ഉച്ചഭക്ഷണം കഴിക്കാനെത്തി മടങ്ങവേ മക്കളുടെ മുന്നില്‍വച്ച് യുവതിയെ ഉറ്റബന്ധു തടഞ്ഞു നിര്‍ത്ത് വെട്ടി..... രക്ഷിക്കാനെത്തിയവരെ കത്തി കാട്ടി ഭീഷണിപ്പെടുത്തി, 20 മിനിറ്റോളം രക്തംവാര്‍ന്ന് റോഡില്‍ കിടന്നു, ഒടുവില്‍ പൊലീസെത്തി അനിലിനെ കീഴടക്കി ഷാലുവിനെ ആശുപത്രിയിലേക്ക് മാറ്റി.

ചെമ്മരുതി പഞ്ചായത്തിലെ ചാവടിമുക്ക് തൈപ്പൂയത്തില്‍ സജീവിന്റെ ഭാര്യ ഷാലു(37)വിനെയാണ് ഉറ്റബന്ധു വെട്ടി ഗുരുതരമായി പരുക്കേല്‍പ്പിച്ചത്. മക്കളുടെ മുന്നില്‍ വച്ച് സ്‌കൂട്ടര്‍ തടഞ്ഞാണ് വെട്ടിയത്. ഷാലുവിനെ തിരുവനന്തപുരത്ത് സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചു.

ഇവരുടെ മാതൃസഹോദരീപുത്രനായ അനിലിനെ(47) പൊലീസ് പിടികൂടി. ശാലുവിന്റെ അയല്‍വാസി കൂടെയാണ് അനില്‍. വെട്ടിവീഴ്ത്തിയ ഷാലുവിനെ രക്ഷിക്കാനെത്തിയവരെ അനില്‍ കത്തികാട്ടി വിരട്ടിയോടിച്ചു. പോലീസ് എത്തി അനിലിനെ കീഴടക്കിയതിനു ശേഷമാണ് ഷാലുവിനെ ആശുപത്രിയിലേക്ക് മാറ്റിയത്.

ഏറെ നാള്‍ ഗോവയിലായിരുന്നു അനില്‍. വെല്‍ഡിങ് ജോലി ചെയ്യുന്ന ഇയാള്‍ ഒന്നരമാസമായി നാട്ടിലുണ്ട്. അയിരൂരിലെ സ്വകാര്യ പ്രസില്‍ ഡിടിപി ഓപ്പറേറ്ററാണ് ഷാലു. വീട്ടില്‍ വന്നു ഉച്ചഭക്ഷണം കഴിച്ചു തിരികെ പ്രസിലേക്ക് സ്‌കൂട്ടറില്‍ ഷാലു പോകുമ്പോള്‍ ഇടവഴിയില്‍ അനില്‍ തടഞ്ഞു നിര്‍ത്തിയാണ് കഴുത്തിലും ശരീരത്തിലും വെട്ടിയത്. ഷാലുവിന്റെ മകനാണ് വിവരം ബന്ധുക്കളെ ഫോണില്‍ വിളിച്ച് അറിയിച്ചത്. പരുക്കേറ്റ ഷാലു 20 മിനിറ്റോളം രക്തം വാര്‍ന്നു കിടന്നു.

ഭര്‍ത്താവ് സജീവ് ഗള്‍ഫിലാണ്. ഇവര്‍ തമ്മില്‍ സാമ്പത്തിക ഇടപാടുകള്‍ ഉണ്ടായിരുന്നു . അതിന്റെ പേരില്‍ ഉള്ള തര്‍ക്കമാണ് ആക്രമണം എന്നാണ് പോലീസ് പറയുന്നത്.