ഞെട്ടലോടെ നാട്ടുകാര്‍.... അടൂര്‍ ഏനാത്ത് നിയന്ത്രണം തെറ്റി എതിരെ എത്തിയ കാര്‍ ഒരു കുടുംബത്തെ മുഴുവന്‍ തുടച്ചു നീക്കിയതിന്റെ ഞെട്ടലില്‍ മടവൂര്‍ ഗ്രാമം.... മൂന്നു പേരുടെയും മൃതദേഹം മടവൂരിലെ വീട്ടില്‍ കൊണ്ടു വന്നപ്പോള്‍ ദു:ഖം താങ്ങാനാവാതെ ബന്ധുക്കളും നാട്ടുകാരും

മടവൂര്‍ പുലിയൂര്‍ക്കോണം ചാങ്ങയില്‍ക്കോണം വലംപിരിപിള്ളി മഠത്തില്‍ രാജശേഖര ഭട്ടതിരി(66) ഭാര്യ ശോഭ അന്തര്‍ജനം(63) ഏക മകന്‍ നിഖില്‍രാജ്(ബാലു32) എന്നിവരുടെ ജീവനാണ് പൊലിഞ്ഞു പോയത്.

ഭട്ടതിരിയുടെ പ്രമേഹ ചികിത്സയ്ക്കായി കുളനടയിലെ ആശുപത്രിയിലേക്ക് പോകുമ്പോഴാണു ദുരന്തമുണ്ടായത്. ഇന്നലെ പുലര്‍ച്ചെയാണ് മൂന്നു പേരും കാറില്‍ വീട്ടില്‍ നിന്നു യാത്ര പുറപ്പെട്ടത്. ഭട്ടതിരിയാണ് കാര്‍ ഓടിച്ചിരുന്നത്. മകന്‍ നിഖില്‍രാജ് മുന്നിലും ഭാര്യ ശോഭ അന്തര്‍ജനം പിന്നില്‍ വലത് വശത്തുമായിരുന്നു.

ഭട്ടതിരിയും ഭാര്യയും അപകട സ്ഥലത്തുതന്നെ മരിച്ചു. നിഖില്‍ കൊട്ടാരക്കരയിലെ സ്വകാര്യ ആശുപത്രിയിലും. മടവൂര്‍ കളരി ഭദ്രകാളി ദേവി ക്ഷേത്രത്തില്‍ 19 വര്‍ഷമായി മേല്‍ശാന്തി ആയിരുന്നു ഭട്ടതിരി.

സൗമ്യതയും സാധു പ്രകൃതവും ശീലം. ആരോടും ദേഷ്യപ്പെട്ട് സംസാരിക്കുക പോലും ചെയ്യാത്ത പ്രകൃതം. ഇന്നലെ രാവിലത്തെ പൂജയ്ക്ക് പകരം ശാന്തിക്കാരനെ ചുമതലപ്പെടുത്തിയിട്ടുണ്ടായിരുന്നു. വൈകുന്നേരത്തെ പൂജയ്ക്ക് മടങ്ങി എത്തും എന്നറിയിച്ചാണ് ചൊവ്വ രാത്രിയില്‍ ക്ഷേത്രത്തില്‍ നിന്നു മടങ്ങിയത്. പട്ടാഴി കിഴക്കേഭാഗത്ത് മഠത്തില്‍ പരേതരായ കൃഷ്ണന്‍ഭട്ടതിരിയുടെയും സുഭദ്ര അന്തര്‍ജനത്തിന്റെയും മകനാണ് രാജശേഖര ഭട്ടതിരി.

പട്ടാഴി ആലപ്പുറത്ത് മഠത്തില്‍ പരേതരായ ത്രിവിക്രമ ഭട്ടതിരിയുടെയും ചന്ദ്രമതി അന്തര്‍ജനത്തിന്റെയും മകളാണ് ശോഭ അന്തര്‍ജനം. കോട്ടയം തിരുവഞ്ചൂര്‍ താഴത്തിക്കര മുട്ടത്ത് ഇല്ലത്ത് പരേതനായ നാരായണന്‍ നമ്പൂതിരിയുടെയും ഗീത അന്തര്‍ജനത്തിന്റെ മകളും, തിരുവനന്തപുരത്ത് ഐടി സ്ഥാപനമായ എന്‍വെസ്റ്റ്‌നെറ്റിലെ ഉദ്യോഗസ്ഥയുമാണ് നിഖിലിന്റെ ഭാര്യ രേഖ നാരായണന്‍.

പോസ്റ്റ്‌മോര്‍ട്ടത്തിനു ശേഷം മൂന്ന് ആംബുലന്‍സുകളിലാണ് ഭൗതിക ശരീരങ്ങള്‍ മഠത്തില്‍ കൊണ്ടു വന്നു. കുടുംബത്തിന് നാട് ഒന്നാകെ അന്തിമോപചാരം അര്‍പ്പിച്ചു. സ്ത്രീകളും വീട്ടമ്മമാരും കണ്ണീരോടെ വിട നല്‍കി.