പാലക്കാട് രാത്രി ലയത്തില്‍ നിന്നും കുതിരകള്‍ ഇറങ്ങിയോടി.... ദേശീയപാതയിലൂടെ ഓടിയ കുതിരകളില്‍ മൂന്നെണ്ണത്തിന് വാഹനങ്ങളിടിച്ചു, ഒരു കുതിര ചത്തു, കുതിരയുമായുണ്ടായ കൂട്ടിയിടിയില്‍ ബൈക്ക് യാത്രക്കാരന് ഗുരുതര പരുക്ക്.
കുതിരാനു സമീപത്തായി ഇരുമ്പുപാലത്തെ സ്വകാര്യ ഹോഴ്സ് റൈഡിങ് അക്കാദമിയിലെ കുതിരകളാണ് ഇറങ്ങിയോടിയത്. ബുധനാഴ്ച രാത്രി 11നാണ് സംഭവം നടന്നത്.

കാട്ടാനയുടെ ശബ്ദം കേട്ടു പരിഭ്രാന്തരായ ഏഴ് കുതിരകളാണ് ചാടിപ്പോയത്.. ദേശീയപാതയിലൂടെ ഓടിയ കുതിരകളില്‍ മൂന്നെണ്ണത്തിനെ വാഹനങ്ങളിടിച്ചു. ഒരു കുതിര ചത്തു. ഒന്നിന്റെ നില ഗുരുതരമാണ്. കുതിരയുമായുണ്ടായ കൂട്ടിയിടിയില്‍ ബൈക്ക് യാത്രക്കാരനു ഗുരുതരമായി പരുക്കേറ്റു.

പട്ടിക്കാട് തെക്കുംഭാഗം മേലേവീട്ടില്‍ നിതീഷ് കുമാറിനാണ് (21) പരുക്കേറ്റത്. ഇയാളെ തൃശൂര്‍ ജനറല്‍ ആശുപത്രിയില്‍ പ്രവേശിപ്പിച്ചു. മേലേചുങ്കത്തായിരുന്നു അപകടമുണ്ടായത്. കാട്ടാനയുടെ ശബ്ദം കേട്ടു പരിഭ്രാന്തരായാണു കുതിരകള്‍ ലായത്തില്‍ നിന്നു പുറത്തുചാടിയതെന്നാണ് പ്രാഥമിക നിഗമനം.

കുന്നുംപുറം ബാബുവിന്റെ ഉടമസ്ഥതയിലുള്ള ഹോഴ്സ് റൈഡിങ് അക്കാദമിയിലെ കുതിരകളാണു ലായത്തില്‍ നിന്നു ചാടി ദേശീയപാതയിലൂടെ ഓടിയത്. പീച്ചി റിസര്‍വോയറിനോടു ചേര്‍ന്നാണു കുതിരയോട്ട പരിശീലന കേന്ദ്രമുള്ളത്. ഓട്ടത്തിനിടെ വാണിയമ്പാറ, മേലേചുങ്കം, മേരിഗിരി എന്നിവിടങ്ങളിലാണു കുതിരകള്‍ വിവിധ വാഹനങ്ങളുമായി കൂട്ടിയിടിച്ചത്. ബാക്കി കുതിരകളെ നാട്ടുകാരുടെ സഹായത്തോടെയാണ് പിടിച്ചു കെട്ടിയത്.