ഉറ്റവര്‍ പോയതറിയാതെ.... സൗദിയിലേക്ക് പോകാനായി വിമാനത്താവളത്തിലേക്ക് പോകവേ അമ്പലപ്പുഴ കാര്‍ അപകടത്തില്‍ ഗുരുതരമായ പരുക്കുകളോടെ തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന ഷൈനിയുടെ ആരോഗ്യനിലയില്‍ പുരോഗതി, മയക്കം മാറി കണ്ണ് തുറക്കുമ്പോള്‍ കണ്ണീരൊഴുക്കി മകനെ തിരക്കുന്നു, മറുപടി പറയാനാകാതെ നെഞ്ചുപൊട്ടി കണ്ണീരോടെ ബന്ധുക്കള്‍.

ഐസിയുവില്‍ നിന്ന് ഷൈനിയെ വാര്‍ഡിലേക്ക് മാറ്റിയിട്ടുണ്ട്. അപകടത്തില്‍ ഭര്‍ത്താവ് സുധീഷ് ലാലും ഏക മകന്‍ നിരഞ്ജനും സഹോദരന്‍ ഷൈജുവും അടുത്ത ബന്ധു അഭിരാഗും അടക്കം യാത്രയില്‍ തനിക്കൊപ്പമുള്ള എല്ലാവരും മരിച്ച വിവരം ഷൈനിയെ ഇതുവരെ അറിയിച്ചിട്ടില്ല.

മരുന്നുകളുടെ മയക്കം മാറി കണ്ണ് തുറക്കുമ്പോള്‍ കണ്ണീരൊഴുക്കി മകനെ തിരക്കുന്നുണ്ട് ഷൈനി. എന്തു പറയും എങ്ങനെ പറയുമെന്ന് ഓരോരുത്തരും നെഞ്ചു നീറി നില്‍ക്കുകയാണ്. നെറ്റിയോട് ചേര്‍ന്നുള്ള മുറിവില്‍ തയ്യല്‍ ഇട്ടിട്ടുണ്ട്. തലയില്‍ രണ്ടിടത്ത് രക്തം കട്ട പിടിച്ചിട്ടുണ്ട്. വലത് കയ്യില്‍ പൊട്ടലും, മുഖത്തും ദേഹത്തിന്റെ പലഭാഗങ്ങളിലും മുറിവുകളും ഉണ്ട്.


ഗള്‍ഫിലേക്ക് ജോലിക്കായി ഷൈനിക്ക് വീസ ലഭിച്ചതിനെത്തുടര്‍ന്ന് നെടുമ്പാശേരി വിമാനത്താവളത്തിലേക്ക് നെടുമങ്ങാട്ടു നിന്നുള്ള യാത്രയില്‍ അമ്പലപ്പുഴയില്‍ ബുധനാഴ്ച പുലര്‍ച്ചെ കുടുംബം സഞ്ചരിച്ചിരുന്ന കാര്‍ ലോറിയുമായി കൂട്ടിയിടിക്കുകയായിരുന്നു.

ഷൈനിയുടെ ഏക മകന്‍ നിരഞ്ജന്‍(12), ഭര്‍ത്താവ് സുധീഷ് ലാല്‍, സഹോദരന്‍ ഷൈജു, സുധീഷിന്റെ പിതൃസഹോദരന്‍ അഭിരാഗ് എന്നിവര്‍ മരിച്ചു. സുധീഷ് ഓടിച്ച കാര്‍ എതിരെ വന്ന ലോറിയിലേക്ക് നിയന്ത്രണം വിട്ട് ഇടിച്ചു കയറുകയായിരുന്നു .



സുധീഷ് ലാലിന്റെയും നിരഞ്ജന്റെയും സഞ്ചയനം ആനാട്ട് നെട്ടറക്കോണത്തെ വീട്ടില്‍ ഞായറാഴ്ച 9നും ഷൈജുവിന്റേയും, അഭിരാഗിന്റെയും സഞ്ചയനം ചൊവ്വാഴ്ച 9ന് പരുത്തികുഴിയിലെ വീടുകളിലുമാണ് നടത്തുക.

അതേസമയം എല്ലാം അറിഞ്ഞു കഴിയുമ്പോള്‍ അവള്‍ എങ്ങനെ ഉള്‍ക്കൊള്ളുമെന്ന് പറയാനാവില്ല. ഏക മകനേയും ഭര്‍ത്താവിന്റെയും സഹോദരന്റെയും ബന്ധുവിന്റെയും മരണം അതായത് തനിക്കൊപ്പം വന്ന എല്ലാപേരേയും മരണം കവര്‍ന്നെടുത്തു എന്ന വാര്‍ത്ത കേള്‍ക്കുമ്പോള്‍ അവള്‍ എങ്ങനെ സഹിക്കും എന്ന ചിന്തയിലാണ് ഉറ്റവരെല്ലാം.