ആഡംബര ഹോട്ടലിന്റെ ഇരുപതടിയോളം ഉയരമുള്ള മതില്‍ തൊട്ടടുത്ത ഇരുനില വീട്ടിലേക്ക് പതിച്ചു...വീട്ടുകാര്‍ രക്ഷപ്പെട്ടത് തലനാരിഴയ്ക്ക്.

കനത്ത മഴയില്‍ പോത്തന്‍കോട് ജംഗ്ഷനു സമീപം പ്രവര്‍ത്തനമാരംഭിച്ച ആഡംബര ഹോട്ടലിന്റെ ഇരുപതടിയോളം ഉയരമുള്ള മതിലാണ് തൊട്ടടുത്ത ഇരുനില വീട്ടിലേക്ക് പതിച്ചത്.

വീട്ടുകാര്‍ തലനാരിഴയ്ക്കാണ് രക്ഷപ്പെട്ടത്. താഴത്തെ നിലയുടെ ഒരുവശത്തെ ചുമരും സമീപ ജനാലയും തകര്‍ന്നതോടെ വീട് അപകടാവസ്ഥയിലായി. പോത്തന്‍കോട് സ്‌നേഹതീരത്തില്‍ റാഫിയുടെ വീടിനാണു കേടുപാടുകള്‍ സംഭവിച്ചത്.

ശനിയാഴ്ച രാത്രി പന്ത്രണ്ടരയോടെ മതില്‍ ഇടിഞ്ഞ് വീടിന്റെ ഒരു വശത്ത് പതിക്കുകയായിരുന്നു. റാഫിയും ഭാര്യയും മകളും തൊട്ടടുത്ത മുറിയിലായിരുന്നു. വലിയ ശബ്ദം കേട്ട് ഇവര്‍ പെട്ടെന്ന് പുറത്തേക്കിറങ്ങുമ്പോഴേക്കും ജനാലയിലൂടെ കല്ലുകള്‍ മുറിക്കകത്തേക്കും പതിച്ചു. വെള്ളിയാഴ്ച ഉദ്ഘാടനം ചെയ്ത ആഡംബര ഹോട്ടലിന്റെ പിന്‍വശത്തുള്ള മതിലാണ് ഇടിഞ്ഞ് വീണത്. വീട്ടുകാര്‍ ആര്‍ഡിഒയ്ക്കും പോത്തന്‍കോട് പഞ്ചായത്തിലും പരാതി നല്‍കിയിട്ടുണ്ട്.

അതേസമയം കനത്ത മഴയില്‍ വര്‍ക്കലയില്‍ രണ്ടു വീടുകള്‍ ഭാഗികമായി തകര്‍ന്നു. ഇലകമണ്‍ ചാരുംകുഴി കുന്നുംപുറത്ത് വീട്ടില്‍ സുധീപ് കുമാര്‍, തേരിക്കല്‍കുന്ന് കോളനിയില്‍ സരസ്വതി എന്നിവരുടെ വീടുകളാണു തകര്‍ന്നത് . കണ്ണംബയില്‍ സുജിത് ഭവനില്‍ ചന്ദ്രികാദേവിയുടെ വീട്ടിലെ 100 അടി താഴ്ചയുള്ള കിണര്‍ പൂര്‍ണമായി തകര്‍ന്നനിലയില്‍. കിണര്‍ ഇടിഞ്ഞതു സമീപത്തെ വീടിനും ഭീഷണിയായി.

ഇലകമണ്‍ കളത്തറ വാര്‍ഡില്‍ അയിരൂര്‍ പുഷ്പാംഗദ നിവാസില്‍ പുഷ്പാംഗദന്റെ കിണറും ഭാഗികമായി ഇടിഞ്ഞു താഴ്ന്നു. മരങ്ങള്‍ വീണ് വൈദ്യുതിബന്ധം താറുമാറിലായി. പ്ലാവഴികത്തും ഇടവയിലുമാണ് മരങ്ങള്‍ വീണത്. വള്ളക്കടവ് ഭാഗത്ത് കനാലിനോടു ചേര്‍ന്ന പരിസരത്ത് ജലനിരപ്പ് ഉയര്‍ന്നത് ഫയര്‍ഫോഴ്‌സ് ഒഴിവാക്കി.