നടനും നിര്‍മ്മാതാവുമായ വിജയ് ബാബുവിനെതിരെയുള്ള ലൈംഗീക പീഡന കേസില്‍ ചലച്ചിത്ര പ്രവര്‍ത്തകരുടെ അടക്കം എട്ടുപേരുടെ മൊഴി എടുത്തു. കൂടുതല്‍ സാക്ഷികളുടെ മൊഴി ഇന്ന് രേഖപ്പെടുത്തും. വിജയ് ബാബുവിന്റെ ഫ്‌ലാറ്റില്‍ അടക്കം നടത്തിയ പരിശോധനയില്‍ സംഭവത്തിന് ശരിവയ്ക്കുന്ന തെളിവുകള്‍ ലഭിച്ചതായാണ് റിപ്പോര്‍ട്ട്. കേസില്‍ മുന്‍കൂര്‍ ജാമ്യത്തിനായി വിജയ് ബാബു ഇന്ന് അപേക്ഷ നല്‍കും.

വിജയ് ബാബുവിനെതിരെ പ്രഥമ ദൃഷ്ട്യ തെളിവുണ്ടെന്ന് കൊച്ചി സിറ്റി പൊലീസ് കമ്മിഷണര്‍ സി.എച്ച്.നാഗരാജു പറഞ്ഞു. പരിശോധന നടത്തിയ രണ്ട് സ്ഥലങ്ങളില്‍നിന്ന് ശാസ്ത്രീയ തെളിവ് ലഭിച്ചു. പ്രതിയെ കണ്ടെത്താന്‍ പൊലീസ് ലുക്ക്ഔട്ട് സര്‍ക്കുലര്‍ പുറത്തിറക്കി.

യുവനടി നല്‍കിയ പരാതിയില്‍ പറഞ്ഞ ഇടങ്ങളിലും സമയത്തും വിജയ് ബാബുവിന്റെ സാന്നിധ്യം അന്വേഷണ സംഘം കണ്ടെത്തി. രണ്ട് സ്ഥലങ്ങളില്‍ പൊലീസ് പരിശോധന നടത്തി. സിസി ടി വി ദൃശ്യങ്ങടക്കം ശേഖരിച്ചു. നിലവില്‍ ലഭിച്ച തെളിവുകളുടെ അടിസ്ഥാനത്തില്‍ പ്രഥമ ദൃഷ്ട്യാ കേസ് നിലനില്‍ക്കുമെന്ന് സിറ്റി പൊലീസ് കമ്മീഷണര്‍ സി.എച്ച്.

നാഗരാജു പറഞ്ഞു. വിജയ് ബാബുവിനെ കണ്ടെത്താന്‍ ലുക്ക് ഔട്ട് സര്‍ക്കുലര്‍ ഇറക്കി. രാജ്യം വിട്ടോയെന്ന് കണ്ടെത്താന്‍ എമിഗ്രേഷന്‍ വിശദാംശങ്ങളും പരിശോധിക്കുന്നുണ്ട്. വിജയ് ബാബുവിനെതിരെ ഇതുവരെ മറ്റ് സ്ത്രീകള്‍ പരാതി നല്‍കിയിട്ടില്ല. പരാതി വന്നാല്‍ പരിശോധിക്കുമെന്നും കമ്മീഷണര്‍ പറഞ്ഞു.