പി.സി.ജോര്ജിന്റെ ജാമ്യാപേക്ഷ ഹൈക്കോടതി നാളത്തേക്ക് മാറ്റി... പൊലീസ് എന്തിനാണ് പി സി ജോര്ജിനെ കസ്റ്റഡിയില് ചോദിക്കുന്നതെന്നും എന്തു തെളിവുകളാണ് ഇനി ലഭിക്കാനുള്ളതെന്നും അഭിഭാഷകര്; ജോര്ജിന്റെ അറസ്റ്റും അനുബന്ധവിവരങ്ങളും ഉള്പ്പെടുത്തി വിശദമായ പത്രിക സമര്പ്പിക്കാന് സമയം വേണമെന്ന് പ്രോസിക്യൂഷന്
തിരുവനന്തപുരത്തെ വിദ്വേഷപ്രസംഗത്തില് ജാമ്യം റദ്ദാക്കപ്പെട്ട് ജയിലിലായ പി.സി.ജോര്ജിന്റെ ജാമ്യാപേക്ഷ ഹൈക്കോടതി നാളത്തേക്ക് മാറ്റി. മതവിദ്വേഷ പ്രസംഗം ഗൂഢാലോചനയാണ് എന്ന് പൊലീസ് റിപ്പോര്ട്ട് നല്കിയത് ഹൈക്കോടതിയില് നിന്ന് ജാമ്യം ലഭിക്കാതിരിക്കാനുള്ള നീക്കമെന്ന് ജോര്ജിന്റെ അഭിഭാഷകന് ആരോപിച്ചു.
മതവിദ്വേഷ പ്രസംഗത്തില് ജാമ്യം റദ്ദാക്കി വഞ്ചിയൂര് കോടതി രാവിലെ ജയിലില് അടച്ചെങ്കിലും ഇന്ന് തന്നെ ഹൈക്കോടതിയില് നിന്ന് ജാമ്യം കിട്ടുമെന്നായിരുന്നു ജോര്ജിന്റെ പ്രതീക്ഷ. തിരുവനന്തപുരം പ്രസംഗത്തിലെ ജാമ്യം റദ്ദാക്കിയതിനെതിരെയുള്ള ഹര്ജി ഫലത്തില് ജാമ്യ ഹര്ജി തന്നെ ആയതിനാല് മജിസ്ടേറ്റ് കോടതിയില് ജാമ്യാപേക്ഷ നല്കിയിരുന്നുമില്ല. രാവിലെ കേസ് പരിഗണിച്ച ഹൈക്കോടതി ഉച്ചക്ക് കേസ് വീണ്ടും പരിഗണിക്കും വരെ പി സി ജോര്ജ് പ്രതീക്ഷയിലായിരുന്നു. അറസ്റ്റ് അനാവശ്യമാണെന്ന് ജോര്ജിന്റെ അഭിഭാഷകര് ഹൈക്കോടതിയില് പറഞ്ഞു.
പൊലീസ് എന്തിനാണ് പി സി ജോര്ജിനെ കസ്റ്റഡിയില് ചോദിക്കുന്നതെന്നും എന്തു തെളിവുകളാണ് ഇനി ലഭിക്കാനുള്ളതെന്നും അഭിഭാഷകര് ആരാഞ്ഞു. എന്നാല് ജോര്ജിന്റെ അറസ്റ്റും അനുബന്ധവിവരങ്ങളും ഉള്പ്പെടുത്തി വിശദമായ പത്രിക സമര്പ്പിക്കാന് സമയം വേണമെന്ന് പ്രോസിക്യൂഷന് ആവശ്യപ്പെട്ടു. ഇതിന് പ്രോസിക്യൂഷന് സമയം അനുവദിച്ചുകൊണ്ടാണ് ഹര്ജി നാളത്തേക്ക് മാറ്റിയത്.
ഇതോടെ ജോര്ജിന് ഹൈക്കോടതി തീരുമാനം വരും വരെ ജയിലില് തന്നെ കഴിയേണ്ടി വരും. ജോര്ജിനെ കസ്റ്റഡിയില് ചോദ്യം ചെയ്യമെന്ന് തിരുവനന്തപുരം ഫോര്ട്ട് പോലീസ് വഞ്ചിയൂര് കോടതിയില് അപേക്ഷ നല്കിയിട്ടുണ്ട്. ഇതു തിങ്കളാഴ്ച പരിഗണിക്കും. ഹൈക്കോടതി ജാമ്യം അനുവദിക്കാതിരിക്കാനാണ് ഗൂഢാലോചന എന്ന വാദമെന്ന് ജോര്ജിന്റെ അഭിഭാഷകന് ആരോപിച്ചു.
https://www.facebook.com/Malayalivartha
