കേരളത്തില്‍ ഇന്നും വൈദ്യുതി നിയന്ത്രണമുണ്ടാകുമെന്ന് വൈദ്യുതി വകുപ്പ് . വൈകിട്ട് ആറരയ്ക്കും 11.30നും ഇടയിലാണ് നിയന്ത്രണം ഏര്‍പ്പെടുത്തുന്നത്. 15 മിനിറ്റാണ് നിയന്ത്രണമുണ്ടായിരിക്കുക.

നഗരമേഖലകളിലും, ആശുപത്രികളിലും ഉള്‍പ്പെടെ അവശ്യസേവനമേഖലകളില്‍ വൈദ്യുതി നിയന്ത്രണം ഉണ്ടായിരിക്കില്ല. ഇന്നലെയും സമാനരീതിയിലുള്ള നിയന്ത്രണം ഏര്‍പ്പെടുത്തിയിരുന്നു. കേരളത്തിന് വൈദ്യുതി നല്‍കുന്ന ജാര്‍ഖണ്ഡിലെ മൈഥോണ്‍ പവര്‍ സ്റ്റേഷനില്‍ കല്‍ക്കരി ക്ഷാമം മൂലം ഉത്പാദനം കുറച്ചിരിക്കുകയാണ്.

ഈ സാഹചര്യത്തില്‍ കേരളത്തിന് കിട്ടേണ്ട വൈദ്യുതിയില്‍ 400 മുതല്‍ 500 മെഗാവാട്ട് വരെ കുറവുണ്ടാകുന്നതിനെ തുടര്‍ന്നാണ് സംസ്ഥാനത്ത് രണ്ട് ദിവസത്തേയ്ക്ക് വൈദ്യുതി നിയന്ത്രണം ഏര്‍പ്പെടുത്തിയത്. വൈദ്യുതി പ്രതിസന്ധി രണ്ട് ദിവസത്തിനകം പരിഹരിക്കാനാകുമെന്നാണ് അധികൃതര്‍ പറയുന്നത്.

കല്‍ക്കരി ക്ഷാമം രാജ്യത്തെ ഊര്‍ജമേഖലയ്ക്ക് തിരിച്ചടിയാകുകയാണ്. രാജസ്ഥന്‍, ഉത്തര്‍പ്രദേശ്, മഹാരാഷ്ട്ര, പഞ്ചാബ്, ജമ്മു കശ്മീര്‍, ജാര്‍ഖണ്ഡ്, ഹരിയാന, മധ്യപ്രദേശ് ഉള്‍പ്പെടെ വൈദ്യുതി പ്രതിസന്ധി രൂക്ഷമാണ്.