ഈ മാസം 22നും 30നും ഇടയിലായി സ്‌കൂള്‍ വാര്‍ഷിക പരീക്ഷ  നടത്തിയേക്കും. ഇതുസംബന്ധിച്ച് ഏതാനും ദിവസത്തിനകം തീരുമാനമെടുക്കും. ഏപ്രില്‍ ആദ്യവാരം പരീക്ഷ നടത്തുമെന്നായിരുന്നു നേരത്തേ വിദ്യാഭ്യാസ മന്ത്രി അറിയിച്ചിരുന്നത്.

എന്നാല്‍, ഈ സമയത്ത് എസ്.എസ്.എല്‍.സി, പ്ലസ് ടു പരീക്ഷകള്‍ നടക്കുന്നതിനാല്‍ ഇതിനിടയില്‍ വാര്‍ഷിക പരീക്ഷ നടത്താനാകില്ലെന്ന് വന്നതോടെയാണ് പരീക്ഷ മാര്‍ച്ച് അവസാനത്തിലേക്ക് മാറ്റാന്‍ ശ്രമം നടക്കുന്നത്. മാര്‍ച്ച് 16ന് തുടങ്ങുന്ന എസ്.എസ്.എല്‍.സി, പ്ലസ് ടു മോഡല്‍ പരീക്ഷകള്‍ മാര്‍ച്ച് 21ന് അവസാനിക്കും.

ഈ സാഹചര്യത്തില്‍ മാര്‍ച്ച് 22നും 30നും ഇടയില്‍ പരീക്ഷ നടത്താനുള്ള ശ്രമങ്ങളാണ് നടത്തുന്നത്. പ്ലസ് ടു പരീക്ഷ മാര്‍ച്ച് 30നും എസ്.എസ്.എല്‍.സി പരീക്ഷ മാര്‍ച്ച് 31നുമാണ് ആരംഭിക്കുന്നത്.

മാര്‍ച്ച് അവസാനം സ്‌കൂള്‍ വാര്‍ഷിക പരീക്ഷ നടത്താനുള്ള ശ്രമത്തിന്റെ ഭാഗമായി ചോദ്യപേപ്പര്‍ അച്ചടി വേഗത്തിലാക്കാനും നിര്‍ദേശം നല്‍കിയിട്ടുണ്ട്. ഒന്നു മുതല്‍ നാലു വരെ ക്ലാസുകള്‍ക്ക് പരീക്ഷക്കുപകരം പഠന നേട്ടം വിലയിരുത്തുന്ന വര്‍ക്ക് ഷീറ്റുകള്‍ തയാറാക്കി നല്‍കുകയാണ്.

ഇവ 22നകം സ്‌കൂളുകളില്‍ വിതരണം ചെയ്യണമെന്നാണ് ചുമതലയുള്ള സമഗ്രശിക്ഷ കേരള (എസ്.എസ്.കെ)ക്കുള്ള നിര്‍ദേശം. അഞ്ചു മുതല്‍ ഏഴു വരെ ക്ലാസുകളുടെ ചോദ്യപേപ്പര്‍ തയാറാക്കുന്ന ചുമതലയും എസ്.എസ്.കെക്കാണ്. ചോദ്യപേപ്പര്‍ തയാറാക്കുന്ന നടപടികള്‍ ഏറക്കുറെ പൂര്‍ത്തിയാക്കിയിട്ടുണ്ട്.


എട്ട്, ഒമ്പത് ക്ലാസുകളിലെ പരീക്ഷക്കുള്ള ചോദ്യപേപ്പര്‍ എസ്.സി.ഇ.ആര്‍.ടിയുടെ മേല്‍നോട്ടത്തില്‍ ജില്ല വിദ്യാഭ്യാസ പരിശീലന കേന്ദ്രങ്ങളില്‍ (ഡയറ്റ്) ഏറക്കുറെ പൂര്‍ത്തിയായിട്ടുണ്ട്. ഇവയുടെ പരിശോധന വെള്ളിയാഴ്ചക്കകം എസ്.സി.ഇ.ആര്‍.ടി പൂര്‍ത്തിയാക്കി അച്ചടിക്കായി എസ്.എസ്.കെക്കായി കൈമാറിയേക്കും.