ലിംഗസമത്വത്തിന്റെ ബാലപാഠങ്ങൾ വീടുകളിൽ നിന്നും സ്കൂളുകളിൽ നിന്നും തുടങ്ങുന്നതാണ് ഏറ്റവും നല്ലത് എന്ന് വ്യക്തമാക്കുകയാണ് ഡോ . മനോജ് വെള്ളനാട്. ലിംഗസമത്വത്തിന്റെ ബാലപാഠങ്ങൾ വീടുകളിൽ നിന്നും സ്കൂളുകളിൽ നിന്നും തുടങ്ങുന്നതാണ് ഏറ്റവും നല്ലത് എന്നും അദ്ദേഹം ഫേസ്ബുക്കിൽ കുറിക്കുകയുണ്ടായി.

ഫേസ്ബുക്ക് കുറിപ്പ് ഇങ്ങനെ;

ജെൻഡർ ന്യൂട്രൽ വസ്ത്രമെന്ന് പറഞ്ഞാൽ മറ്റൊരു ജെൻഡറിന്റെ വസ്ത്രം മാറിയുടുക്കുന്നതിന്റെ പേരല്ല. അതിന് ട്രാൻസ് വെസ്റ്റിസം എന്നാണ് പറയുന്നത്. അതുകൊണ്ട് തന്നെ ജെൻഡർ ന്യൂട്രൽ വസ്ത്രത്തെ സപ്പോർട്ട് ചെയ്യാൻ പിണറായി വിജയനോ എം.കെ മുനീറിനോ സാരിയോ ചുരിദാറോ ധരിക്കേണ്ട കാര്യമില്ല. കാരണം, അവയൊന്നും ജൻഡർ ന്യൂട്രൽ വസ്ത്രമല്ല എന്നതു തന്നെ.

ലിംഗസമത്വത്തിന്റെ ബാലപാഠങ്ങൾ വീടുകളിൽ നിന്നും സ്കൂളുകളിൽ നിന്നും തുടങ്ങുന്നതാണ് ഏറ്റവും നല്ലത്. വസ്ത്രത്തിലെ സമത്വം ലിംഗസമത്വത്തിന്റെ നിരവധി ആസ്പക്റ്റുകളിൽ ഒന്ന് മാത്രമാണ്. കുട്ടികളായിരിക്കുമ്പോൾ സമത്വ സ്വഭാവമുള്ള വസ്ത്രങ്ങൾ ധരിപ്പിക്കാൻ വളരെയെളുപ്പവുമാണ്. ഒരാൾ ധരിക്കുന്ന വസ്ത്രം ശരീരം മറയ്ക്കുന്നതിനൊപ്പം അവർക്കേറ്റവും കംഫർട്ടബിൾ ആയതു കൂടിയാണെങ്കിൽ അതൊരു മികച്ച ചോയിസാണ്. പാന്റും ഷർട്ടുമൊക്കെ എല്ലാ ജൻഡറിലുള്ളവർക്കും കംഫർട്ടബിൾ ആണെന്നതിൽ സംശയവുമില്ല.

സാമാന്യ ബോധമുള്ള ആർക്കും ഇത്രയും കാര്യങ്ങൾ സിമ്പിളായി മനസിലാവും. ആവേണ്ടതാണ്. ഇനി പ്രശ്നം വരുന്നത് ഇതിനെ മതവുമായി കൂട്ടിക്കെട്ടുമ്പോഴാണ്. ഈ വിഷയത്തിൽ മതവാദികളുടെ വലിയ പ്രശ്നം വസ്ത്രസ്വാതന്ത്ര്യത്തിലെ കൈകടത്തലാണെന്ന് അവർ നമ്മളെ തെറ്റിദ്ധരിപ്പിക്കും. പക്ഷെ അതല്ലാ, ലിംഗസമത്വം എന്ന അടിസ്ഥാന ആശയം തന്നെയാണ് അവരുടെ പ്രധാന ശത്രു.

ലിംഗസമത്വത്തെ അംഗീകരിച്ചാൽ പിന്നെ ഒരു മതത്തിനും ഇവിടെ നിലനിൽപ്പില്ലാതെ വരും. മതങ്ങൾ ഉണ്ടായതും നിലനിൽക്കുന്നതും തന്നെ ലിംഗപരമായ അസമത്വത്തിന് മുകളിലാണ്. ഒരു ജൻഡറിലുള്ളവർക്ക് വിദ്യാഭ്യാസവും തൊഴിലും സമ്പത്തും അഭിപ്രായ സ്വാതന്ത്ര്യവും ജീവിക്കാനുള്ള സ്വാതന്ത്ര്യവും അങ്ങനെ സകലതും നിഷേധിച്ചതിലൂടെയാണ് മതങ്ങൾ നിലനിന്നു പോന്നിട്ടുള്ളത്. കാലവും ലോകവും മാറിയപ്പോൾ നിവൃത്തികേടു കൊണ്ട് ചില വിട്ടുവീഴ്ചകൾക്കവർ തയ്യാറായെങ്കിലും അടിസ്ഥാനപരമായി മതമെന്നാൽ അസമത്വം തന്നെയാണ്.

അതുകൊണ്ട് മതവാദികളോട് വസ്ത്രത്തിലെ സമത്വത്തെ പറ്റി ചർച്ച ചെയ്തതുകൊണ്ട് യാതൊരു കാര്യവുമില്ല. അവർ മറ്റേതോ നൂറ്റാണ്ടിൽ ജീവിക്കുന്നവരാണ്. അവരുടെ ജൽപ്പനങ്ങളെ പുച്ഛത്തോടെ അവഗണിച്ച്, വരുന്ന തലമുറയെ ബോധവത്കരിക്കുകയേ വഴിയുള്ളൂ.
മനോജ് വെള്ളനാട്