കേരളം സന്തോഷ് ട്രോഫിയിൽ മുത്തമിട്ടത് ഏറെ അഭിമാനത്തോടെയാണ് ഏവരും കണ്ടത്. ഈ വിജയത്തിന്റെ ആഘോഷങ്ങള്‍ ഇപ്പോഴും കെട്ടടങ്ങിയിട്ടില്ല. എന്നാലോ കേരളത്തിന്റെ വിജയത്തിനൊപ്പം തന്നെ ഭൂരിഭാഗം പേരും കൈയടിക്കുന്നത് സംഘാടന മികവിന് കൂടിയാണ് എന്നതും ഓർക്കണം. ഇതൊക്കെ ശരിവെക്കുമ്പോഴും ചില കാര്യങ്ങള്‍ കാണാതെ പോകരുത് എന്നോര്‍മ്മപ്പെടുത്തി മാധ്യമപ്രവര്‍ത്തകന്റെ കുറിപ്പ് സമൂഹമാധ്യമങ്ങളിൽ വൈറലാകുകയാണ്. കേരളത്തിന്റെ അഭിമാനം വാനോളം ഉയർത്തിയ താരങ്ങളെയാണ് ഇത്തരത്തിൽ ഇവർ തഴഞ്ഞിരിക്കുന്നത്.

താരങ്ങള്‍ എല്ലാം തന്നെ മത്സരശേഷം തങ്ങളുടെ സ്വന്തം വാഹനത്തിലാണ് തങ്ങളുടെ വീടുകളിലേക്ക് മടങ്ങിയത് എന്നാണ് കുറിപ്പിൽ വ്യക്തമാക്കുന്നത്. സന്തോഷ് ട്രോഫിയില്‍ കേരളം വിജയിച്ചു. ആഘോഷവും, ആര്‍പ്പ് വിളിയും കഴിഞ്ഞു. സമയം പുലര്‍ച്ചെ 2.30. കേരള ടീമിലെ ഒരു കളിക്കാരനെ കൂട്ടിക്കൊണ്ട് പോകാന്‍ പിതാവ് സ്‌ക്കൂട്ടറിലെത്തി. സ്‌ക്കൂട്ടറിന്റെ ഉള്ള സ്ഥലത്തെല്ലാം ലഗേജ് കുത്തിക്കയറ്റി ആ പിതാവ് സന്തോഷ് ട്രോഫി ജേതാവായ മകനെയും കൂട്ടി മടങ്ങി. ഫൈനല്‍ കളിച്ച മറ്റൊരു താരം സ്വന്തം സ്‌കൂട്ടറിലാണ് നാട്ടിലേക്ക് പോയത്. കേരളത്തിന്റെ അഭിമാനം വാനോളമുയര്‍ത്തിയ പ്രതിഭകളെ ശരിക്കും വീട്ടിലെത്തിക്കാനുള്ള സാമാന്യ മര്യാദ അധികാരികള്‍ കാണിക്കേണ്ടതല്ലേ? എന്ന് അദ്ദേഹം ചോദിക്കുകയുണ്ടായി.

കുറിപ്പിന്റെ പൂര്‍ണ്ണ രൂപം..

സന്തോഷമില്ലാത്ത ട്രോഫി

സന്തോഷ് ട്രോഫിയില്‍ കേരളം വിജയിച്ചു. ആഘോഷവും, ആര്‍പ്പ് വിളിയും കഴിഞ്ഞു. സമയം പുലര്‍ച്ചെ 2.30. കേരള ടീമിലെ ഒരു കളിക്കാരനെ കൂട്ടിക്കൊണ്ട് പോകാന്‍ പിതാവ് സ്‌ക്കൂട്ടറിലെത്തി. സ്‌ക്കൂട്ടറിന്റെ ഉള്ള സ്ഥലത്തെല്ലാം ലഗേജ് കുത്തിക്കയറ്റി ആ പിതാവ് സന്തോഷ് ട്രോഫി ജേതാവായ മകനെയും കൂട്ടി മടങ്ങി. ഫൈനല്‍ കളിച്ച മറ്റൊരു താരം സ്വന്തം സ്‌കൂട്ടറിലാണ് നാട്ടിലേക്ക് പോയത്. കേരളത്തിന്റെ അഭിമാനം വാനോളമുയര്‍ത്തിയ പ്രതിഭകളെ ശരിക്കും വീട്ടിലെത്തിക്കാനുള്ള സാമാന്യ മര്യാദ അധികാരികള്‍ കാണിക്കേണ്ടതല്ലേ? സന്തോഷ് ട്രോഫി ഓണ്‍ ഡ്യൂട്ടി എന്ന പേരില്‍ മലപ്പുറത്ത് കൂടി തേരാ പാരാ ഓടിയ വണ്ടികളില്‍ ചിലത് ആ കുട്ടികള്‍ക്കും കൊടുക്കാമായിരുന്നു. അവര്‍ വെറും പിള്ളേരല്ല! ഈ നാടിന്റെ അഭിമാനതാരങ്ങളാണ്.

അതേസമയം കുറിപ്പ് പങ്കുവെച്ചതിന് പിന്നാലെ കേരള രഞ്ജിതാരങ്ങള്‍ ഉള്‍പ്പടെ നിരവധി പേരാണ് പോസ്റ്റ് ഷെയര്‍ ചെയ്തിരിക്കുന്നത്. കേരളത്തിന്റെ ജയത്തിനൊപ്പം തന്നെ സംഘാടന മികവിന് കൂടി കയ്യടിക്കുമ്പോഴാണ് ആഘോഷത്തിന് തന്നെ കാരണഹേതുവായ താരങ്ങളെ വേണ്ട വിധം വീടുകളിലെത്തിക്കുക പോലും ചെയ്യാതെ സംഘാടകരുടെ പെരുമാറ്റം പുറത്ത് വന്നിരിക്കുന്നത്. കുറിപ്പ് വൈറലായതോടെ തന്നെ പ്രതികരണവുമായി നിരവധി പേരും രംഗത്ത് വന്നിരിക്കുകയാണ്.