ഉത്തരേന്ത്യന്‍ സംസ്ഥാനങ്ങളില്‍ താപനില അതിരൂക്ഷമായതോടെ മിക്ക ഇടങ്ങളിലും കേന്ദ്ര കാലാവസ്ഥാ വകുപ്പ് ഉഷ്ണ തരംഗ മുന്നറിയിപ്പ് നല്‍കിയിരിക്കുകയാണ്. പശ്ചിമ ബംഗാളിലെ ബംഗുര, പുരുലിയ, ജാര്‍ഗം തുടങ്ങിയ ജില്ലകളില്‍ താപനില 40 ഡിഗ്രി സെല്‍ഷ്യസ് കടന്നു. ഉത്തരേന്ത്യയിലെ അതി കഠിന ചൂട് തെക്കന്‍ സംസ്ഥാനങ്ങളിലും പ്രഭാവം തീര്‍ക്കുകയാണ്. കേരളത്തില്‍ 32 ഡിഗ്രി സെല്‍ഷ്യസാണ് നിലവിലെ താപനില.

കഴിഞ്ഞ 122 വര്‍ഷങ്ങളിലെ ഏറ്റവും ചൂടേറിയ മാര്‍ച്ച് മാസമാണ് ഈ വര്‍ഷം കഴിഞ്ഞ് പോയത്. ഇതിന് മുമ്പ് ഏറ്റവും അധികം ചൂടുണ്ടായത് 2010 ലെ മാര്‍ച്ച് മാസത്തിലായിരുന്നു. എന്നാല്‍ ഈ വര്‍ഷത്തെ താപനില അതിലും വളരെ കൂടുതലാണെന്ന് കാലാവസ്ഥാ വകുപ്പ് പറഞ്ഞു. സാധാരണയായി മാര്‍ച്ച് മാസത്തില്‍ ശരാശരി 33.1 ഡിഗ്രി സെല്‍ഷ്യസ് താപനിലയാണ് രേഖപ്പെടുത്താറുള്ളത്. എന്നാല്‍ ഈ വര്‍ഷം ഇത് 33.9 ഡിഗ്രി സെല്‍ഷ്യസായി ഉയര്‍ന്നിട്ടുണ്ട്.

വടക്കേ ഇന്ത്യയില്‍ മഴയുടെ അളവ് ഗണ്യമായി കുറഞ്ഞതാണ് ചൂട് വര്‍ധിക്കാന്‍ കാരണമെന്നാണ് കാലാവസ്ഥ വകുപ്പ് അറിയിക്കുന്നത്. അതെ സമയം ഏപ്രിലിലും രാജ്യത്ത് ഹീറ്റ് വേവ് ഉണ്ടാകുമെന്ന് കാലാവസ്ഥ വകുപ്പ് പ്രവചിച്ചിട്ടുണ്ട്. സാധാരണ നിലയില്‍ നിന്ന് 4.5 6.4 ഡിഗ്രി സെല്‍ഷ്യസ് വരെ താപനില ഉയരുമ്പോഴാണ് ഹീറ്റ് വേവായി കണക്കാക്കുന്നത്.

ഇതോടെ കൂടി ചൂട് 40 ഡിഗ്രി സെല്‍ഷ്യസ് വരെ ഉയരുമെന്നാണ് കണക്കാക്കുന്നത്. മനുഷ്യ ശരീരത്തിന് ഹാനികരമായ തരത്തില്‍ ചൂട് വര്‍ധിക്കുമ്പോഴും ഹീറ്റ് വേവ് പ്രഖ്യാപിക്കാറുണ്ട്. തമിഴ്‌നാട്ടിലും, കേരളത്തിലും ഒഡിഷയിലുമൊക്കെ താപനില ക്രമാതീതമായി ഉയര്ന്നിട്ടുണ്ട്. അസം, മേഘാലയ, ത്രിപുര, പശ്ചിമ ബംഗാള്‍, ബീഹാര്‍, ജാര്‍ഖണ്ഡ്, ഒഡീഷ, ഛത്തീസ്ഗഡ്, ഉത്തര്‍പ്രദേശ്, ഹരിയാന, പഞ്ചാബ് എന്നിവിടങ്ങളില്‍ വരും ദിവസങ്ങളില്‍ താപനില വര്‍ധിക്കുമെന്നും അറിയിച്ചിട്ടുണ്ട്.

അതേസമയം, ഡല്‍ഹിയില്‍ താപനില 46 ഡിഗ്രി സെല്‍ഷ്യസ് വരെ ഉയരാന്‍ സാധ്യതയെന്ന് റിപ്പോര്‍ട്ട്. ഈ സാഹചര്യത്തില്‍ തലസ്ഥാനത്ത് ഏപ്രില്‍ 28 മുതല്‍ യെല്ലോ അലേര്‍ട്ട് പുറപ്പെടുവിച്ചിരിക്കുകയാണ്. ഡല്‍ഹിയിലെ സഫ്ദര്‍ജംഗ് കാലാവസ്ഥാ നിരീക്ഷണകേന്ദ്രത്തില്‍ ചൊവ്വാഴ്ച താപനില 40.8 ഡിഗ്രി സെല്‍ഷ്യസ് രേഖപ്പെടുത്തിയിരുന്നു. ഇന്ന് 42 ഡിഗ്രിയാണ് ചൂട്. വ്യാഴാഴ്ചയോടെ താപനില 44 ഡിഗ്രി സെല്‍ഷ്യസിലേക്ക് ഉയരാന്‍ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കിയിട്ടുണ്ട്.

2017 ഏപ്രില്‍ 21ന് ഡല്‍ഹിയിലെ 43.2 ഡിഗ്രി സെല്‍ഷ്യസ് ആണ് രേഖപ്പെടുത്തിയത്. മാര്‍ച്ച് അവസാന വാരത്തോടെ രാജ്യത്തിന്റെ വടക്കു പടിഞ്ഞാറന്‍ സംസ്ഥാനങ്ങളില്‍ ചൂട് ഉയര്‍ന്ന തോതിലെത്തുമെന്നാണ് സൂചന. ഉത്തരേന്ത്യയില്‍ സജീവമായിരുന്ന പടിഞ്ഞാറന്‍ വാതത്തിന്റെ അഭാവവും ദക്ഷിണേന്ത്യയിലെ കാലാവസ്ഥാ വ്യതിയാനവുമാണ് ഇതിന് കാരണമായി കാലാവസ്ഥാ വിദഗ്ധര്‍ ചൂണ്ടിക്കാട്ടുന്നത്.

താപനില ഉയര്‍ന്ന പ്രദേശങ്ങളില്‍ താമസിക്കുന്ന പ്രായമായവര്‍ക്കും കുട്ടികള്‍ക്കും ആരോഗ്യപ്രശ്‌നങ്ങള്‍ ഉണ്ടാകാനിട!!യുള്ളതിനാല്‍ ജാഗ്രത പുലര്‍ത്തണമെന്ന് കേന്ദ്ര കാലാവസ്ഥാവകുപ്പ് മുന്നറിയിപ്പ് നല്‍കി. ഡല്‍ഹിയില്‍ ഉഷ്ണതരംഗത്തിനുള്ള സാധ്യതയുണ്ടെന്നും റിപ്പോര്‍ട്ടുണ്ട്.