തെരച്ചില്‍ അവസാനിപ്പിക്കാനൊരുങ്ങുന്നു.... സൈലന്റ് വാലി സൈരന്ധ്രിയില്‍ കാണാതായ വനം വാച്ചറെ കണ്ടെത്താനായുള്ള തെരച്ചില്‍ അവസാനിപ്പിക്കാനൊരുങ്ങി വനം വകുപ്പ്.


വനത്തിലെ തെരച്ചിലില്‍ കാര്യമില്ലെന്ന വിലയിരുത്തലിനെ തുടര്‍ന്നാണ് വനം വകുപ്പ് ഈ തീരുമാനമെടുത്തത്. ഇത് സംബന്ധിച്ച് തീരുമാനം ഉടന്‍ ഉണ്ടായേക്കും.

എഴുപതോളം ക്യാമറകള്‍ പരിശോധിച്ചിട്ടും നിരാശയായിരുന്നു ഫലമുണ്ടായത്. രാജന്റെ മൊബൈല്‍ ഫോണ്‍ കേന്ദ്രീകരിച്ച് അന്വേഷണം നടത്തിയെങ്കിലും ഒരു വിവരവും കിട്ടിയിരുന്നില്ല. വാച്ചറെ വന്യമൃഗങ്ങള്‍ ആക്രമിച്ചിരിക്കാന്‍ സാധ്യതയില്ലെന്ന് തന്നെയാണ് വിദഗ്ധര്‍ വ്യക്തമാക്കുന്നത്. അഗളി ഡിവൈഎസ്പിയുടെ നേതൃത്വത്തിലാണ് കേസിന്റെ അന്വേഷണം നടക്കുന്നത്.

രാജനെ മാവോയിസ്റ്റുകള്‍ തട്ടിക്കൊണ്ടുപോകാനുള്ള സാധ്യതയും പരിശോധിക്കണമെന്ന് കുടുംബം ആവശ്യപ്പെടുന്നു. അച്ഛന്‍ കാടുവിട്ട് വേറെങ്ങും പോകില്ലെന്നാണ് മകളും സഹോദരിയും പറയുന്നത്. മാവോയിസ്റ്റ് സാന്നിധ്യം സ്ഥിരീകരിച്ച മേഖലയാണ് സൈരന്ധ്രി കാടുകള്‍. 20 വര്‍ഷമായി ഇവിടെ ജോലി നോക്കുന്ന രാജന് കാട്ടുവഴിയെല്ലാം മനപ്പാഠമാണെന്നാണ് കുടുംബം പറയുന്നത്.

മാവോയിസ്റ്റുകള്‍ രാജനെ വഴികാട്ടാനും മറ്റുമായി കൂട്ടിക്കൊണ്ടുപോയതാണോയെന്നും അന്വേഷിക്കണം എന്നാണ് കുടുംബത്തിന്റെ ആവശ്യം.

അച്ഛന്‍ കാടുവിട്ട് മറ്റൊരിടത്തേക്കും പോകില്ലെന്ന് മകള്‍ ആവര്‍ത്തിച്ചു പറയുന്നു. അടുത്ത മാസം പതിനൊന്നിന് രാജന്റെ മകളുടെ വിവാഹമാണ്. അതിന് മുന്‍പേ രാജനെ കണ്ടെത്തണം എന്നാണ് കുടുംബത്തിന്റെ ആവശ്യം. മനുഷ്യാവകാശ കമ്മീഷന് പരാതി നല്‍കാനായുള്ള ആലോചനയിലാണ് കുടുംബം .