സഖാവ് കോടിയേരി പിഴയടക്കും. ഇല്ലെങ്കില്‍ സി പി എം കാണിച്ച ക്രൂരതക്ക് കൊച്ചി നഗരസഭാ സെക്രട്ടറി ബലിയാടാവും. സി പി എം സംസ്ഥാന സമ്മേളനത്തിന് കൊച്ചിയിലെ ഫുട്പാത്തുകളില്‍ അനധികൃതമായ കൊടിതോരണങ്ങള്‍ സ്ഥാപിക്കുന്നത് തടയാതിരുന്ന നഗരസഭാ സെക്രട്ടറിക്കെതിരെ ഹൈക്കോടതി നടപടിയെടുക്കുമെന്നാണ് സൂചന.

മുഖ്യമന്ത്രിയും ചില സി പി എം നേതാക്കളും തനിക്കെതിരെ നടത്തിയ ചില പരാമര്‍ശങ്ങളാണ് ജസ്റ്റിസ് ദേവന്‍ രാമചന്ദ്രനെ ചൊടിപ്പിച്ചത്.ആദ്യം നടപടിയെടുക്കാതെ ഒഴിഞ്ഞു മാറിയ ജഡ്ജി പരസ്യ പ്രതികരണങ്ങള്‍ കേട്ടാണ് പ്രകോപിതനായത്.

കൊച്ചി കോര്‍പ്പറേഷനെതിരെ രൂക്ഷവിമര്‍ശനവുമാണ് ഹൈക്കോടതി നടത്തിയത്. നിയമവിരുദ്ധമായി കൊടികള്‍ സ്ഥാപിച്ചത് ആരാണ് എന്നത് ഹൈക്കോടതിക്ക് വിഷയമല്ല. ആര് നിയമവിരുദ്ധമായി കൊടിതോരണങ്ങള്‍ സ്ഥാപിച്ചാലും നടപടി സ്വീകരിക്കുമെന്നും ജസ്റ്റിസ് ദേവന്‍ രാമചന്ദ്രന്‍ പറഞ്ഞു. അനധികൃതമായി സ്ഥാപിച്ച കൊടിതോരണങ്ങളുടെ വിശദാംശങ്ങള്‍ കൈമാറാത്തതിലാണ് കോര്‍പറേഷന്‍ സെക്രട്ടറിക്ക് നേരെ വിമര്‍ശനം.

സി പി എം സംസ്ഥാന സെക്രട്ടറിക്കെതിരെ സത്യവാങ്മ മൂലം നല്‍കാതിരുന്നാല്‍ നഗരസഭാ സെക്രട്ടറിയുടെ ജോലി തെറിക്കും എന്നതാണ് ഇപ്പോഴത്തെ അവസ്ഥ. കൊടി തോരണങ്ങള്‍ കെട്ടിയതിന്റെ ഉത്തരവാദിത്വം കോടിയേരിക്ക് നല്‍കേണ്ട സാഹചര്യമാണ് നഗരസഭക്ക് മുന്നിലുള്ളത്.സി പി എമ്മിന്റെ സംസ്ഥാന സമ്മേളനമായതുകൊണ്ടാണ് സംസ്ഥാന സെക്രട്ടറിക്കെതിരെ സത്യവാങ് മൂലം നല്‍കേണ്ടി വരുന്നത്.

ഇക്കാര്യത്തില്‍ ഹൈക്കോടതിക്ക് പ്രത്യേക താല്‍പര്യങ്ങളി ല്ലെന്ന് ന്യായാധിപന്‍ പറഞ്ഞു. കോര്‍പറേഷന്‍ അനുമതിക്ക് വിരുദ്ധമായി ഫുട്പാത്തില്‍ കൊടിതോരണങ്ങള്‍ സ്ഥാപിച്ചത് എങ്ങനെയാണ്. നിയമലംഘനങ്ങളുടെ നേരെ കോര്‍പറേഷന്‍ കണ്ണടച്ചത് എങ്ങനെയാണ്. നടപടിയെടുക്കാന്‍ പേടിയാണെങ്കില്‍ കോര്‍പറേഷന്‍ സെക്രട്ടറി തുറന്ന് പറയണം. പേടിയില്ലാത്ത ഉദ്യോഗസ്ഥര്‍ ഉണ്ടാകുമെന്നാണ് പ്രതീക്ഷിക്കുന്നതെന്നും ജസ്റ്റിസ് ദേവന്‍ രാമചന്ദ്രന്‍ അഭിപ്രായപ്പെട്ടു.

അതായത് സി പി എമ്മിനെ പേടിയാണോ എന്നാണ് കോടതി നഗരസഭാ സെക്രട്ടറിയോട് ചോദിച്ചത്.

കൊടിതോരണങ്ങള്‍ സ്ഥാപിച്ചതിനെതിരെ ദിവസങ്ങള്‍ക്ക് മുമ്പേയും കോടതിയുടെ വിമര്‍ശനം ഉണ്ടായിരുന്നു. കോടതിയുടെ ഒട്ടേറെ ഉത്തരവുകളുണ്ടായിട്ടും നിയമം പരസ്യമായി ലംഘിക്കപ്പെടുന്നുവെന്ന് അന്ന് ജസ്റ്റിസ് ദേവന്‍ രാമചന്ദ്രന്‍ അഭിപ്രായപ്പെട്ടിരുന്നു.

