പറയുന്നതേ ചെയ്യൂ... ചാന്സലര് പദവി വേണ്ടെന്നു പറഞ്ഞ് സംസ്ഥാന സര്ക്കാരിന്റെ അനുനയ നീക്കങ്ങള് തള്ളിയും നിലപാട് കടുപ്പിച്ചും രംഗത്തെത്തിയ ഗവര്ണര് ആരിഫ് മുഹമ്മദ് ഖാന് സ്റ്റാലിനെ കാണണം; തമിഴ്നാട്ടില് മുഖ്യമന്ത്രി ചാന്സലറായി സിദ്ധ സര്വകലാശാല
കേരളത്തെ പിടിച്ച് കുലുക്കിയതാണ് ചാന്സലര് വിവാദം. ഗവര്ണര് ആരിഫ് മുഹമ്മദ് ഖാനും സര്ക്കാരും തമ്മില് വലിയ തര്ക്കമാണുണ്ടായത്. സംസ്ഥാന സര്ക്കാരിന്റെ അനുനയ നീക്കങ്ങള് തള്ളിയും നിലപാട് കടുപ്പിച്ചും ഗവര്ണര് ആരിഫ് മുഹമ്മദ് ഖാന് പലതവണ രംഗത്തെത്തി. വാര്ത്താസമ്മേളനം നടത്തി താന് ഇനി ഒരു വിട്ടുവീഴ്ചയ്ക്കുമില്ലെന്ന വ്യക്തമായ സന്ദേശമാണ് നല്കിയത്.
കേരളത്തിലെ സര്വകലാശാലകളിലെ ചാന്സലര് പദവി ഒഴിയാന് തയാറാണെന്ന് കാണിച്ച് ഗവര്ണര് ആരിഫ് മുഹമ്മദ് ഖാന് കത്തയച്ചതോടെ മുമ്പ് ചീഫ് സെക്രട്ടറിയും ധനമന്ത്രിയും രാജ്ഭവനിലെത്തി ഗവര്ണറെ കണ്ടിരുന്നു. എന്നാല് അനുനയ ശ്രമങ്ങള്ക്ക് വഴങ്ങാന് ഗവര്ണര് കൂട്ടാക്കിയില്ല. എന്നു മാത്രമല്ല, നിലപാടില് ഉറച്ചുനില്ക്കുകയും ചെയ്തു. എന്നാല് പിന്നീട് ഗവര്ണറും സര്ക്കാരും ഈവിവാദത്തില് നിന്നും പിന്മാറി.
അന്നേ പലരും വാദിച്ചതാണ് ഗവര്ണറല് നിന്നും ചാന്സലര് പദവി എടുത്ത് മാറ്റണമെന്ന്. അത് നടത്തി കാണിച്ച് തരികയാണ് തമിഴ്നാട് മുഖ്യമന്ത്രി എംകെ സ്റ്റാലിന്. തമിഴ്നാട് സംസ്ഥാന സര്ക്കാരിനു കീഴിലുള്ള സര്വകലാശാലകളിലെ വൈസ് ചാന്സലര് നിയമനത്തിനുള്ള അധികാരം സര്ക്കാരിനു നല്കുന്ന 2 ബില്ലുകള് പാസാക്കിയതിനു പിന്നാലെ ഗവര്ണര്ക്കെതിരെ തമിഴ്നാട് സര്ക്കാരിന്റെ അടുത്തനീക്കം.
മുഖ്യമന്ത്രി ചാന്സലറായി സിദ്ധ സര്വകലാശാല സ്ഥാപിക്കാനുള്ള ബില് നിയമസഭ പാസാക്കി. ആരോഗ്യമന്ത്രി പ്രോ ചാന്സലര് പദവിയും വഹിക്കും. വിദഗ്ധസമിതി ശുപാര്ശ ചെയ്യുന്ന പാനലില് നിന്ന് ചാന്സലറാണു വൈസ് ചാന്സലറെ നിയമിക്കുക. പുതിയ സര്വകലാശാലയ്ക്ക് 'തമിഴ്നാട് സിദ്ധ മെഡിക്കല് യൂണിവേഴ്സിറ്റി' എന്ന് പേരിടുമെന്നും ആസ്ഥാനം ചെന്നൈ കോര്പറേഷന് ആയിരിക്കുമെന്നും ബില്ലില് ഉണ്ട്. ഇന്ത്യന് മെഡിസിന്, ഹോമിയോപ്പതി എന്നിവയില് ഗവേഷണത്തിന് ഉതകുന്ന കോഴ്സുകള് ഒരുക്കുകയാണു ലക്ഷ്യം.
