മട്ടന്നൂര്‍ നഗരസഭാ തെരഞ്ഞെടുപ്പിന്റെ പരസ്യപ്രചാരണം ഇന്ന് വൈകിട്ട് ആറിന് സമാപിക്കും. പകല്‍ 3.30ന് മട്ടന്നൂര്‍ ബസ്സ്റ്റാന്‍ഡില്‍ എല്‍ഡിഎഫ് തെരഞ്ഞെടുപ്പ് സമാപന പൊതുയോഗത്തില്‍ പി വി അന്‍വര്‍ എംഎല്‍എ സംസാരിക്കും. എല്ലാ വാര്‍ഡിലും പ്രചാരണ സമാപനമുണ്ടാകും.

ശനിയാഴ്ച നടക്കുന്ന നഗരസഭാ തെരഞ്ഞെടുപ്പില്‍ കൂടുതല്‍ സീറ്റും വോട്ടുമായി ആറാമത് ഭരണസമിതിലേക്കും എല്‍ഡിഎഫിനെ അധികാരത്തിലേറ്റുമെന്ന പ്രഖ്യാപനമായി 35 വാര്‍ഡുകളിലും നടന്ന റാലികള്‍ക്ക് ഇന്നലെ സമാപനമായി.

മട്ടന്നൂരിന് വികസനത്തിന്റെ നാളുകള്‍ സമ്മാനിച്ച ഇടതുപക്ഷത്തിന് ജനങ്ങളുടെ ഐക്യദാര്‍ഢ്യമായി വാര്‍ഡ് റാലികള്‍ മാറി. നഗരസഭാ തെരഞ്ഞെടുപ്പിന്റെ വോട്ടെടുപ്പ് നടക്കുന്നതിനാല്‍ 20ന് നെഗോഷ്യബിള്‍ ഇന്‍സ്ട്രുമെന്റ് ആക്ട് പ്രകാരം നഗര പരിധിയിലെ മുഴുവന്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും പൊതുഅവധിയും സര്‍ക്കാര്‍, അര്‍ധസര്‍ക്കാര്‍ സ്ഥാപനങ്ങള്‍ക്കും വാണിജ്യ സ്ഥാപനങ്ങള്‍ക്കും വേതനത്തോടെയുള്ള അവധിയും പ്രഖ്യാപിച്ചു.

സ്വകാര്യ സ്ഥാപനങ്ങള്‍ വേതനത്തോടുകൂടിയുള്ള അവധി നല്‍കണം. നഗരസഭയിലെ വോട്ടറും നഗരസഭയ്ക്ക് പുറത്ത് ജോലി ചെയ്യുന്നവരുമായ കാഷ്വല്‍ തൊഴിലാളികള്‍ ഉള്‍പ്പെടെയുള്ളവര്‍ക്കും വേതനത്തോടെ അവധി നല്‍കണം. നഗര പരിധിയിലെ സര്‍ക്കാര്‍ ഓഫീസുകള്‍ക്കും, വിദ്യാഭ്യാസ സ്ഥാപനങ്ങള്‍ക്കും 20ന് കലക്ടറും പ്രാദേശിക അവധി പ്രഖ്യാപിച്ചു.

പോളിങ് ബൂത്തുകളായി നിശ്ചയിച്ച സ്ഥാപനങ്ങള്‍ക്ക് 19നും 20നും വോട്ടെണ്ണല്‍ കേന്ദ്രമായ മട്ടന്നൂര്‍ ഹയര്‍സെക്കന്‍ഡറി സ്‌കൂളിന് 19, 20, 22 തീയതികളിലും അവധി പ്രഖ്യാപിച്ചു.

അതേസമയം നഗരസഭാ തെരഞ്ഞെടുപ്പ് നടക്കുന്നതിനാല്‍ 18 മുതല്‍ 20 വരെയും 22നും മട്ടന്നൂര്‍ നഗരസഭാ പരിധിയിലെ എല്ലാ മദ്യഷാപ്പുകള്‍ക്കും ഡ്രൈഡേ പ്രഖ്യാപിച്ചു.