ഒരു രാഷ്ട്രീയ പാര്‍ട്ടിക്ക് എന്തും ചെയ്യാമെന്നാണോ കരുതുന്നതെന്നും കോടതി ചോദിച്ചിരുന്നു. വിമര്‍ശനമുന്നയിക്കുമ്പോള്‍ മറ്റൊരു പാര്‍ട്ടിയുടെ വക്താവായി തന്നെ ആക്ഷേപിക്കുകയാണ്. പാര്‍ട്ടി നിയമം ലംഘിക്കുമ്പോള്‍ സര്‍ക്കാര്‍ കണ്ണടക്കുന്നു. പാവപ്പെട്ടവര്‍ ഹെല്‍മെറ്റ് വച്ചില്ലെങ്കില്‍ പിഴ ഈടാക്കുന്നു. ഇതാണോ കേരളം അഭിമാനിക്കുന്ന നിയമവ്യവസ്ഥിതിയെന്നും ജസ്റ്റിസ് ദേവന്‍ രാമചന്ദ്രന്‍ ചോദിച്ചിരുന്നു. റോഡില്‍ നിറയെ ഭരണ കക്ഷിയുടെ കൊടികള്‍ ആണെന്ന് അമിക്കസ് ക്യൂരി കോടതിയെ അറിയിക്കുകയായിരുന്നു.

കലൂരില്‍ അടക്കം ഇപ്പോഴും നിരവധി ബോര്‍ഡുകള്‍ കാണാം. ഹൈക്കോടതി നോക്ക് കുത്തി ആണെന്ന് ധരിക്കരുത്. കഴിഞ്ഞ 3 വര്‍ഷമായി കോടതി ഇക്കാര്യം പറയുന്നു. നിയമലംഘനത്തിന് എതിരെ ഒരു നടപടിയും ഉണ്ടാകുന്നില്ലെന്നും കോടതി വിമര്‍ശിച്ചു.

നഗരസഭകള്‍ക്ക് നിയമലംഘനത്തിനെതിരെ മിണ്ടാന്‍ ധൈര്യമില്ലെന്നും കോടതി ചോദിച്ചു. കൊടിതോരണങ്ങള്‍ സ്ഥാപിക്കാന്‍ സിപിഎമ്മിന് അനുമതി നല്‍കിയിട്ടുണ്ടെന്ന് കൊച്ചി കോര്‍പറേഷന്‍ മറുപടി നല്‍കി. അഞ്ചാം തിയതിക്ക് ശേഷം എല്ലാ കൊടിതോരണങ്ങളും നീക്കം ചെയ്യുമെന്നും കൊച്ചി കോര്‍പറേഷന്‍ പറഞ്ഞിരുന്നു.

റോഡ് സുരക്ഷാ ചട്ടങ്ങള്‍ ലംഘിച്ചുള്ള കൊടിതോരണങ്ങളുടെ കാര്യത്തില്‍ നടപടിയെടുക്കണമെന്ന് കോടതി പറഞ്ഞു. പൊതുസ്ഥലങ്ങളിലെ അനധികൃത കൊടിതോരണങ്ങളുടെ വിശദാംശങ്ങള്‍ കൈമാറാന്‍ നഗരസഭകള്‍ക്ക് നിര്‍ദേശം നല്‍കി. കൊടിതോരണങ്ങള്‍ സ്ഥാപിക്കാന്‍ നല്‍കിയ അനുമതി ഹാജരാക്കാന്‍ കൊച്ചി കോര്‍പറേഷനോടും നിര്‍ദേശിച്ചു. ചട്ടവിരുദ്ധമായി കൊടിതോരണങ്ങളും ഇന്‍സ്റ്റലേഷനുകളും സ്ഥാപിക്കാന്‍ അനുമതി നല്‍കിയതില്‍ കടുത്ത അതൃപ്തിയെന്ന് കോടതി അറിയിച്ചു. ജനങ്ങളുടെ ജീവന്‍ അപകടത്തിലാക്കിയല്ല രാഷ്ട്രീയ പാര്‍ട്ടികളുടെ സമ്മേളനം നടത്തേണ്ടതെന്നും കോടതി പറഞ്ഞു. സമ്മേളന ശേഷം കൊടിതോരണങ്ങള്‍ നീക്കം ചെയ്തതിന്റെ പുരോഗതി അറിയിക്കാനും ഹൈക്കോടതി നിര്‍ദേശിക്കുകയായിരുന്നു.

ഏതായാലും തികഞ്ഞ നിയമ ലംഘനമാണ് ഇക്കാര്യത്തിലുണ്ടായതെന്ന് വ്യക്തമാണ്. അതു കൊണ്ടു തന്നെ നഗരസഭാ സെക്രട്ടറിക്ക് ഒഴിഞ്ഞുമാറാനാവില്ല. കോടിയേരി ബാലകൃഷ്ണന് വിശദീകരണം ആവശ്യപ്പെ്ട്ട് നഗരസഭ നോട്ടീസ് നല്‍കും. കുറഞ്ഞ പക്ഷം നിയമ ലംഘനത്തിന് പിഴയയെങ്കിലും നല്‍കേണ്ടി വരും.