സര്‍ക്കാരിനെ സമ്മര്‍ദ്ദത്തിലാക്കി ഗവര്‍ണര്‍..... ലോകായുക്ത നിയമഭേദഗതി ഉള്‍പ്പെടെ 11 ഓര്‍ഡിനന്‍സുകള്‍ പുതുക്കിയിറക്കാന്‍ ഒപ്പിടാതെ ഗവര്‍ണര്‍ ആരിഫ് മുഹമ്മദ് ഖാന്‍, കാലാവധി നാളെ കഴിയുന്ന ഓര്‍ഡിനന്‍സുകള്‍ പുതുക്കാനായില്ലെങ്കില്‍ ഈ നിയമങ്ങള്‍ അസാധുവാകും, ഗവര്‍ണറുടെ നിലപാടില്‍ മുള്‍മുനയില്‍ സര്‍ക്കാര്‍.

കേസുകളെയടക്കം ബാധിക്കുന്ന ഗുരുതരമായ സ്ഥിതിവിശേഷമുണ്ടാകുമെന്നതിനാല്‍ ഗവര്‍ണറുടെ നിലപാട് സര്‍ക്കാരിനെ മുള്‍മുനയിലാക്കിയിരിക്കുകയാണ്. ഇവയ്ക്ക് അംഗീകാരം നേടിയെടുക്കുന്നതിന് ഗവര്‍ണറില്‍ കടുത്തസമ്മര്‍ദം ചെലുത്തിവരുകയാണ് സര്‍ക്കാര്‍.

എന്നാല്‍, ഗവര്‍ണര്‍ വഴങ്ങിയിട്ടില്ല. വെള്ളിയാഴ്ച ഡല്‍ഹിക്കുപോയ ഗവര്‍ണര്‍ 11-നേ മടങ്ങിയെത്തൂ. സംസ്ഥാനസര്‍ക്കാര്‍ രാജ്ഭവനുമായി ബന്ധപ്പെട്ടെങ്കിലും ഫലമുണ്ടായിട്ടില്ല. ഓര്‍ഡിനന്‍സുകള്‍ അംഗീകരിച്ചു നല്‍കാനോ, തിരിച്ചയക്കാനോ ഗവര്‍ണര്‍ പറഞ്ഞിട്ടില്ലെന്നാണ് രാജ്ഭവന്‍ സര്‍ക്കാര്‍ പ്രതിനിധികളെ അറിയിച്ചിരിക്കുന്നത്.
അതേസമയം സര്‍വകലാശാലാ കാര്യങ്ങളില്‍ ഗവര്‍ണറും സര്‍ക്കാരും പലതവണ ഏറ്റുമുട്ടിയിരുന്നു. ഇതിനെ മറികടക്കാനായി വി.സി. നിയമനത്തില്‍ ഗവര്‍ണര്‍ക്കുള്ള അധികാരം വെട്ടിക്കുറയ്ക്കാന്‍ സര്‍ക്കാര്‍ ഓര്‍ഡിനന്‍സ് കൊണ്ടുവരുന്നുണ്ട്. ഈ നീക്കമാണ് ഗവര്‍ണറെ പ്രകോപിപ്പിച്ചിരിക്കുന്നത്.


കേരള സര്‍വകലാശാലാ വി.സി. നിയമനത്തിന് സര്‍ക്കാരിനെ മറികടന്ന് ഗവര്‍ണര്‍ കമ്മിറ്റിയെ നിയോഗിച്ചിട്ടുമുണ്ട്. ജനുവരിയില്‍ നയപ്രഖ്യാപനപ്രസംഗം അംഗീകരിക്കാതെ തലേന്ന് രാത്രിവരെ സര്‍ക്കാരിനെ മുള്‍മുനയില്‍ നിര്‍ത്തിയതിന് സമാനമായ സാഹചര്യമാണുണ്ടാവുന്നത്.



അടിയന്തര സാഹചര്യത്തിലാണ് സര്‍ക്കാര്‍ നിയമനിര്‍മാണത്തിനായി ഓര്‍ഡിനന്‍സ് ഇറക്കുക. ഇവ പിന്നീട് ചേരുന്ന നിയമസഭാ സമ്മേളനത്തില്‍ ബില്ലായി അവതരിപ്പിച്ച് പാസാക്കണം. അതിനു കഴിഞ്ഞില്ലെങ്കില്‍ സഭാസമ്മേളനം തുടങ്ങിയതുമുതല്‍ 42 ദിവസമേ ഇവയ്ക്ക് ആയുസ്സുണ്ടാകൂ. അവ വീണ്ടും നിലനില്‍ക്കണമെങ്കില്‍ ഓര്‍ഡിനന്‍സായിത്തന്നെ പുതുക്കണം. ഇതിന് കഴിഞ്ഞില്ലെങ്കില്‍ അത് റദ്ദാക്കപ്പെടും. കഴിഞ്ഞ സഭാസമ്മേളനം പിരിഞ്ഞശേഷം ബില്ലാക്കാത്ത 11 ഓര്‍ഡിനന്‍സുകള്‍ പുതുക്കാന്‍ ജൂലായ് 27-ന് ചേര്‍ന്ന മന്ത്രിസഭാ യോഗമാണ് തീരുമാനിച്ചത്. ഈ ശുപാര്‍ശ 28-ന് രാജ്ഭവനിലെത്തി.

അഴിമതി തെളിഞ്ഞെന്നു കണ്ടെത്തിയാല്‍ മന്ത്രിയെ അയോഗ്യനാക്കാന്‍ ലോകായുക്തയ്ക്കുണ്ടായിരുന്ന അധികാരം എടുത്തുകളയുന്നതാണ് ലോകായുക്ത ഓര്‍ഡിനന്‍സിലെ ഭേദഗതി.