറഞ്ഞത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.