വിവാഹം സംബന്ധിച്ച തര്ക്കത്തെ തുടര്ന്ന് പീഡനക്കേസ് ഒത്തുതീര്പ്പാക്കണമെന്ന് ആവശ്യപ്പെട്ട് ബിനോയ് കോടിയേരിയും ബിഹാര് സ്വദേശിയായ യുവതിയും നല്കിയ അപേക്ഷ പരിഗണിക്കുന്നത് ബോംബെ ഹൈക്കോടതി മാറ്റിവച്ചു...
വിവാഹം സംബന്ധിച്ച തര്ക്കത്തെ തുടര്ന്ന് പീഡനക്കേസ് ഒത്തുതീര്പ്പാക്കണമെന്ന് ആവശ്യപ്പെട്ട് ബിനോയ് കോടിയേരിയും ബിഹാര് സ്വദേശിയായ യുവതിയും നല്കിയ അപേക്ഷ പരിഗണിക്കുന്നത് ബോംബെ ഹൈക്കോടതി മാറ്റിവച്ചു. നിയമപ്രകാരം വിവാഹിതരായോ എന്നതിന് അതെ എന്നു യുവതിയും അല്ലെന്നു ബിനോയിയും മറുപടി നല്കി. ഇതുമൂലം കേസ് പരിഗണിക്കുന്നത് കോടതി നീട്ടിവയ്ക്കുകയായിരുന്നു. ഇന്നലെ ബിനോയിയുടെ അഭിഭാഷകനും ഹാജരായില്ല. വിവാഹം സംബന്ധിച്ച തര്ക്കം തുടരുന്നതിനാലാണ് അഭിഭാഷകരും വിട്ടുനിന്നത്.
യുവതിക്കു ജനിച്ച കുട്ടിയുടെ ഭാവിയെക്കുറിച്ചുള്ള ചോദ്യത്തിന് വ്യക്തമായ ഉത്തരം വേണം മെന്ന് കോടതി ആവശ്യപ്പെട്ടിരുന്നു. ഇത്തരത്തില് കോടതി ആരാഞ്ഞപ്പോഴാണ് നിയമപ്രകാരം വിവാഹിതരായോ എന്നതിന് അതെ എന്നു യുവതിയും അല്ലന്നു ബിനോയിയും മറുപടി നല്കിയിയത്.
യുവതിയുമായി ബന്ധമില്ലെന്ന് ഇതുവരെ പറഞ്ഞിട്ടില്ലെന്നും എല്ലാ ആരോപണങ്ങളും ശരിയല്ലെന്നാണ് ചൂണ്ടിക്കാട്ടിയതെന്ന് ബിനോയിയും പറയുന്നു. കേസ് ഒത്തുതീര്പ്പിലെത്തിയെന്നു കാണിച്ച് നല്കിയ അപേക്ഷ പരിഗണിക്കാനാവില്ലെന്ന് ഹൈക്കോടതി ഡിവിഷന് ബെഞ്ച് നേരത്തെ വ്യക്തമാക്കിയിരുന്നു. കോടതിയില് സമര്പ്പിച്ച ഒത്തുതീര്പ്പു കരാറില് തങ്ങളുടെ കുട്ടി വളര്ന്നുവരുകയാണെന്നും അവന്റെ ഭാവിയെ ഓര്ത്താണ് കേസ് ഒത്തുതീര്ക്കാന് തീരുമാനിച്ചതെന്നുംബിനോയ് കോടിയേരിയും യുവതിയും ഒപ്പിട്ട രേഖയില് പറയുന്നുണ്ട്.
ബിനോയ് കോടിയേരിയാണ് കുട്ടിയുടെ അച്ഛനെന്ന് കാണിച്ച് ബിഹാര് സ്വദേശിനിയാണ് ആദ്യം പരാതിയുമായി രംഗത്തെത്തിയത്. എന്നാല് പരാതി വ്യാജമാണെന്ന് ആരോപിച്ച് ബിനോയ് കോടിയേരി ബോംബൈ ഹൈക്കോടതിയെ സമീപിച്ചു. എഫ്ഐആര് റദ്ദാക്കണമെന്നും ബിനോയ് ആവശ്യപ്പെട്ടിരുന്നു. ആ സമയത്താണ് ഡിഎന്എ പരിശോധന നടത്തി പിതൃത്വം തെളിയിക്കണമെന്ന ആവശ്യം കോടതി തന്നെ മുന്നോട്ട് വയ്ക്കുന്നത്. അതിന്മേലാണ് ഡിഎന്എ പരിശോധന അടക്കം നടത്തിയത്. ഹൈക്കോടതിയില് രഹസ്യരേഖയായി നല്കിയിട്ടുള്ള ഡിഎന്എ പരിശോധനാഫലം പുറത്തുവരും മുന്പാണ് കുഞ്ഞിന്റെ പിതൃത്വം ബിനോയ് പരോക്ഷമായി അംഗീകരിച്ചിരിക്കുന്നത്.
https://www.facebook.com/Malayalivartha
