പ്ലസ്ടു വിദ്യാര്‍ഥിനി ജീവനൊടുക്കിയ സംഭവത്തില്‍ പോലീസുകാരനെതിരെ അന്വേഷണം.... തസ്ലിമയെ വിവാഹം കഴിക്കണമെന്ന് ആവശ്യപ്പെട്ട് നിരന്തരം ശല്യം , മരണത്തിന് പിന്നില്‍ അയല്‍വാസിയായ പോലീസ് ഉദ്യോഗസ്ഥനാണെന്ന് ബന്ധുക്കളുടെ ആരോപണം
പ്ലസ്ടു വിദ്യാര്‍ഥിനി ജീവനൊടുക്കിയ സംഭവത്തില്‍ പോലീസുകാരനെതിരെ അന്വേഷണം. തിരുവനന്തപുരം മൈലക്കരയില്‍ തസ്ലിമ(18) എന്ന പെണ്‍കുട്ടി ജീവനൊടുക്കിയ സംഭവത്തിലാണ് നടപടി. തസ്ലിമയുടെ മരണത്തിന് പിന്നില്‍ അയല്‍വാസിയായ പോലീസ് ഉദ്യോഗസ്ഥന്‍ അഖിലാണെന്നാണ് ബന്ധുക്കളുടെ ആരോപണം
ബുധനാഴ്ച രാവിലെയാണ് തസ്ലിമയെ വീടിന്റെ ശുചിമുറിയില്‍ ജീവനൊടുക്കിയ നിലയില്‍ കണ്ടെത്തിയത്. അഖിലും തസ്ലിമയും തമ്മില്‍ അടുപ്പത്തിലായിരുന്നു.
തസ്ലിമയെ വിവാഹം കഴിക്കണമെന്ന് ആവശ്യപ്പെട്ട് അഖില്‍ നിരന്തരം ശല്യപ്പെടുത്തിയിരുന്നുവെന്നാണ് കുടുംബം ആരോപിക്കുന്നത്. എന്നാല്‍ വിദ്യാര്‍ഥിനിയാണെന്നും പഠനം കഴിയട്ടെയെന്നുമായിരുന്നു ബന്ധുക്കള്‍ അഖിലിനോട് പറഞ്ഞെങ്കിലും അഖിലിന്റെ നിര്‍ബന്ധം കൂടിയ സാഹചര്യത്തില്‍ വിവാഹം നടത്താമെന്ന തീരുമാനത്തില്‍ ബന്ധുക്കളെത്തി.
പക്ഷെ അതിനിടെ അഖിലിന് മറ്റൊരു പെണ്‍കുട്ടിയുമായി അടുപ്പമുണ്ടെന്ന് തസ്ലിമ അറിഞ്ഞതോടെ ഇരുവരും തമ്മില്‍ വഴക്കുണ്ടായി.
തസ്ലിമ മരിക്കുന്നതിന്റെ തലേദിവസവും ഇരുവരും തമ്മില്‍ വഴക്കുണ്ടായെന്നും ബന്ധുക്കള്‍ പറഞ്ഞു. വഴക്കുണ്ടായതിന്റെ മനോവിഷമത്തിലാണ് തസ്ലിമ ജീവനൊടുക്കിയതെന്നാണ് ബന്ധുക്കളുടെ ആരോപണം.
അതേസമയം, അഖിലിന്റെ അച്ഛന്‍, പെണ്‍കുട്ടിയുടെ വീട്ടുകാരോട് പത്ത് ലക്ഷം രൂപയും 25 പവന്‍ സ്വര്‍ണവും ആവശ്യപ്പെട്ടുവെന്നും. അത് നല്‍കിയാല്‍ മാത്രമേ അഖിലുമായി വിവാഹം നടത്താന്‍ സമ്മതിക്കുകയുള്ളൂ എന്നു പറഞ്ഞിരുന്നതായും കുടുംബം ആരോപിക്കുന്നുണ്ട്.
വീരണക്കാവ് ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥിനിയാണ് തസ്ലിമ. സംഭവത്തില്‍ പോലീസ് അന്വേഷണം ഊര്‍ജ്ജിതത്തിലാക്കി.
https://www.facebook.com/Malayalivartha
