ശ്രീനിവാസന് വധത്തില് നേരിട്ട് പങ്കെടുത്തവരടക്കം നാല് പ്രതികള് അറസ്റ്റില്; രണ്ടുപേര് ഗൂഡാലോചനയില് പങ്കെടുത്തവര്; ശ്രീനിവാസനെ കൊലപ്പെടുത്തുന്ന സമയത്ത് സ്ഥലത്തുണ്ടായിരുന്നവരും പിടിയില്
പാലക്കാട് ശ്രീനിവാസന് വധക്കേസില് കൊലയാളി സംഘത്തിലെ നാലുപേര് അറസ്റ്റില്. ബിലാല്,റസ്വാന്,റിയാസ് ഖാന്,സഹദ് എന്നിവരാണ് അറസ്റ്റിലായത്. കൃത്യത്തില് നേരിട്ട് പങ്കെടുത്തവര്ക്ക് സാഹചര്യം ഒരുക്കി നല്കിയത് ഇവരാണ്. ശ്രീനിവാസനെ കൊല്ലാന് ബൈക്കിലെത്തിയ ആറുപേര് ഇപ്പോഴും ഒളിവിലാണ്. കേസില് കൂടുതല് പ്രതികള് ഉണ്ടെന്ന് എഡിജിപി വിജയ് സാഖറെ പറഞ്ഞു.
മുഹമ്മദ് ബിലാലും റിയാസൂദ്ദിനും ഗൂഡാലോചനയില് പങ്കെടുക്കുകയും ശ്രീനിവാസനെ കൊലപ്പെടുത്തുന്ന സമയത്തു സ്ഥലത്ത് ഉണ്ടായിരുന്നവരാണ്. റിസ്വാന് കൃത്യത്തില് പങ്കെടുത്തവരുടെ ഫോണുകള് ശേഖരിച്ചു അവരവരുടെ വീടുകളില് എത്തിച്ചു കൊടുത്തു. സഹദ് ഗൂഢാലോചനയില് പങ്കെടുക്കുകയും മറ്റ് സഹായങ്ങള് ചെയ്ത് കൊടുക്കുകയും ചെയ്തയാളാണ്.
ശ്രീനിവാസനെ കൊലപ്പെടുത്താന് മൂന്ന് ബൈക്കുകളിലായി ആറംഗ സംഘം എത്തുന്നതിന് മുന്പ് തന്നെ മേലാമുറിയില് സഹായികളായി ചിലര് നിലയുറപ്പിച്ചിട്ടുണ്ടായിരുന്നു. ശ്രീനിവാസന്റെ നീക്കങ്ങള് മനസിലാക്കി കൊലയാളി സംഘത്തെ വിളിച്ചു വരുത്തിയതും കൃത്യത്തിന് ശേഷം അവര്ക്ക് രക്ഷപ്പെടാന് വഴിയൊരുക്കിയതും ഇവരായിരുന്നു. ഈ സംഘത്തിലെ 4 പേരാണ് പിടിയിലായത്. കേസില് 16 പേര് പ്രതികളാകുമെന്ന് ഇപ്പോള് കരുതുന്നു. ഗൂഢാലോചനയില് കൂടുതല് പേരുണ്ട്. പോപ്പുലര് ഫ്രണ്ട് പ്രവര്ത്തകന് സുബൈര് കൊല്ലപ്പെട്ട അന്നാണ് കൊലപാതകം പദ്ധതിയിട്ടത്. ജില്ലാ ആശുപത്രി മോര്ച്ചറിക്ക് പുറകില് ഇരുന്നാണ് പ്രതികള് കൊലപാതകം ആസൂത്രണം ചെയ്തത് എന്നും എഡിജിപി അറിയിച്ചു.
സുബൈര് വധത്തില് മൂന്ന് പ്രതികളെ അറസ്റ്റ് ചെയ്തെങ്കിലും ഗൂഡാലോചനയിലേക്ക് പൊലീസിന് എത്താനായിട്ടില്ല. സുബൈര് വധത്തില് പ്രതികള് പോയ വഴികളിലെ സിസിടിവി ദൃശ്യങ്ങളും ഫോണ് കോളുകളും പരിശോധിച്ച ശേഷമാണ് പൊലീസ് പ്രതികളിലേക്ക് എത്തിയത്.
https://www.facebook.com/Malayalivartha
