വേണ്ടിവന്നാല് അതും ചെയ്യും... വിജയ് ബാബു ദുബായിലേക്ക് കടന്നത് സ്ഥിരീകരിച്ച് പോലീസ്; ദുബായിലേക്ക് കടന്നത് 24ന്; ദുബായില് നിന്നും കടക്കാതിരിക്കാന് ശക്തതമായ നീക്കം; പാസ്പോര്ട്ട് കണ്ട് കെട്ടി എയര്പോര്ട്ടുകളില് ലുക്കൗട്ട് നോട്ടീസും പുറപ്പെടുവിച്ചതോടെ വിജയ് ബാബുവിന് ചലിക്കാന് കഴിയില്ല
ബലാത്സംഗക്കേസിലുള്പ്പെട്ട നടനും നിര്മാതാവുമായ വിജയ് ബാബുവിനെ പൂട്ടാന് പോലീസ് ഏതറ്റംവരെയും പോകാന് തീരുമാനിച്ചു. വിജയ് ബാബുവിനെ കണ്ടെത്താന് പോലീസ് ലുക്കൗട്ട് സര്ക്കുലര് പുറത്തിറക്കി. വിജയ് ബാബു വിദേശത്താണെന്നാണ് പോലീസ് നിഗമനം. വിജയ് ബാബു ദുബായിലേക്ക് കടന്നത് 24നെന്ന് പോലീസ്. കേസെടുത്ത് അന്വേഷണം തുടങ്ങിയതറിഞ്ഞ് വിദേശത്തേക്ക് കടക്കുകയായിരുന്നുവെന്ന് പോലീസ് ഉദ്യോഗസ്ഥര് പറഞ്ഞു.
നാട്ടിലെത്തിയാല് ഉടന് അറസ്റ്റ് ചെയ്യാന് എല്ലാ വിമാനത്താവളങ്ങളിലും അറിയിപ്പ് നല്കിയിട്ടുണ്ട്. വിജയ് ബാബു ഗോവയിലുണ്ടെന്ന സൂചനയെത്തുടര്ന്ന് പോലീസ് സംഘം അവിടെയെത്തിയെങ്കിലും ദുബായിലേക്ക് കടക്കുകയായിരുന്നു. പാസ്പോര്ട്ട് കണ്ട് കെട്ടുന്നതോടെ ദുബായില് നിന്നും ചലിക്കാന് കഴിയില്ല.
വിമാനത്താവളത്തില് എത്തിയാല് ഉടന് പിടികൂടാനാണ് നീക്കം. വിജയ് ബാബുവിനെതിരേ പ്രഥമദൃഷ്ട്യാ തെളിവുണ്ടെന്നും പരാതിയില് പ്രാഥമിക നടപടികള് പൂര്ത്തിയാക്കിയെന്നും സിറ്റി പോലീസ് കമ്മിഷണര് സി.എച്ച്. നാഗരാജു അറിയിച്ചു. അറസ്റ്റ് അനിവാര്യമാണ്. യുവതിയുടെ മൊഴിയെ സാധൂകരിക്കുന്ന തെളിവുകള് അന്വേഷണത്തില് കിട്ടിയതായും കമ്മിഷണര് പറഞ്ഞു.
അതേസമയം പോലീസ് അന്വേഷണം ശക്തമാക്കി. പരാതിയില് സൂചിപ്പിച്ച സ്ഥലങ്ങളിലെത്തി സാക്ഷികളില് നിന്ന് മൊഴിയെടുക്കും.നടിക്കെതിരേ സോഷ്യല് മീഡിയയിലൂടെ നടത്തിയ വെളിപ്പെടുത്തലിനെ തുടര്ന്ന് വിജയ് ബാബുവിനെതിരേ ഐടി ആക്ട് പ്രകാരവും കേസെടുത്തിട്ടുണ്ട്. വിജയ് ബാബുവിന്റെ സുഹൃത്തുക്കളുടെ മൊഴിയെടുക്കാനും ആലോചിക്കുന്നുണ്ട്
ഹോട്ടല്, ഫ്ലാറ്റ് എന്നിവിടങ്ങളില് നിന്നാണ് തെളിവുശേഖരിച്ചത്. പരിശോധന നടത്തിയ സ്ഥലങ്ങളില് വിജയ് ബാബുവിന്റെ സാന്നിധ്യം ഉറപ്പിച്ചിട്ടുണ്ട്. ഇരയാക്കപ്പെട്ടയാളെ സ്വാധീനിക്കാന് ശ്രമിച്ചതിന്റെ തെളിവും കിട്ടി. കൂടുതല് തെളിവുകള് ശേഖരിക്കാനുള്ള ഒരുക്കത്തിലാണ് പോലീസ്. ഇരയെ ഭീഷണിപ്പെടുത്തിയതിനെതിരേയും നടപടി സ്വീകരിക്കും.