വൈസ് ചാന്സലര്മാരെ നിയമിക്കാനുള്ള ഗവര്ണറുടെ അധികാരം എടുത്തുകളയാനുള്ള ബില്ലുമായി തമിഴ്നാട് സര്ക്കാര് നേരത്തെ രംഗത്തെത്തിയിരുന്നു. ഉന്നത വിദ്യാഭ്യാസ വകുപ്പിനു കീഴിലുള്ള 13 സര്വകലാശാലകളിലെ വൈസ് ചാന്സലര് നിയമനത്തിനുള്ള അധികാരം സര്ക്കാരിന് നല്കുന്ന ബില് നിയമസഭ അംഗീകരിച്ചു. വിദഗ്ധ സമിതി നിര്ദേശിക്കുന്ന 3 പേരുടെ പാനലില് നിന്നു ഗവര്ണറാണ് വിസിമാരെ നിയമിച്ചിരുന്നത്.
സംസ്ഥാനത്തെ മുഴുവന് സര്വകലാശാലകളിലെയും വൈസ് ചാന്സലര്മാരുടെ യോഗം ചാന്സലറായ ഗവര്ണര് ആര്.എന്.രവിയുടെ അധ്യക്ഷതയില് ഊട്ടിയില് നടക്കവെയാണു പുതിയ ബില് പാസാക്കിയത്.
വിസി നിയമനം സര്ക്കാരുമായി കൂടിയാലോചിച്ച ശേഷം നടത്തുന്നതാണ് കീഴ്വഴക്കം എങ്കിലും, കഴിഞ്ഞ 4 വര്ഷമായി പ്രത്യേക അവകാശമുണ്ടെന്ന മട്ടില് ഗവര്ണര്മാര് പ്രവര്ത്തിക്കുകയാണെന്നു മുഖ്യമന്ത്രി എം.കെ.സ്റ്റാലിന് കുറ്റപ്പെടുത്തി. പ്രധാനമന്ത്രി നരേന്ദ്ര മോദിയുടെ സ്വദേശമായ ഗുജറാത്തില് പോലും വിദഗ്ധ സമിതി ശുപാര്ശ ചെയ്യുന്ന 3 പേരുകളില് നിന്നു സംസ്ഥാന സര്ക്കാരാണ് വിസിയെ നിയമിക്കുന്നതെന്നും പറഞ്ഞു. ഇതിന് പിന്നാലെയാണ് അധികാരം എടുത്ത് കളഞ്ഞത്.
അതേസമയം ഇന്ധന നികുതി വെട്ടിക്കുറക്കല് വിഷയത്തില് പ്രധാനമന്ത്രി നരേന്ദ്ര മോദിക്കെതിരെ വിമര്ശനവുമായി തമിഴ്നാട് മുഖ്യമന്ത്രി എം.കെ. സ്റ്റാലിന്. പ്രധാനമന്ത്രി വസ്തുതകള് മറച്ചുവെക്കുകയാണ്. തന്റെ സര്ക്കാര് നേരത്തെ പെട്രോള് ലിറ്ററിന് മൂന്ന് രൂപ കുറച്ചതാണെന്നും അദ്ദേഹം പറഞ്ഞു. കേന്ദ്രം എക്സൈസ് തീരുവ കുറച്ചിട്ടും പ്രതിപക്ഷ സംസ്ഥാനങ്ങള് ഇന്ധന വാറ്റ് കുറച്ചില്ലെന്ന് ബുധനാഴ്ച മോദി ചൂണ്ടിക്കാട്ടിയിരുന്നു.
2014 മുതല് അന്താരാഷ്ട്ര ക്രൂഡ് വില കുറയുമ്പോഴെല്ലാം കേന്ദ്ര സര്ക്കാര് അതിന്റെ നേട്ടം ഉപഭോക്താക്കള്ക്ക് കൈമാറിയില്ല, മറിച്ച് വിലക്കുറവിലൂടെ ലഭ്യമാവുന്ന അധിക വരുമാനം പോക്കറ്റിലാക്കുകയാണ് ചെയ്തതെന്ന് സ്റ്റാലിന് പറഞ്ഞു.
" f
https://www.facebook.com/Malayalivartha
