തിരുവനന്തപുരം പട്ടത്ത് തെരുവുനായയെ  ക്രൂരമായി മര്‍ദ്ദിച്ച് കണ്ണടിച്ച് പൊട്ടിച്ച സംഭവത്തില്‍ കെഎസ്ഇബി ജീവനക്കാരനെതിരെ പൊലീസ് കേസെടുത്തു.പട്ടം കെഎസ്ഇബി ഓഫീസിലെ ഡ്രൈവറായ മുരളിയാണ് നായയെ ആക്രമിച്ചത്. ഗുരുതരമായി പരിക്കേറ്റ തെരുവുനായക്ക് കാഴ്ച നഷ്ടമായി.

പീപ്പിൾ ഫോർ അനിമൽസിന്റെ പരാതിയിലാണ് കേസെടുത്തിരിക്കുന്നത്. വർഷങ്ങളായി കരാർ അടിസ്ഥാനത്തിൽ കാർ ഡ്രൈവറായി ജോലി ചെയ്യുന്ന മുരളി ഇരുമ്പ് വടി കൊണ്ടു നായയെ തല്ലുകയായിരുന്നെന്നാണ് പരാതിയിൽ പറയുന്നത്. പീപ്പിള്‍ ഫോര്‍ അനിമല്‍സ് വൈദ്യുതി ഭവന്‍ ചെയര്‍മാനും ഇയാള്‍ക്കെതിരെ പരാതി നല്‍കിയിട്ടുണ്ട്

ചൊവ്വാഴ്ച രാത്രിയിലായിരുന്നു സംഭവം. മുരളി നായയെ അടിക്കുന്നത് സി.സി.ടി.വി ദൃശ്യങ്ങളിൽ പതിഞ്ഞിട്ടുണ്ട്. കാറുകളുടെ ബമ്പര്‍ നായ കടിക്കുത് കൊണ്ടാണ് അതിനെ മര്‍ദ്ദിച്ചതെന്നാണ് മുരളിയുടെ മൊഴി.പീപ്പിൾ ഫോർ ആനിമൽസ് എന്ന സംഘടനയുടെ സംരക്ഷണയിലാണ് നായ ഇപ്പോഴുള്ളത്. പീപ്പിള്‍ ഫോര്‍ അനിമല്‍സിന്റെ സെക്രട്ടറി ലത ഇന്ദിരയും റെസ്‌ക്യൂ ടീം അംഗങ്ങളായ ഉണ്ണിയും അജിത്തുമാണ് ചോരയൊലിച്ച് കിടന്ന നായയെ ആശുപത്രിയിലെത്തിച്ചത്.