വയനാട്ടിലെ കണിയാമ്പറ്റ ഗ്രാമപ്പഞ്ചായത്തിലെ കമ്പളക്കാട് ടൗണിലെ വ്യാപാര സ്ഥാപനങ്ങളിൽ ആരോഗ്യവകുപ്പ് അധികൃതർ മിന്നൽ പരിശോധന നടത്തിയിരിക്കുകയാണ്. ഇവിടത്തെ ഖത്തർ റസ്‌റ്റോറന്റിൽ നിന്നും ഉപയോഗയോഗ്യമല്ലാത്ത പത്ത് കിലോ കോഴിയിറച്ചി കണ്ടെത്തുകയുണ്ടായി. കൂടാതെ നഗരത്തില്‍ പ്രവര്‍ത്തിക്കുന്ന സിറ്റി ബേക്സിൽ നിന്നും ഉപയോഗ യോഗ്യമല്ലാത്ത കൊക്കോ കോളയും പിടിച്ചെടുത്ത് അധികൃതർ നശിപ്പിച്ചു.

ഇതിനുപിന്നാലെ കടയുടമകൾക്കെതിരെ ആരോഗ്യവകുപ്പ് കേസെടുത്തിട്ടുണ്ട്. പുകയില നിരോധന നിയമം ലംഘിച്ചെന്ന കാരണത്താൽ സ്വർണക്കട ഉൾപ്പെടെയുള്ള സ്ഥാപനങ്ങൾക്കെതിരെ പിഴ ചുമത്തുകയും ചെയ്യുകയുണ്ടായി. വരദൂർ ഹെൽത്ത്‌ ഇൻസ്‌പെക്ടർ എ.കെ മനോജിന്റെ നേതൃത്വത്തിൽ തന്നെ ജെ.എച്ച്.ഐമാരായ ഷാനിവാസ് വാഴയിൽ, പി.വി വിനോദ്, പി.എം റീന, ഗ്ലാഡ്സൺ എന്നിവരുടെ സംഘമായിരുന്നു പരിശോധന നടത്തിയിരിക്കുന്നത്.

അതോടൊപ്പം തന്നെ ജനങ്ങൾക്ക്‌ മായമില്ലാത്ത ശുദ്ധമായ ഭക്ഷണം ലഭ്യമാക്കുന്നതിനായി ശക്തമായ നടപടികളുമായി മുന്നോട്ട് പോകുമെന്നും, ഇതിന് പഞ്ചായത്തിന്റെ പരിപൂർണ പിന്തുണയുണ്ടെന്നും ഹെൽത്ത്‌ ഇൻസ്‌പെക്ടർ എ.കെ മനോജ് അറിയിക്കുകയുണ്ടായി.