പ്രതിഷേധം ഇരമ്പുന്നു... സാമ്പത്തിക പ്രതിസന്ധിയെ തുടര്ന്ന് ജനം ഇളകിയപ്പോള് പോലീസും പട്ടാളവും നോക്കുകുത്തി; രാജിവച്ച പ്രധാനമന്ത്രി റനില് വിക്രമസിംഗെയുടെ സ്വകാര്യ വസതിക്ക് തീയിട്ട് സമരക്കാര്; രക്ഷപ്പെട്ട പ്രിസിഡന്റ് ഗോട്ടബയയും രാജിക്ക്? പ്രസിഡന്റ് പോയത് കപ്പലിലോ വിമാനത്തിലോ? ഗോട്ടബയ രാജപക്സെയെ കാണാനില്ല
ശ്രീലങ്ക തിളച്ച് മറിയുകയാണ്. ജനം കടലുപോലെ പ്രതിഷേധവുമായി ഇരമ്പുന്ന കാഴ്ചയാണ് കാണാന് കഴിയുന്നത്. സാമ്പത്തിക പ്രതിസന്ധിയെ തുടര്ന്ന് ഉടലെടുത്ത ജനകീയ പ്രക്ഷോഭം ആളിക്കത്തുകയാണ്. രാജിവച്ച പ്രധാനമന്ത്രി റനില് വിക്രമസിംഗെയുടെ സ്വകാര്യ വസതിക്ക് പ്രക്ഷോഭകാരികള് തീയിട്ടു. വിക്രമസിംഗെയുടെ വസതിയിലേക്ക് ഇരച്ചുകയറിയ പ്രതിഷേധക്കാര് വസതിക്ക് തീയിടുകയായിരുന്നെന്ന് പ്രധാനമന്ത്രിയുടെ ഓഫിസ് വ്യക്തമാക്കി.
പോലീസിനും പട്ടാളത്തിനും കടല്പോലെ വരുന്ന ജനത്തിനെ ഒന്നും ചെയ്യാനായില്ല. അതേസമയം ഔദ്യോഗിക വസതി ഇന്നലെ ജനങ്ങള് പിടിച്ചടക്കുമ്പോള് ശ്രീലങ്കന് പ്രസിഡന്റ് ഗോട്ടബയ രാജപക്സെ അവിടെയുണ്ടായിരുന്നില്ല. മുന്കൂട്ടി അറിയിച്ചിരുന്ന റാലിക്കു മുന്നോടിയായി വെള്ളിയാഴ്ച തന്നെ പ്രസിഡന്റിനെ സൈന്യം അവിടെനിന്നു മാറ്റി. അതേസമയം ഗോട്ടബയ രാജപക്സെ ഇപ്പോള് എവിടെയുണ്ടെന്ന് ആര്ക്കുമറിയില്ല.
കൊളംബോ തുറമുഖത്തെ ജീവനക്കാരനില്നിന്നു കിട്ടിയ വിഡിയോ പ്രസിദ്ധീകരിച്ച ന്യൂസ്ഫസ്റ്റ് എന്ന ശ്രീലങ്കന് മാധ്യമം ലങ്കന് നാവികസേനയുടെ ഗജബാഹു എന്ന കപ്പലില് ഒരു വിഐപി പുറപ്പെട്ടു എന്നു റിപ്പോര്ട്ട് ചെയ്തു. എന്നാല്, പ്രസിഡന്റിന്റെ ഓഫിസും ശ്രീലങ്കന് സൈന്യവും അദ്ദേഹത്തെ സുരക്ഷിതസ്ഥാനത്തേക്കു മാറ്റുക മാത്രമാണു ചെയ്തതെന്നു പറയുന്നു. ഗോട്ടബയ ഇപ്പോഴും ഞങ്ങളുടെ രാഷ്ട്രപതി തന്നെയാണ് എന്നാണ് പ്രസിഡന്റിന്റെ ഓഫിസിലെ മുതിര്ന്ന ഉദ്യോഗസ്ഥന് പറഞ്ഞത്. പ്രസിഡന്റ് രാജ്യം വിട്ടുവെന്ന റിപ്പോര്ട്ടുകളോടു പ്രതികരിക്കാന് പക്ഷേ, അദ്ദേഹം തയാറായില്ല.