അതിനിടെ, പരാതിക്കാരിയുടെ മൊഴി രേഖപ്പെടുത്തിയ പോലീസ് വൈദ്യപരിശോധന പൂര്ത്തിയാക്കി. സിനിമാ മേഖലയില് നിന്നുള്ള ചില സാക്ഷികളുടെ മൊഴിയും രേഖപ്പെടുത്തി. പ്രതിയെ കസ്റ്റഡിയില് ചോദ്യംചെയ്യേണ്ടതുണ്ടെന്ന് പോലീസ് പറയുന്നു. വിദേശത്തുനിന്ന് ഇയാള് തിരിച്ചെത്തിയില്ലെങ്കില് നാട്ടിലെത്തിക്കാനുള്ള നീക്കവും നടത്തുന്നുണ്ട്. അതിനായി മറ്റ് ഏജന്സികളുടെ സഹായം തേടും.
അതിനിടെ മുന്കൂര് ജാമ്യാപേക്ഷ വെള്ളിയാഴ്ചയോടെ ഹൈക്കോടതിയുടെ പരിഗണനയില് വന്നേക്കുമെന്ന് അറിയുന്നു. ഇതിനായി മുതിര്ന്ന അഭിഭാഷകരെ സമീപിച്ചിട്ടുണ്ട്. ബലാത്സംഗം ചെയ്തുവെന്ന പരാതി വന്നതിനുശേഷം ഇരയ്ക്കെതിരേ സമൂഹമാധ്യമത്തിലൂടെ വെളിപ്പെടുത്തല് നടത്തിയിട്ടാണ് വിജയ് ബാബു ഒളിവില്പ്പോയത്.
സിനിമയില് കൂടുതല് അവസരങ്ങള് വാഗ്ദാനംചെയ്ത് പ്രലോഭിപ്പിച്ച് എറണാകുളത്തെ ഫ്ലാറ്റില്വെച്ച് നിരവധിതവണ ബലാത്സംഗം ചെയ്തെന്ന നടിയുടെ പരാതിയിലാണ് വിജയ് ബാബുവിനെതിരേ കേസെടുത്തത്. ബലാത്സംഗം, ഗുരുതരമായി പരിക്കേല്പ്പിക്കല് തുടങ്ങിയ കുറ്റങ്ങള്ക്കുള്ള വകുപ്പുകളാണ് ചുമത്തിയിട്ടുള്ളത്. 22നാണ് യുവതി വിജയ് ബാബുവിനെതിരേ പരാതിയുമായി പോലീസിനെ സമീപിച്ചത്
.
വിജയ് ബാബുവിനെതിരായ പീഡനക്കേസില് ചലച്ചിത്ര പ്രവര്ത്തകര് അടക്കം എട്ടുപേരുടെ മൊഴി എടുത്തു. കൂടുതല് സാക്ഷികളുടെ മൊഴി ഇന്ന് രേഖപ്പെടുത്തും. വിജയ് ബാബുവിന്റെ ഫ്ലാറ്റിലടക്കം നടത്തിയ പരിശോധനയില് പരാതിക്കാരി നല്കിയ മൊഴി സാധൂകരിക്കുന്ന തെളിവുകള് ലഭിച്ചിട്ടുണ്ട്. വിജയ് ബാബുവിന്റെ പാസ്പോര്ട്ട് കണ്ടുകെട്ടാന് പൊലീസ് കോടതിയില് അപേക്ഷ നല്കിയിരുന്നു. ഇതിനിടെ കേസില് മുന്കൂര് ജാമ്യം തേടി വിജയ് ബാബു ഇന്ന് ഹര്ജി നല്കും. നിരപരാധിത്വം കോടതിയെ ബോധ്യപ്പെടുത്തുമെന്നാണ് വിജയ് ബാബു വ്യക്തമാക്കിയിട്ടുള്ളത്.
https://www.facebook.com/Malayalivartha