അതേസയം കൊളംബോയിലെ ബന്ദാരനായക വിമാനത്താവളത്തിലേക്കു വിഐപി വാഹനങ്ങള് പോകുന്നതിന്റെ ദൃശ്യങ്ങളും പ്രചരിക്കുന്നുണ്ട്. കപ്പല്മാര്ഗമോ വിമാനമാര്ഗമോ രാജപക്സെ രാജ്യം വിട്ടിരിക്കാം, അല്ലെങ്കില് അത്തരമൊരു പ്രതീതി സൃഷ്ടിച്ച ശേഷം ഏതെങ്കിലും സൈനിക കേന്ദ്രത്തില് തുടരുകയുമാകാം.
പ്രതിഷേധക്കാരെ ഓടിക്കാന് കണ്ണീര്വാതകം പ്രയോഗിച്ചെങ്കിലും അതൊന്നും വകവയ്ക്കാതെ അവര് പ്രധാനമന്ത്രിയുടെ വസതിയിലേക്ക് കയറുകയായിരുന്നു. അവിടെയുണ്ടായിരുന്ന വാഹനങ്ങളും നശിപ്പിച്ചു. പ്രക്ഷോഭകരും സേനയും സംയമനം പാലിക്കണമെന്ന് വിക്രമസിംഗെ ആവശ്യപ്പെട്ടു. ഈ വര്ഷം മേയില് പ്രധാനമന്ത്രിയായി അധികാരമേറ്റ റനില് വിക്രമസിംഗെ, പ്രതിഷേധം രൂക്ഷമായതിനു പിന്നാലെ ശനിയാഴ്ചയാണു രാജിവച്ചത്.
പ്രതിഷേധം സര്വകക്ഷി ഭരണകൂടത്തിന് നേരെയും തിരിയുമെന്ന് ഉറപ്പായതോടെയാണ് വിക്രമസിംഗെ രാജിവച്ചത്. പ്രസിഡന്റ് ഗോട്ടബയ രാജപക്സെ ബുധനാഴ്ച രാജിവച്ചേക്കുമെന്നു റിപ്പോര്ട്ടുണ്ട്. 30 ദിവസത്തേക്ക് സ്പീക്കര് പ്രസിഡന്റ് സ്ഥാനം ഏറ്റെടുക്കും. അതിനിടെ പാര്ലമെന്റ് കൂടി പുതിയ പ്രസിഡന്റിനെ തിരഞ്ഞെടുക്കും.
ഗോട്ടബയ രാജപക്സെയുടെ രാജി ആവശ്യപ്പെട്ട് പ്രസിഡന്റിന്റെ ഔദദ്യോഗിക വസതി വളഞ്ഞ പ്രതിഷേധക്കാര് രാത്രി വൈകിയും അവിടെത്തന്നെ തുടരുകയാണ്. പ്രതിഷേധത്തെ തുടര്ന്ന് രാജപക്സെ വസതി വിട്ടിരുന്നു. കൊളംബോയില് കടല്ത്തീരത്തെ പ്രസിഡന്റിന്റെ വസതിയിലേക്ക് മാര്ച്ച് ചെയ്ത പതിനായിരങ്ങള് വസതിക്കുള്ളിലേക്ക് ഇരച്ചുകയറി. സൈന്യവും പൊലീസും പ്രക്ഷോഭകരെ തടഞ്ഞില്ല. റോഡ്, റെയില് ഗതാഗത നിയന്ത്രണം പ്രക്ഷോഭകര് ഏറ്റെടുത്തു.
കൊളംബയിലേക്ക് പതിനായിരങ്ങള് എത്തിക്കൊണ്ടിരിക്കുന്നു. പരുക്കേറ്റ 33 പ്രക്ഷോഭകര് ആശുപത്രിയിലാണ്. രണ്ടുപേരുടെ നില ഗുരുതരമാണ്. വസതി വിട്ട പ്രസിഡന്റ് ഗോട്ടബയ രാജപക്സെ എവിടെയെന്നതു സംബന്ധിച്ച് കൃത്യമായ വിവരങ്ങള് ഇപ്പോഴും പുറത്തുവന്നിട്ടില്ല.
"
https://www.facebook.com/Malayalivartha